HAOKAPHOK 44 - Kathara Bible (BSI)

Shimān kahai Tengkot

¹ Chiwui thili awui kashina chili kasoi, “Athumwui phungshap kachichāwui khaoli pemda sangmilu, kala kachichāwui pheisā kachichāwui khaoli sangmiserhaolu,

² kala iwui tengkot, lupāsāwui tengkot chi paishowui khaoli, pheisāla, kala māngumla ngarumda sangmihaolu.” Kala ana Josephna kakaso chi tākam eina sai.

³ Kazing thangkhaleoda athumwui gadhābing khuiphungda zatngasakhaowa.

⁴ Athum keinungwui eina zatta mashāngnāranglakha, Josephna awui kashinapali hānga, “Ngakarthuilu, mibing chili kharomvālu; kala nana athumli akhangaphan tharān, hithāda hānglu, ‘Kaphā sākhamiwui vang nathumna khiwui vang kashi eina hankhamikhala? Khisāthuda iwui lupāsāwui tengkot leethui kahaikhala?

⁵ Hi eina ishāmeina khamang maningmala, kala hi eina ana sāshap theishap kaji maningmala? Nathum yonlakhaira.’”

⁶ Akhangaphan eina ana tui chi tākam eina ahānga.

⁷ Athumna hānga, “Ameina khisāda hikathā tui hānghaokhala? Naraobingna hikathā ot sākida katāva̱li lei.

⁸ Yanglu, ithumwui khaoli zangkasa lupā chi Canaan ngaleiwui eina khuirāmiluihaira, laga kathāda ithumna nashameiwui sinā lupā leepairakhala?

⁹ Hi zangkasapa chi shaothathaoranu, ithumla ishameiwui raonao sāserra.”

¹⁰ Ana hānga, “Nathumna kahāng chitharanu, kala khuiphungkasāpa chi iwui raonao sāra, kha kateibing khikha khayon maleimana.”

¹¹ Chieina kachichāna katotsisi khao ngareitai, kala kachichāwui khao pheiya.

¹² Kala ana kharara eina thuilaga paisho eina tangda phāyanga. Kala tengkot chi Benjaminwui khaoli zangsai.

¹³ Chieina athumna kachon serkhākta kachichāwui gadhāli ot shaksākhuilaga keinungshong hanvai.

¹⁴ Judah kala achinā ngarāna Josephwui shimli vākashung tharān, a pamsai, kala athumna ngaleili ngakhumzangda khayāshiya.

¹⁵ Josephna athumli hānga, “Nathumna kasā hi khikhala? I kathā mina khanongkhuishapa da nathum matheimala?”

¹⁶ Judahna hānga, “Ameili khi hāngrakhala? Ithumna khitui hāngra? Kala ithumna maninglakmana kaji kathāda hāngakha shitsangpairakhala? Naraobingwui khayon Varena phongmihaira; yangmilu, ara khuikaphungala, ithumla nawui raonao sāra.”

¹⁷ Kha Josephna hānga, “Ina chitha khavai maleimana: khuiphungkasāpamāng iwui raonao sāra, kha nathum kateibinga chingri eina navāwuili ungulu.”

Judahna Benjaminwui vang Kahāng

¹⁸ Chieina Judahna awuili kāda hānga, “O iwui amei, ina poli, narao ili tui akhamāng kahāng ngasakmilu; narao ithumli nawui malungkhavāt maza̱ngasakmilu; kaja na Pharaoh kathāna.

¹⁹ Ameina naraobingli ‘Navā leila, lah nagatola leila?’ da ngahāna.

²⁰ Chieina ithumna ameili ‘Sarlak kahaiya ishāvā lei, kala asārlam kapharā igato paisho akha lei, akhapa thihaowa, ava̱va̱na kapharā himāng khaleiwui vang ishāvāna ali lumlaka’ da hānga.

²¹ Chieina naraobingli nana ‘Ali ina yangkhui khavai thānrālu’ da hānga.

²² Ithumna ameili ‘Nao chi ishāvāli mahorhaipaimana, kaja ana horhaiakha ishāvā thihaora’ da hānga.

²³ Kha nana naraobingli ‘Nagatoli mathānraakha ili masamphangpaimara’ ” da hānghaowa.

²⁴ “Ithumna narao ishāvāli hankhaung chitharān, ameiwui tui saikora ali hāngsera.

²⁵ Kala ishāvāna ‘Zāt aloluilu’ da kahāng eina,

²⁶ ‘Ithum mavārarmara; kha igato paisho vaakha ithumla vāra, khikhalajila paisho mazangakha ithum awui azak matheirarmara da ngahānkai.’

²⁷ Chieina narao ishāvāna ithumli hānga, ‘Ipreiva̱na iwui nao khani pharai kaji nathumna thei;

²⁸ akhapāna ili nothāhaira, kala mashoila ali serkazamhairara da ina hāngthang eina thuida matheiluilakthuwa.

²⁹ Akhapa hila iwui eina thānthuilaga kalākashi shokakha, asārlam nathumna iwuk khanangda Kazeiram vāngasakra.’

³⁰ Chieina igato mazangla narao ina ishāvāwuili khaung tharān, awui ning ali shāptithaoda,

³¹ a mazangkasā chi theilaga a mashoila thihaora; chieina kasara chili wukkakhanang eina naraobingna Kazeiramli vāngasakhaora.

³² Kaja narao ina nao hiwui vang ishāvāli hānglaga nganingkhuihaidalei, chiya ‘Ina nao hi mathānungluiakha kaphen saikora chi iwui mirin peida ina phungra’ jikahaina.

³³ Chiwui vang eina nao hiwui mahut ili pamngasakta nawui rao sāngasakmihaolu, laga ale khangatei achinābingli ngasounghaoranu da kapona.

³⁴ Kaja nao hi mazangla kathāda ishāvāwui mangāli ina latungpairakhala? Ishāvāli kalākashi rāki kaji chi ina mayangrarmara.”