HAOKAPHOK 46 - Kathara Bible (BSI)

Jacobwui Shimkhur Egyptli Katā

¹ Chieina Israelna awui khalalei saikora khuiphungda zata, kala Beer-shebali vākashung eina avāva̱ Isaacwui Vareli pha̱phayā khavai hanphut akha sai.

² Kala chithang ngayā mangshongli Varena ali rāsamphangda hānga, “Jacob, Jacob.” Ana ngahānkai, “I hili leili.”

³ Chieina ana hānga, “I Varena, navāwui Varena; Egyptli tākida mangangalu; kaja apam chili ina nawui eina miyur kahaka akha sākhuira.

⁴ Ina nali Egyptli ngasotāra, kala ina nali thānshokluira; kala nana Josephwui pāngli thisangra.”

⁵ Chieina Jacobna Beer-shebawui eina zatphoka; Israelwui naomayarabingna Pharaohna kachiho siguigarili athumwui avāva̱ Jacob, athumwui anaongarā, kala athumwui preiva̱bingla khuiphunga.

⁶ Kala athumna Canaanli leilakha mathuisang kahai sha̱kei kala thongthāngla khuiphungda Egyptli, Jacob kala ali ngasoda

⁷ ara̱-azā, naomayarabing, naobingwui naongarā, awui naongalāva̱ ngarā naomayarabingwui naongalāva̱ ngarā, saikora Egyptli thāntāsera.

⁸ Egyptli katā Israelwui ara̱-azābing chi hibing hina, Jacob kala anaomayarabing, nao kharar Reuben,

⁹ kala Reubenwui naomayarabing: Hanok, Pallu, Hezron kala Carmina.

¹⁰ Simeonwui naomayarabing: Jemuel, Jamin, Ohad, Jachin, Zohar, kala Shaul, Canaan pava̱na kapharā naomayarana.

¹¹ Leviwui naomayarabing: Gershon, Kohath, Merarina.

¹² Judahwui naomayarabing: Er, Onan, Shelah, Perez kala Zerah (kha Er eina Onan Canaanli thisanghaowa); kala Perezwui nao Hezron eina Hamulna.

¹³ Issacharwui naomayarabing: Tola, Puvah, Iob kala Shimronna.

¹⁴ Zebulunwui naomayarabing: Sered, Elon kala Jahleelna.

¹⁵ (Paddan-aramli leilakha Leahna Jacobli pharākhami naomayarabingna, naongalāva̱ Dinahla zangda; awui naomayara kala sha̱nao katonga ngarumda thumrāda kathumna).

¹⁶ Gadwui naomayarabing: Ziphion, Haggi, Shuni, Ezbon, Eri, Arodi kala Arelina.

¹⁷ Asherwui naomayarabing: Imnah, Ishvah, Ishvi, Beriah kala azarva Serah. Beriahwui naomayarabing: Heber eina Malkhielna.

¹⁸ (Hi Labanna anao ngalāva̱ Leahli khami Zilpahna kapharā Jacobwui naongarāna; mi tharāda tharukna).

¹⁹ Jacob preiva̱ Rachelwui naomayarabing: Joseph eina Benjaminna.

²⁰ Egyptli leilakha Josephwui nao Manasseh eina Ephraimli On pāngmon Potipherawui naongalāva̱ Asenathna pharai.

²¹ Benjaminwui naomayarabing: Bela, Becher, Ashbel, Gera, Naaman, Ehi, Rosh, Muppim, Huppim kala Ardna

²² (athum tharāda mati hi Rachelna kapharā Jacobwui naomayarabingna).

²³ Danwui naomayara: Hushim.

²⁴ Naphtaliwui naomayarabing: Jahzeel, Guni, Jezer, kala Shillem,

²⁵ (athumna hi Labanna anao ngalāva̱ Rachelli khami Bilhahna kapharā Jacobwui naona; ana kapharā athum mayarnao shinina).

²⁶ Jacobwui mi awui naotunbing, naomayarawui preiva̱̱ ngarā mazangla ashi hangtharukta tharuka;

²⁷ kala Josephwui nao Egyptli kapharā khani; Jacobwui shimkhur Egyptli khavā katonga hangshinina.

Jacobwui Shimkhur Egyptli Kapam

²⁸ Josephli samphang khavai ana rida Judahli chihovai, kala athumna Goshenli vāshunga.

²⁹ Chieina Josephna awui siguigari khangarān sālaga avāva̱ Israelli samphang khavai Goshenli vai, kala samphangda hungreikhuilaga kasāngkha chapa.

³⁰ Israelna Josephli hānga, “Nazak kathei kala na ringda khalei kathei samphanghaoda, ara I thilala mangangmana.”

³¹ Josephna achināngarā kala avāva̱wui shimkhurli hānga, “Ina Pharaohli vāda, ‘Ishi chinaongarā kala ishāvāwui shimkhur Canaanwui eina iwuili rāhaira;

³² athuma sha̱kei kakei mi sāthuihaoda, kharewui eina sei homsai; chieina athum sei, sha̱kei khalalei saikora homrāserhaira da hānghaoga.’

³³ Pharaohna nathumli hokhuilaga ‘Nathum khi ot sākhala?’ jiakha,

³⁴ ‘Nganuilakhawui eina thuida arui eina tangda naraobing yao homa’ jilu; chithakha nathum Goshenli sompampaira; kaja sei kahomnao kachiva̱ hi Egyptnaobingwui vang ningkakachaiyana.”