HAOKAPHOK 45 - Kathara Bible (BSI)

Josephna Achinā ngarāli Theikhangasak

¹ Awui ngalemli leikasābingwui mangāli makhalemrarthuda Josephna “Thuingasakserhaolu” da kashamhaowa. Chiwui thili a khipākhala da achinā ngarāli kahāng chitharān khangatei mi maleisāmana.

² Ana panglāk eina kachap chi Egyptnaobing kala Pharaohshi shimkhur shāsera.

³ Kala Josephna achinā ngarāli hānga, “I Josephna, ishāvā aruila ringda leila?” Kha achinā ngarāna awui mangāli ngacheenahaida khikha mangahānkārarthuwa.

⁴ Chieina Josephna achinā ngarāli hānga, “Ili rānganaimeilu, ina kapona.” Athumna vānganaimei. Kala ana hānga, “Nathumna Egyptnaoli yorsang kahaiya nachinā Joseph chi ina.”

⁵ Nathumna ili yorsang kahaiwui vang malung maringalu, lah malung mavāt ngaroklu; kaja Varena manglā kanmi khavai nathumli rida ili kachihona.

⁶ Ngalei hili zāt sakta kum khanihaira; aruila lui vākasang kala mā mahātsangki kaji kum phangā leifaya.

⁷ Mi kachungkha ringngasak khavai kala okathuili nathumli shākkhavai rida ili chihokharāna.

⁸ Chiwui vang eina nathumna ili hili chihokharā maningmana, kha Varena kachihona; kala ana ili Pharaohwui avāva̱, kala ashi shimkhurwui akhavā sangasakta Egypt ngaleili mungkhangasakna.

⁹ “Ishāvāli thākta unghānglu, ‘Nanaomayara Josephna hithāda hānga, Varena ili Egypt katongawui akhavā sāngasakhaira, thākta iwuili tālu, manganongpamalu;

¹⁰ nathumna Goshenli somda iwui ngalemli pamra, nanaongarāla, naobingwui naobingla; nathumwui mela, seila, yaola kala nathumwui khalalei saikorala;

¹¹ chili ina mizāserra, chi maningkha nathumla, nathumwui khalei saikorala kazā masamphangmara, kaja aruila zāt sakki kaji kum phangā leifaya.’

¹² “Ikhamor eina kahāng hi nathumwui mik eina theihaira, igato Benjaminwui mik eina theihaira;

¹³ Egyptli iwui kharei khangam kala nathumna kathei saikora ishāvāli unghāngserlu; ishāvāli hili thākta khuitālu.”

¹⁴ Chiwui thili Benjaminli hungreikhuida chapa; Benjaminnala hungreida chapa.

¹⁵ Kala achinā ngarāli maya̱khuida chapa. Chiwui thili achinā ngarāna ali chān ngazekngaruma.

¹⁶ “Josephwui achinā ngarā rāhaira,” kaji Pharaohshi shimkhurna kashā eina, Pharaoh kala awui raobing ringphālakhaowa.

¹⁷ Kala Pharaohna Josephli hānga, “Nachinā ngarāli hithāda hānglu, ‘Hithāda sālu: nathumwui gadhāli shaksākhuilaga Canaanli ungulu;

¹⁸ laga navā eina shimkhur saikora hili hotāda Egyptwui ngalei apam khamathā chi ina mira, kala ngalei chiwui heithei athumna khuira da hānglu.’

¹⁹ Kala hithāda kasolu, ‘Hithalo: Egyptwui eina siguigari khuiphungda, naoshinaobing, preiva̱ ngarā kala navāli khuitāmiranu.

²⁰ Kala nathumwui lanwui vang mashivāmalu, kaja Egyptwui mathāmeikap kaji lam chi athumwui sāra.’”

²¹ Israelwui naomayarabingna chithāda sai, kala Pharaohna Josephli kakaso athishurda siguigari ngarānmida shongfali zākhavaila sangmi.

²² Athum kachiva̱li kachon khamathā akharip mi, kha Benjaminli lupāsā shekel shākathum kala khamathā kachon phangā mi.

²³ Avāva̱li kachiphun otbing chi: Egyptwui ot khamathāthā chi gadhā tharāna phunga kala māngum, khamui, kashakazā shongfali zākhavaila gadhā ava̱ tharāna phungda chihounga.

²⁴ Chiwui thili achinā ngarāli chihoda ana hānga, “Shongfali makharar ngaroklu.”

²⁵ Athumna Egyptwui eina Canaanli, avāva̱ Jacobli latunga.

²⁶ Athumna ali, “Joseph aruila ringda lei, kala Egyptwui akhavā sāda lei” da unghānga. Chi shālaga ning shingakhaowa, kaja athumli mashitsangrarthuwa.

²⁷ Kha Josephna athumli kahāng tui saikora chi ungkahāng eina kala Josephna kachiho siguigari chi theilaga avāva̱ Jacobwui ning ungrāsai;

²⁸ kala Israelna hānga, “Shaphaira; inao Joseph ringda lei; I mathiranglakha ali vāyangkhuira.”