HAOKAPHOK 38 - Kathara Bible (BSI)

Judah eina Tamar

¹ Atam chitharān Judahna achinā ngarāwui eina thuihaida Hirah kaho Adullamwui mi akhali vai.

² Chili Judahna Canaan ngalā akha Shua hoda chili asamphangda ani ngakuma,

³ ana nao vaida mayarnao akha pharai, kala awui aming Er hoi.

⁴ Ana nao vailuishitta mayarnao akha pharālui, kala awui aming Onan hoi.

⁵ Latluida nao mayarnao akha pharai, kala awui aming Shelah hoi. Ali kapharā tharān Chezibli pamsai.

⁶ Judahna awui nao kharara Erli ngalā khuimi, chipava̱wui aming Tamar hoi.

⁷ Kha Judahwui nao kharara Er hi Prohowui mangāli makaphā mi ngasāhaoda; Prohona ali shaothathaowa.

⁸ Chiwui thili Judahna Onanli hānga, “Nachināwui preiva̱li zangngasopilu, kala achināna sāmiran chi sāda nachināwui naotun leingasaklu.”

⁹ Kha Onanna nao chi awui mangasāmara kaji theida achinā preiva̱li ngasopi kachida achināwui nao malei khavai da ana pha̱ra̱ chi ngaleili tāngasakhaowa.

¹⁰ Ana kasā otsak china Proholi ningyāng maungngasakthuda alila shaothathaowa.

¹¹ Chiwui thili Judahna arihāva̱ Tamarli hānga, “Inaomayara Shelah mararranglakha eina tangda rameiva̱ sāda navāwui shimli pamsālu”— kaja achinā kateibing thāda ala thihaipaishina da ngacheehaowa. Chiwui vang Tamarna ungda avāva̱wui shimli pamhaowa.

¹² Khaleilaga Judahwui preiva̱, Shuawui naongalāva̱ thihaowa; Judahna wuk-kakhanang vankahaiwui thili awui ngasotnao Adullamwui Hirahli ngasoda Timnahli awui yaohah kachichapbingwuili shanga.

¹³ Tamarli, “Nawo Timnahli awui yao ahah kachichāp shangrārādalei” da kahāng eina,

¹⁴ awui ra̱mei kachon khuishokhailaga kuirunkhui, laga khangatei sāri shaksālaga Timnahwui shongfali khalei, Enaim zangkhavaili vāpama; Shelah rarhaira kaji ana thei kha ali mangakum ngasakthuwa.

¹⁵ Judahna ali kathei tharān, kuirunlaga leisahaoda khayorva̱ sha̱naonada phaninghaowa.

¹⁶ Judahna shongfa ayar chili vālaga ali, “Ralu, ini ngasopisa,” da ahānga, kaja arihāva̱na kaji matheithuwa. Ana hānga, “Ili ngasokapiman nana khi mirakhala?”

¹⁷ Ana ngahānkai, “Ina yao ashangva̱wui eina yaonao akha chihorāra.” Chieina ana hānga, “Nana yaonao chi machihorāranglakha khangashit akha sālu.”

¹⁸ Ana hānga, “Khi ngashitlu jikhala?” Ana ngahānkai, “Nawui mahor namkhavai khutop, shanneira̱, kala nawui khāmshui chi hamlu.” Chieina ana mihaowa kala ngasopida nao vaihaowa.

¹⁹ Chiwui thili arihāva̱ china ngakarthuida unghaowa, kala awui kuirun khavai chi khuishokhailaga awui rameiva̱ sāri chi ngavaikhuia.

²⁰ Judahna awui hamkahai otbing chi hankhui khavai Adullampali yaonao chi chihokhavā tharān sha̱naopava̱ chili masamphangthuwa.

²¹ Chieina ana apam chiwui mibingli ngahāna, “Enaim shongfapheili pamkasā khayorva̱̱ chi kali leikhala?” Athumna hānga, “Hili khayor sha̱nao maleisāmana.”

²² Chieina ana Judahli unghānga, “Sha̱naopava̱ chi masamphangmana; kala chiwui mibingnala, ‘Hili khayora sha̱nao maleimana.’ jihaowa.”

²³ Chieina Judahna ngahānkai, “Otbing chi a jihaoranu, ina nali yaonao chihovālaga nana ali masamphangmana kaji mibingna shālaga Inili mana̱shihaipaishina.”

²⁴ Kachāng kathumsha̱khawui thili “Narihāva̱ Tamar khayorva̱ sāda nao vaihaira” kaji Judahli hānghaowa. Chieina Judahna, “Ali ayarli shimenshoklu, kala mei eina thotthathaolu.” da hānga.

²⁵ Ali ayarli shimenkashok tharān Tamarna awova̱li pao chihovai, “Ili nao kashivaia chi otbing hiwui akhavā chinana,” Kala ana hānga, “Khutop, shānneira̱, kala khāmshui hi khipāwuikhala da machutkhuimilu.”

²⁶ Chieina Judahna otbing chi awuina da mayai kala hānga, “Ana ili mashungmei, ali inaomayara Shelahli makhui khangasakwui vangna.” Chiwui thili Judahna mangasopiluimana.

²⁷ Kapharā atam khaung eina naopamli nao khani ngashirsai.

²⁸ Naokhara̱ chitharān akhawui pāng tāpura; naosak kasingpava̱na kazaira̱ kahung eina pāng chili masa̱mihailaga hānga, “Hipa hi shok-kharena.”

²⁹ Kha ana awui pāng ngalatlui kaji tharan, yanglu, agato shokrāsai; chieina naosak kasingpava̱na hānga, “Nana kathāda nakhalatta sakhaikashokkhala?” Chiwui vang awui ming Perez hoi.

³⁰ Chiwui thili pāngli kazaira̱ kahung masa̱laga achinā shokrāsai; kala awui ming Zerah hoi.