HAOKAPHOK 50 - Kathara Bible (BSI)

¹ Chieina Josephna avāva̱li mai ngasunda chaplaga avāva̱wui mai maya̱ya.

² Kala Josephna awui khanongbingli avāva̱wui phasāli makashui ari neomi khavai kasoi. Chieina khanongbingna Israelwui phasāli ari neomi;

³ chi khaneo zimiksho hangmatithang zanga, kaja chirankha zangphalunga. Kala Egyptnaobingna zimiksho hangshinithang chapngachai.

⁴ Kala awui vang chapkhangachā atam peikahai eina Josephna Pharaohshi shimkhurli hānga, “Ili nathumwui mikyanli leishimiakha, ina kapona, Pharaohli hāngmilu,

⁵ Ishāvāna ili khangashit akha sangasakta ‘I ara thiki jiura; Canaanli ina sākahai chikhur chili nana ili ungchifalu’ da hānghaili. Chiwui vang ara apam chili ishāvāli chifa khavai ili khamayā milu, ina kapona; chiwui thili ina hanungnaoga.”

⁶ Pharaohna, “Navāna ngashit ngasak kahai athishurda achifahaolu.” da ngahānkai.

⁷ Chieina Josephna avāva̱li chifa khavai vai; ali ngasoda Pharaohwui rao shimkhurwui khararabing, kala Egyptwui khararnaobing,

⁸ kala Josephwui shimkhur saikorala, achinā ngarāla, avāva̱shi shimkhurla vāsera; naoshinaobing kala sha̱keibingmāng Goshenli haisai.

⁹ Kala siguigari eina sigui katongabing khanini zangda ali ngasovai; hi mikazip kahaka akhana.

¹⁰ Jordan kānda Atadwui lanpumli vākashung tharān apam chili athumna wukkhananglāk eina achapngachai; kala Josephna avāva̱wui vang shinithang chapngachai.

¹¹ Atadwui lanpumli malungringlak eina chapkhangachā chi Canaannaobingna theilaga athumna hānga, “Hi Egyptnaobingwui vang khananglāk kahai akhara.” da hānga. Chiwui vang apam chili Abel-mizraim hoi; hi Jordan kong kānlaga lei.

¹² Avāva̱na kaso kahai tākam eina anaomayarabingna sāmi;

¹³ kaja anaomayarana ali Canaan ngaleili khuishangda Mamrewui zingshoshong, Mach-pelahli khalei luiwukwui ngalungkhur, Hitpa Ephronwui eina Abrahamna lokakhui chikhur sāda haiching khavai lungkhur chili chifaya.

¹⁴ Avāva̱li chifa kahaiwui thili Josephna achināngarā kala ali khangasobing saikorali ngasoda Egyptli hanunga.

Josephna Achināngarāli Ning Lumkhangasak

¹⁵ Josephwui achinā ngarāna avāva̱ thikahai chi theilaga athum hāngngaroka, “Josephna ithumli ningkachaida ali ithumna makaphā sākahai chiwui vang athut khuipai.”

¹⁶ Chieina athumna Josephli pao akha chiphunvāda hānga, “Nashavā mathiranglakha hithāda hānghaili,

¹⁷ ‘Josephli hānglu, achinā ngarāwui morei kala khayon pheomilu, kaja athumna nali makaphā sāhaida lei.’ Chieina ara navāwui Varewui rao ithumwui khayonkhamāng pheomilu.” Athumwui tui chi shālaga Josephna chapa.

¹⁸ Kala achinā ngarāna awui mangāli vālaga mai mashunzangda hānga, “Yanglu, ithum nawui raosera.”

¹⁹ Kha Josephna athumli hānga, “Mangacheelu, I Varivarawui pamli leila?

²⁰ Nathumna ili makaphā saga da phaningsālapai, kha Varena kaphā sāmihaowa, kaja aja hithāda mi kachungkhali ringngasak khavai kasāna.

²¹ Chiwui vang eina mangacheelu; ina nathumli kala naoshinaobinglila mizāchingra.” Hithāda athumli ringphāda ninglum ngasaka.

Joseph Kathi

²² Chithāda sāda Joseph kala avāva̱wui shimkhur saikora Egyptli pama; kala Josephna kum shākha tharā okthui.

²³ Anaomayara Ephraimwui naongarā, thot kathum eina tangda thei; kala Manassehwui naomayara Machirwui naongarā Josephwui makāli pharāsanga.

²⁴ Kala Josephna achināngarāli hānga, “I thiki jihaira; kha Varena nathumli ngasomida, Abrahamli, Isaacli, Jacobli ngashit kahai lam chili, apam hiwui eina thānshokra.”

²⁵ Chiwui thili Josephna Israelwui naomayarabingli khangashit akha sāngasakta hānga, “Varena nathumli ngasomira, kala iwui ara̱kui hiwui eina nathumna phungthuira.”

²⁶ Chithāda Josephna kum shākha tharā kākashung eina thihaowa; kala ari neolaga aphasā chi kathi okoli sangda Egyptli hai.