HĀSHOKME 10 - Kathara Bible (BSI)

Mangkhama̱wui Athei

¹ Hachāng kathina nganamkaphā thao nganamshi ngasaka; chithāda sāda mangma̱sak kateokhana thangkhamei kala khayākakāli ritmeiya.

² Thangkhamei miwui ningna ali yāshong yuivā ngasaka, kha mangkhama̱wui ningna uishong yuivā ngasaka.

³ Mangkhama̱na shongfali zatlala ning maleimana, kala ana mi kachiva̱li a mangkhama̱na da hāngzata.

⁴ Khamungana nawuitungli malungvātlala nawui pam machihohaialu, kaja pāmkasangna hakkhamahā kashong ngachei ngasaka.

⁵ Okathuili khamungawui eina kashok khayon khalei chi ina theihaira:

⁶ mangkhama̱li kajuipam kachungkhali chipama, kala kashāngana khanempamli pama.

⁷ Raonaona sigui katong, kala wungnaobingna raonao thāda phei eina kazat ina thei.

⁸ Chom kachuia china khalatta chili tāzangra; kala phākho kapheiyali phara̱na mara̱ra.

⁹ Ngalung kaharali ngalungna tāka; kala thingkakazarali china kalā shingasaka.

¹⁰ Ngahā ngama̱haoda zankhavai makharakha awui yāng chungmeida zangra; kha thangmeina ot kasā ungshung ngasaka.

¹¹ Phara̱na manuiranglakha makeihaiakha, nuikhangasaka chiwui kankhanā maleimana.

¹² Thangkhama khamorwui tuimatui eina ali lum kai; kha mangkhama̱ morchaina a khalatta shimān ngasaka.

¹³ Mangkhama̱ana mangma̱t tui eina haophoklaga, makhayā kapā tui eina kupa.

¹⁴ Mangkhama̱ana matuishonlala khi sāsānikhala da khapanakha matheimana, kala awui thili khirakhala kaji khipana ali hāngshapra?

¹⁵ Mangkhama̱ awui ngalangkazārna ali khanang ngasakhaoda ana keinungli zangkhavai apong matheithuwa.

¹⁶ O ngalei, nawui awunga nganuilakha nawui wungnaobingna ngathorshong morkasong chi kalākashina!

¹⁷ O ngalei, nawui awungana ningkakhānwui naomayara, kala wungnaobingna malip khavai maningla, yāng shokkhavai atam chāda morkasong chi na ringkaphāna.

¹⁸ Ngachangmakakā eina shimtung ja̱tai, kala ot masākhangai eina shim ngaya̱na.

¹⁹ Zāt hi mathān khavaina, drakhāra̱na mirin mareo khavaina, kala pheisāna saikora sāpai.

²⁰ Naninglila awungali makhonshialu; ngayaipilakhala kashāngali makhonshialu, kaja vānaona ahānghaora, angachāng kaphon yurnala ashihaora.