HĀSHOKME 11 - Kathara Bible (BSI)

Thangkhama Miwui Acham

¹ Nawui kashaikashak tara̱li horsanglu, kaja chi sha̱rākhawui thili samphangra.

² Shinili khumkha milu, lah chishatli eina tangda milu; kaja okathuili khi kalākashi shoknikhala kaji na matheimana.

³ Muiyā zingrotna pemtinghaiakha, athum chi okathuili heitamihaowa, kala thingrongna azingshong nilala atungshong nilala pitaakha pikatāvāk chi leisara.

⁴ Masi khayanga che athā mayaosangmara, kala muiyā khamachuta che mahātkhuimara.

⁵ Naokhavaiva̱ sha̱naowui naopamli kazang ara̱kui chili manglā kathāda rāzangkhala da nana makathei thāda, otsak saikora kasā Varewui ot nana matheirarmana.

⁶ Ngathorshong nawui athā yaolu, ngazinshongla napāng mangasāmhaialu, kaja hinagā, chinagā maningakha khanini ngaraichāda phānikhala da na matheimana.

⁷ Kahor hiya leishirihai, kala zimik kathei hi mikwui vang ringphālaka.

⁸ Kachikathā mi akhana kum kasāngkha okthuiakha, chi chupta mathānranu; kha tangkhamang zimiksho kachungkha lei kajila mamalaiaranu. Kashoshok saikora aremasera.

Yaronnaoli Hāngkachithei

⁹ Mathānlu, O Yaronnao, na yaronshaplakha, yaronshaplakha ningngasa̱ta eina, nawui ningwui kala nawui mikwui apongli zatlu; kha ot saikora hiwui vang Varena nali bicharpamli khuirāra kaji theilu.

¹⁰ Malung vātkhangasak nawuklungwui eina khuishokhaolu, kala naphasāwui eina kachot horhaolu; kaja yaronshap atam kala mirin haokaphok hila aremana.