HAOKAPHOK 49 - Kathara Bible (BSI)

Jacobwui Khanaowa Tui

¹ Chiwui thili Jacobna anaomayarabingli hokhuida hānga, “Rākazipserlu, naoda nathumli khi shokrakhala kaji ina hāngka;

² “O Jacobwui naomayarabing, rānganākhuiserlu, kala navā Israelwui kahāng shākhuilu.

³ Reuben, na iwui naochizaina, iwui pangshapna, khayāla pangshapla khaleiya kala I yang kālakhawui matheikhare atheina.

⁴ Tara̱ thāda marungkhung makaji, nawui akhar mavaimara, kaja nana navāwui petli kāda; nana pet chi sākhamānga — nana iwui petli kai!

⁵ Simeon eina Leviva chinaonina; ngashao khavai khutlai aniwui raighaina.

⁶ O imanglā, aniwui channgazekli mazangalu; O iwui ning; anili mangayuralu; kaja malungkhavāt tharan anina mi shaothata, kala zeingarui shida seiphei shātteka.

⁷ Aniwui malungkhavātwui sākashi, malung kathuiwui zakkashi, khonkashi ngasāranu; ina anili Jacobwui shimkhurli ngayaryāngmihaora, kala Israelwui shimkhurli chaiyāngmihaora.

⁸ Judah, nachinā ngarāna nali sora; kala yangkashebingli napāng eina athumwui akahung shimetra; navāwui naobingna nali khorumra.

⁹ Judah, kazingkha̱ naona, sāshaiwui eina nana thuihaira. Ana hamzanga, kazingkha̱ avā thāda pamzanga, kazingkha̱ ava̱ thāda, ali khipāna mathotlengrakhala?

¹⁰ Wungnao khānthing Judahwui eina mathuimara, lah khamungawui khāmshui apheiwui eina mathuimara, singkhangaye chi marāranglakha; kala mibingna ali khayāshira.

¹¹ Drakhātheirongli awui siguinao hokhai, mathāmeikap kaje drakhātheirongli gadhānao hokhai, awui kashankachon zamli ngasa̱ra, kala awui phahon drakhārathei ashee eina ngasa̱ra;

¹² drakhāra̱na amik hungra, seina̱na ahā charra.

¹³ Zebulunna shamadrupheili pānra; jahas ngasām khavai pam ngasāra; kala Sidon vāshungda awui thari sāra.

¹⁴ Issachar kapanga gadhāna, yaoshang khaniwui ngachaili ngakhorpama;

¹⁵ ana ngasām khavai pam mathai da thei, kala lam chi ringkaphāna da thei; chieina ana yāng chishotta, ana miwui raonao sāda thoukai phunga.

¹⁶ Israelwui shang akha sāda, Danna awui mibingli bichar sāra.

¹⁷ Danna shongfa kachida, apong kachida phara̱ thāda sāra, sigui pheili makeida katongapali khanukshong pitā ngasakra.

¹⁸ Ina nawui ngatangkhami hondalei, O Proho.

¹⁹ Khangaponbingna Gadli ngaponra, kha ana athumli kharomra.

²⁰ Asherwui kashakazā mavatlakmara, kala wungnaowui kashakazā ana vaira.

²¹ Naphtali chipen kahai chao anao khamathā pharākakhui kathāna.

²² Joseph, athei tarākha khamathei aphāngna, luiradungli khamathei thingphāngna; awui aphāng phākholi ngareikai.

²³ Malā kasingabingna sāshilak eina ali ngararda, ali thaiya, kala sipsālak eina chotngasaka;

²⁴ thālala awui malā mangatha̱lakmana, pāngthei thāngthaprap Jacobwui Sashap-vāshapa china (Israelwui Lunghār, Yaokahoma ming china) sāmihaira,

²⁵ nali ngachonmiki kaji navāwui Varena; Sāshapa Vare nali ngachonmiki kaje china, atungshongwui sokhami, kathukalungli khaleiya sokhami tara̱ kathā, mathik eina naopamwui sokhame china nali somira.

²⁶ Katang makhavai kaphungwui sokhamile, katang makhavai phungrābingwui makhavātali; navāwui sokhamina mataimeikhara; chi achinā ngarāwui eina ngateithui kahaiya Josephwui kuitungli leimichingranu.

²⁷ Benjamin thailak kahaiya ramfana, ngathorshong ashailaga, ngazin ngayar khaunga china.”

²⁸ Saikora hi Israelwui shang tharāda khani china; kala avāva̱na athumli mikharān sokhami milaga kahāng chi hina.

Jacob Kathi kala Kachifa

²⁹ Chiwui thili ana athumli kasatta hānga, “Ara ishawo ishayiwuili vākhavai Hitpa Ephronwui luiwukwui ngalungkhur chili ishāvā ngarāli ngasoda chifalu,

³⁰ kaja Mach-pelahli khalei Mamrewui zimikshoshong Canaan ngaleili Abrahamna lui eina ngasoda chikhur sākhavai Ephronli lokakhui akhur chili chizanlu.

³¹ Apam chili athumna Abraham eina apreiva̱ Sarahli chifaya; Isaac eina apreiva̱ Rebekah chifaya; kala chili ina Leahli chifaya—

³² lam eina lungkhur chi Hitnaowui eina lokakhuina.”

³³ Jacobna naomayarabingli kasatmi kahaiwui thili ana aphei pettungli khāngkai, kala khanaowa khaksui suilaga, awui awo-ayibingli vāhaowa.