HAOKAPHOK 41 - Kathara Bible (BSI)

Josephna Pharaohwui Mang Khalatkhami

¹ Kum khani peikahaiwui thili Pharaohna awui mangshong Nile kongpheili nganingsai,

² Nilewui eina asākakā kala nganaipat kahai mukkā shini shoklaga khawo phāshai.

³ Kala athumwui thili khangatei kaothethek kala rurārsār kahai mukkā shini Nilewui eina shoka, kala mukkā kateibingwui ngalemli shoknganinga.

⁴ Kaothethek kala rurārsār kahai mukkābing china asākakā kala nganaipat kahai mukkā chili shaihaowa. Chiwui thili Pharaohna thuimathuka.

⁵ Ana pivaluishita kala kakhane mang rāshimana; kala yanglu, māmazān khamathā panglāk kahai shini mārong akhali matheisai.

⁶ Chiwui thili zingshoshongwui masina phankhalanghaida shāt-kazanga tāham kahai māmazan shini shoka.

⁷ Kala chibingna khamathā māmazan shini chili mayuisanghaowa. Chieina Pharaohna thuimathuka, kala mangshong ngasāsai.

⁸ Chiwui vang ngathor kathui eina awui ning mamathānrarthuwa; ana Egyptli khalei mitrang kathem kala thangkhamei saikorali hokhui; kala Pharaohna awui mang chi athumli hāngchithei, kha mi akhanala Pharaohli chi makhalatmirarthuwa.

⁹ Chieina tengkot singme china Pharaohli hānga, “Aja ina iwui khangui phaningunghaira.

¹⁰ Pharaohna nawui raobingli malungkhavātwui vang khamui kasemawui akhavā inili kashina akhavāwui narkhavai shimli sangkahai tharān,

¹¹ kakhalat ngatatei kahai mang, thangngayākha inili shimana.

¹² Chili Hebrewnao akha kashinawui rao sāda ithum ngasopamsai; inina ali kahāng tharān mi ava̱va̱na kashiman mang chiwui kakhalat khalatmi.

¹³ Kala ana inili khalatkhami chi tākam eina ungshunga, ili iwui otpamli khuisangluishita kala khamui kasemali phāshi sāhaowa.”

¹⁴ Chieina Pharaohna Josephli ahokhui ngasakta, phātopwui eina katotsisi khuishoka, kala ana morhā silaga kachon shinkhuihailaga Pharaohwui mangāli vai.

¹⁵ Pharaohna Josephli hānga, “Ili mang akha shimana, kha chi khalatmikashap mi khipākha maleithuwa; ina shai kaja nana mang akha kashā tharān chi khalatmishapa ji.”

¹⁶ Josephna Pharaohli ngahānkai, “Theikashapā chi iwuili maleimana; Pharaohwui ningkachāng Varena ngahānkāmira.”

¹⁷ Chieina Pharaohna Josephli hānga, “Yanglu, iwui mangshong I Nile kongpheili nganingsai;

¹⁸ asākakā kala nganaipat kahai mukkā shini Nilewui eina shokta khawo shokphāshai;

¹⁹ chiwui thili khangatei mukkā shini kaothethek rurārsār kahai, Egypt ngaleili ina matheilakrang kaji Nilewui eina shoka.

²⁰ Kaothethek kala rurārsār kahaibing china asākakā mukkā shini chi shaihaowa;

²¹ kha athumna shaisang kahai thili khipānakha athumna shaisanghairada matheirarmara, kaja athum kharewui thāda kakao chishona. Chieina I thuimathukhaowa.

²² Ina mangshongli theilui; kapanga khamathā māmazan shini arong akhali matheisai;

²³ kala zingshoshongwui masina phankhalangda shāt-kazanga yangfafa kahai māmazan shini shoklui,

²⁴ kala yangfafa kahai mābing china kapangabing chili mayuitahaowa. Hi ina mitrang kathemabinglila ngahānlaga khipānakha mahāngmirarthuwa.”

²⁵ Chieina Josephna Pharaohli hānga, “Pharaohwui mang chi akhamaya; Varena sāki kaji chi Pharaohli phongmihaira.”

²⁶ Asākakā mukkā shini chi kum shinina, kala kapanga māmazan shini chi kum shinina; mang chi akhamaya.

²⁷ Kaothethek kala rurārsār kahai mukkā shini kala zingshoshongwui masina phankhalangda shāt-kazanga yangfafa kahai māmazan shini chi zāt kasak kum shini papama.

²⁸ Ina Pharaohli hāngkahai thāda, Varena sāki kaji chi Pharaohli chitheihaira.

²⁹ Egyptwui ngalei saikorali mavātlak kaji kum shini rāra,

³⁰ kha chiwui thili kum shini zāt kasak rāra, kala Egypt ngaleili makhavāt kum chi malaihaora; zāt kasak china ngalei saikorali vāshungra,

³¹ chiwui thili zāt kasak rāki kaji chi marnahaida khalei kashāng kaho matheilakmara.

