HAOKAPHOK 35 - Kathara Bible (BSI)

Varena Jacobli Bethel Apamli Sokhami

¹ Varena Jacobli hānga, “Ngakarthuida Bethelli shangda chili apamulu; kala nana nashamei Esauwui eina yāmzatlakha nali rākachithei Vare chili hanphut akha sālu.”

² Chiwui vang Jacobna awui shimkhur kala ali khangasobing saikorali hānga, “Nathumwui alungli khalei ayar mibingwui varebing horserhaolu, kala nathum khalatta tharmathengda kashankachon shinhaolu;

³ chiwui thili ithumna Bethelli shangda ina chotchānglakha ili ngahānkākhame, kala iwui kazazatli ngasokhame Vare chili ina hanphut akha sāra.”

⁴ Chieina athumwui pāngli khalei varebing kala khanāli sinā-unra̱ ngathetkasā saikora Jacobli mihaowa kala Jacobna Shechem nganaili khalei shirimthingpheili thumhaowa.

⁵ Athumna zatmamānlakha, athumli kuimareida khalei keinungbingwuitungli Varewui eina khangachee akha tāshunghaowa, chiwui vang Jacobwui naomayara ngarāli mangahomthuwa.

⁶ Kala Jacobla ashi katonga Canaanli khalei Luzli (chiya Bethel) vāshunga,

⁷ chili ana hanphut akha sāda apam chili El-Bethel hoi, kaja ashameiwui eina ana yāmzatlakha chili Varena rāchithei.

⁸ Rebekahwui nurse Deborah apam chili thihaowa, kala Bethelwui azingshong shirimthing akhawui azingli chifahaowa; chiwui vang apam chili Allon-bacuth hoi.

⁹ Paddan-aramwui eina khaung tharān Varena Jacobli rāsamphangluishita, kala somi.

¹⁰ Varena ali hānga, “Nawui ming Jacobna, kha ara Jacob maholuimara, kha Israel hi nawui ming sāra” chiwui vang awui aming Israel hoi.

¹¹ Kala Varena ali hānga, “I Pangshapa Varena; athei matheida mataisanglu; yur kahaka, mi ashangva̱ nawui eina shokra, kala awungabing nawui eina shokra.

¹² Abraham eina Isaacli khami ram chi ina nali mira, kala nawui thili ram chi nawui ara̱-azāli ina mira.”

¹³ Chiwui thili ali ngazek khavai pam chiwui eina Varena kāhaowa.

¹⁴ Chān ngazek khavai pam chili Jacobna ngalung akha shunhaida ngalungtung chili ra̱shakla thaola heirora.

¹⁵ Chiwui vang Vareli chan ngazek khavai apam chiwui aming Jacobna Bethel phokmi.

Rachel Kathi

¹⁶ Chiwui thili athumna Bethelwui eina zatmamāna; athumna Ephrathli mavāshungnāla, katāda leilakha, Rachel nao ra̱haoda chotlakhaowa.

¹⁷ Ana chotlak eina leilakha naosak kasingva̱ china hānga, “Mangangalu, na mayarnao akha pharāluira.”

¹⁸ Ana thivānanai (kaja a thihaowa) ana nao chiwui aming Ben-oni phokmi; kha avāva̱na awui ming Benjamin hoi.

¹⁹ Chithāda sāda Rachel thihaowa, kala ali Ephrathwui (chiya, Bethlehem) shongfali chifahaowa,

²⁰ kala Jacobna awui chikhurtungli pakra̱ akha shunhai; aja eina tangda khalei ngalung shunkahai chi Rachelwui chikhurna.

²¹ Israelna zatvāmamānda Eder kānda apama.

²² Israelna ram chili pamlakha Reubenna avāva̱wui angashirva Bilhahli ngasopihaowa; kala chi Israelna shāhaowa. Jacobwui nao mayarnao tharāda khanina.

Jacobwui Naomayara ngarā

²³ Leahwui naomayarabing: Reuben (Jacobwui naochizai), Simeon, Levi, Judah, Issachar, kala Zebulun.

²⁴ Rachelwui naomayarabing: Joseph eina Benjamin.

²⁵ Rachelwui raopava̱ Bihahna kapharā: Dan eina Naphtali.

²⁶ Leahwui raopava̱ Zilpahna kapharā: Gad eina Asher. Hibing hi Paddan-aramli leilakha Jacobna pharākakhui naomayara ngarāna.

Isaac Kathi

²⁷ Abraham eina Isaacna pamkasā Mamre lah Kiriath-arba (chiya, Hebron)li Jacobna avāva̱ Isaacli ungsamphanga.

²⁸ Hitharan Isaacwui kum shākha hangchishat kāhairasai.

²⁹ Kala Isaacna khanaowa khaksui ngachanghaowa; ana rarlak eina thi, kala awui awo-ayibingwuili vāhaowa; kala anaomayara Esau eina Jacobna ali chifahaowa.