HAOKAPHOK 37 - Kathara Bible (BSI)

Joseph eina Achinā ngarā

¹ Avāva̱ Jacobna kha̱mi thada somkasā Canaan ngaleili Jacobna apāna.

² Hi Jacobshi shimkhurwui thotchānna. Josephna kum tharāda shini kāshunguda achinā ngarāli ngasoda yao homa; avāva̱wui apreiva̱̱ Bilhah eina Zilpahwui naomayarabingli ngachona; kala Josephna achinā ngarāwui makaphā chanpao avāva̱li unghānga.

³ Asārlam kapharāwui vang Israelna Josephli leishimeithuiya kala phahon katum apāng kasang akha khopmi.

⁴ Kha awui amangarāli lāngda avāva̱na Josephli leishimei kaji kathei tharān ali yangkharinghaowa kala ali mathāda mangazekngaimana.

⁵ Chitharān Josephna mang akha shimana, kala ana chi achinā ngarāli kahāng eina athumna ali mataimeida yangkharinghaowa.

⁶ Ana athumli hānga, “Ina mang kashiman hi nganāmilu:

⁷ ithumna luili māmazān atansai, kashuirak eina iwui māmazān chi thuinganingshinghaowa; kala yanglu, nathumwui mamazānbing china kuimareida rākaziplaga iwui māmazān chili rākhoruma.”

⁸ Achinangarāna ali hānga, “Nana ithumli mungra kajila? Maningakha ithumli nana singyuira kajikhala?” Athumna awui mang kala tuimatui chiwui vang yangkharingmeiluihaowa.

⁹ Chiwui thili ali mang khangatei akha shimanda chi achinā ngarāli hānglui, “Yanglu, ili mang akha shimanluiya; kaja zimik, kachāng, kala sirā tharāda akhana ili khorumsai.”

¹⁰ Kha ana avāva̱ kala achināngarāli kahāng tharān avāva̱na khararda hānga, “Nali kashiman mang hi khimangkhala? Nashava̱ ini kala nachinābingna nawui mangāli ngaleili ngakhumshāmsangda nali khayāshiserra kajila?”

¹¹ Chieina achinā ngarāna ali yuishihaowa, kha mang chi avāva̱na awui ningli haihai.

Joseph Egyptli Yorsangkahai

¹² Chitharān achinā ngarā Shechem ngalemli avāva̱wui sei ahompamhaowa.

¹³ Israelna Josephli hānga, “Nachinā ngarā Shechemli sei homda khalei maningmala? Ralu, ina nali athumwuili chihovara.” Ana hānga, “I hili leili.”

¹⁴ Chieina avāva̱na hānga, “Vālaga nachinā ngarā kala sei ashangva̱ kathalikhala kaji ili pao unghāngluishitlu.” Chieina ali Hebron tampākwui eina chihoda ana Shechemli vāshunga.

¹⁵ Ana luili ma̱zatlakha mi akhana ali samphangda ngahāna, “Na khi phāzatlikhala?”

¹⁶ “I ichinā ngarāli phākazatna, athum sei kali hompamlikhala, ili kahāngmilu.” da ana hānga,

¹⁷ Mi china hānga, “Athum thuihaira, kaja athumna ‘Dothanli vausa’ da kahāng ina shai.” Chieina achinā ngarāwui thi shurvāda Josephna athumli Dothanli samphanga.

¹⁸ Athumna ali katāvawui eina thei, kala athumli marānganairanglakha ali sāthat khavai mithit khalen sāhaowa.

¹⁹ Athum akha eina akha ngazek ngaroka, “Mang kashimanpa chi rārāli.

²⁰ Rālu, ithumna ali shaothathailaga khorchop akhali horsanghaosa, laga ali ramsāna shaikahaina jihaosa, awui mang chi khi shoknikhala yangkhuisa.”

²¹ Kha Reubenna tui chi kashā chitharān ana athumwui pāng eina kankhui khavai hānga, “Ithumna awui manglā makhuiasa.”

²² Reubenna athumli hānga, “Ashee matā ngasaklu; lamhāng hiwui khorchop akhali horsanghaolu, kha awuitungli pāng masāza̱lu”; kaja athumwui pāng eina kankhuida ali avāva̱wuili khuiungmiluira da phaningsai.

²³ Chieina Josephna awui achinā ngarāwuili vākashung tharān, athumna awui phahon katuma pāngkasānga chi raimihailaga

²⁴ ali khorchop akhali horsanghaowa. Khorchop chi tara̱ mazangla katheng eina leisai.

²⁵ Chiwui thili athumna phazā khavai pamzanga; athumna yangkhavā chitharān Gilead eina Ishmaelnaobing gum, khaneithei, myrrh phungda Egyptli phungtākida athumwui ut thānphungda rārāsai.

²⁶ Chieina Judahna achināngarāli hānga, “Ithumna ithumwui achināli sāthatlaga awui ashee thumhaida khi kānkhanā leikhala?

²⁷ Yanglu, ali Ishmaelnaobingli yorsanghaosa, ithumwui pāng masāza̱asa, kaja a hi ithumwui achinā kala ithumwui asālaka.” Achinā ngarāna awui tui khui.

²⁸ Midiawui leihkhalonbingna athumli rākakān eina athumna khorjopwui eina Josephli khāngshokkhuilaga Ishmaelnaobingli lupāsā shekel maga̱ eina yorhaowa; kala athumna Josephli Egyptshong khuivāhaowa.

²⁹ Reubenna khorchop chili ungkhayang chitharān Joseph maleikasa eina awui kachon serkhākta,

³⁰ achināngarāwuili latungda hānga, “Nao chi maleithura, I kathāurakhala?”

³¹ Chiwui thili athumna Josephwui phahon chi khuilaga me sāthatlaga chiwui asheeli rura;

³² kala athumna phahon katuma apāng kasānga chi khuiphungda avāva̱li khuiungchitheida hānga, “Hi ithumli leisai; yanglu hi nanaowui phahonka maningmakhala?”

³³ Avāva̱na machuthaoda hānga, “Hi inaomayarawui phahonna; ramsāna shaikahaira; Josephli serkazamlakhaira.”

³⁴ Chieina Jacobna awui kachon serkhaklaga borashi shanneilaga zimiksho sha̱rākhathang Josephwui vang chapngachai.

³⁵ Anaomayara kala naongalāva̱ ngarāna ali suikaphanep chi mamayāmada hānga “Maningmana, I sifada Kathewui ramli inaowuili vaura.” Chithāda avāva̱na awui vang chapa.

³⁶ Lākhashong Midianaobing Josephli Egypt ngaleili Pharaohwui raimi akhavā Potiphar kaho chili yorsanghaowa.