³² Pharaohli mang khani ngashomda kashiman hi Varena sālakra kaji kala thaklāk eina rāngasakhaora kajina.

³³ “Chiwui vang Pharaohna Egyptwui ngalei saikorali yangmi khavai ningkhamazing kala thangkhamei mi akha kapangkhuiranu.

³⁴ Pharaohna ngalei hiwui kashinabing phāsangda makhavāt kum shini Egypt ngaleiwui alungli samkaphang akhum kaphangā chi khuiranu.

³⁵ Kala rārāda khalei kaphā kum hili samkaphang saikora athumna kazipranu, kala māthei chi keinung saikorali Pharaohwui azingli kaziphairanu.

³⁶ Kashakazā chi kum shini zāt kasak Egyptli rāki kajiwui vang ngarānsangki kajina, chieina ngaleiwui mibingna zāt kasakwui eina mathimara.”

Josephna Egypt Ngaleiwui Rammunga Khangasā

³⁷ Hāngkahai chi Pharaoh kala awui raobingna phālakhairada theikhui.

³⁸ Kala Pharaohna awui raobingli hānga, “Varewui manglāna ngasokhami hikathā mi hili samphangrala?”

³⁹ Chiwui vang Pharaohna Josephli hānga, “Varena nali saikora hi chitheihaokada, nakathā, ningkhamazing kala thangkhamei maleiluimara;

⁴⁰ nana iwui shimwui akhavā sāra, kala iwui mi kachiva̱na nawui kakaso athishurda sāra; wungpamkhong himāngna ina nali reimeira.”

⁴¹ Kala Pharaohahna Josephli hānga, “Yanglu, Egypt ngalei saikorawuitungli ina nali chipamhaira.”

⁴² Chiwui thili Pharaohna apāngwui eina mahor namkhavai khutop chi khuida Josephwui pāngli sangmi, kala khamanaka khamathā kachon ngavaimida awui akahungli sināchā ngachāmi;

⁴³ kala awui thichangli kazang siguigari tongngasakta, “Khuktida khayashilu” da athumna vaowa. Chithāda sāda Egyptwui ngalei saikorawuitungli ali chipama.

⁴⁴ Chili lāngda Pharaohna Josephli hānga, “I Pharaohna, kha nawui khamayā mazangla Egyptwui ngaleili mi khipākha pāng, lah phei makhāngpaimara.”

⁴⁵ Kala Pharaohna Josephwui ming Zaphenath-paneah phokmi; kala Josephli Onwui pāngmon Potipherawui naongalāva̱ Asenathli ngakum ngasaka. Chiwui thili Josephna Egypt ngalei saikora yaovai.

⁴⁶ Josephna Egypt awunga Pharaohwui otram ngatha̱kaphok tharān a kum thumra kāshunghairasai. Kala Josephna Pharaohwui eina shokta Egypt ngalei saikorali vai.

⁴⁷ Zingkum kapha shiniwui alungli heiun sorngasaida unga,

⁴⁸ kala ana Egypt ngaleili kum shiniwui alungli sorngasaida heiun khaung chitharān keinungli kashakazā kazipsanga; ana keinung kachiva̱wui kuimareida khalei luiramwui eina kashakazā kaziphai.

⁴⁹ Hithāda sāda Josephna mā kachungkha kazipkhui, kongwui situiyakkha kazipkhui, chungnāhaida khaonla maonrarthuwa.

⁵⁰ Zāt kasak marāranglakha On pāngmon Potipherawui naongalāva̱ Asenathna Josephli mayarnao khani pharāmihairasai.

⁵¹ Josephwui naochizai naomayarali Manasseh hoi, kaja ana hānga, “Kaja iwui sipkasā kala ishāvāwui shimkhur saikora Varena malai ngasakhaowa.”

⁵² Kakhaneli Ephraim hoi, “Kaja kakhanang ramli Varena ili athei mathei ngasaka.”

⁵³ Egypt ngaleili heiun khaung kum shini chi peihaowa;

⁵⁴ kala Josephna hāngkahai thāda zāt kasak kum shini rāshunghaowa. Apam kachiva̱li zāt sakhaowa; kha Egypt ngalei kachiva̱li kashakazā samphanga.

⁵⁵ Egypt ngaleili kachām chitharān mibingna Pharaohli zāt rapoi; kala Pharaohna Egyptnaobingli hānga, “Josephli vālu, ana nathumli kahāng chi sālu.”

⁵⁶ Chieina zāt kasak chi apam kachida vāshung kahai tharān, Josephna zātchum saikora sholaga Egyptnaobingli yorsanga; kaja Egyptli zāt kasak kateokhamāng maningmana.

⁵⁷ Chili lāngda okathui saikorawui eina Egyptli Josephwuili mā lokhavai rai, kaja okathui saikorali zāt sakhaowa.