HAOKAPHOK 39 - Kathara Bible (BSI)

Joseph eina Potiphar Preiva̱

¹ Ara Josephli Egyptli khuitāhaowa, kala Pharaohwui otshina raimi akhavāwui kathāna Egyptpa Potipharna Josephli Ishmaelbingwui eina lokhui.

² Prohona Josephli ngasomisai, kala ana akhavāwui shimli pamda otsak kachiva̱ kaphāmāng sāmi,

³ Josephli Prohona ali ngasomidalei, kala awui kasā saikorali Prohona reisang ngasakta lei da akhavā china theihaowa.

⁴ Chieina Josephna awui mangāli ngahānkhangai samphangda ali otram ngatha̱sai; kala ali awui shim kala awui khalalei ot saikorawui kashina sāngasaka.

⁵ Awui shimli awui thongthāng kala awui khalalei saikorawui kashina Josephli sāngasakthangwui eina thuida awui mangā eina Egyptpawui shimkhurli Prohona somi; Prohowui sokhami chi awui shimlila luilila khalei saikorali tāshungsera.

⁶ Chithāda sāda awui khalei saikora Josephwui pāngli horsangmihaida phākashak phākazā maningla Potipharna khikha maphaningluimana. Joseph yarkhokana kala azak mathālaka.

⁷ Atam khaleilaga awui akhavāpreiva̱na Josephli ningchanghaowa; kala, “Ngasopisa” da hānga,

⁸ Kha ana mamayāmada akhavāwui preiva̱li hānga, “Yanglu, I khaleiwui vang iwui akhavāna awui shimli khalei otbingwui vang khikha maphaningluimana, kala ot kachiva̱ ana iwui pāngli horsangmiserhaira;

⁹ shim hili ana ili mareimeimana; na maningla ot khangatei ili mahorsangkhami maleimana, kaja na awui preiva̱na; chithakha hiyākha kahaka makaphā ot sāda ina kathāda Varewui mangāli morei sapairakhala?”

¹⁰ Thangkachida ngasopi khavai kala ngasopam khavai hānglala ana manganāsanglakmana.

¹¹ Kha thangkha, ana awui ot sākhavai shimli kazang tharān mi khangatei khipākha maleikasā eina,

¹² preiva̱̱ china awui kachonli ngakhunkhuida “Ngasopisa” da hānga. Kha ana kachon chi horhaiphungda yāmshokhaowa.

¹³ Awui kachon preiva̱wui pāngli horhaiphungda shimwui eina yāmshok kahai chi theilaga,

¹⁴ preiva̱ china shim chili khalei mibingli hokhuida hānga, “Yanglu, ithumli chipat khavai igaharana Hebrewnao akha khuiunghaili! Ana ili ngasopikida kazang eina ina akhon panglāk eina vaowa;

¹⁵ kala ina panglāk eina khavaokhon kashā eina, ana awui kachon iwui ngalemli horhaiphungda shimlungwui eina yāmshokhaowa.”

¹⁶ Agahara maungranglakha eina tangda kachon chi awui pāngli hai,

¹⁷ kala alila tui chi tākam eina hānga, “Nana khuikhaung Hebrew rao china ili chipat khavai zanga;

¹⁸ kha ina akhon chuida panglāk eina khavao eina awui kachon horhaiphungda shimlungwui eina yāmshokhaowa.”

¹⁹ “Nawui rao china ili hithāda sai” da preiva̱na kahāng chi awui akhavāna kashā tharān a malungvāthaowa,

²⁰ kala Josephwui akhavāna ali tukkhuida awungana narkahaibingli sangkhavai phātopli sanghaowa.

²¹ Kha Prohona Josephli ngasomida makhangachei leikashi chitheimi, kala phātop kashina akhavā chili Josephli ngahānngai ngasaka.

²² Phātop kashina akhavā china phātopli khaleibing saikora chi Josephwui pāngli horsangmi; chili sākharān saikora Josephna sāsera;

²³ Josephwui pāngli sangmi kahai saikora chi phātop kashina china khikha maphaningluimana, kaja Prohona Josephli ngasomisai; kala ana kasāsā saikora Prohona reisangngasaka.