HAOKAPHOK 30 - Kathara Bible (BSI)

¹ Rachelna nao mapharāthuda achonva̱li yuishihaowa; chieina Jacobli hānga, “Ili nao milu, maningakha I thihaora!”

² Jacobna Rachelli malungvāthaoda hānga, “Ina Varewui pamli leida nawui naopamwui athei shungmikahaila?”

³ Chieina preiva̱na hānga, “Iwui rao Bilhah hili leili, ali ngasopida ana iwui vang nao pharāmiranu, chieina awui mangā eina ina nao leira.”

⁴ Chieina Rachelna rao Bilhahli apreiva̱ sākhavai mida Jacobna ngasopihaowa.

⁵ Bilhahna nao vaida mayarnao akha Jacobli pharāmi.

⁶ Chieina Rachelna hānga, “Varena mashungrik eina sāmihaira, kala iwui khon shāmida ili mayarnao akha mihaira”; chiwui vang aming Dan phokmi.

⁷ Rachelwui rao Bilhahna nao vailuishitta Jacobli mayarnao kakhane pharāmi.

⁸ Chieina Rachelna hānga, “Ishachonli panglāk eina ngaheida ina yuihaira”; chieina naowui ming Naphtali hoi.

⁹ Leahna naothei kuphaira da kathei tharān awui rao Zilpahli apreiva̱ sākhavai Jacobli mi.

¹⁰ Chiwui thili Leahwui rao Zilpahna Jacobli mayarnao akha pharāmi.

¹¹ Kala Leahna hānga, “Ka̱lā khamahai!” Chiwui vang aming Gad phokmi.

¹² Leahwui rao Zilpahna mayarnao kakhane pharāluishita.

¹³ Kala Leahna hānga, “I ringkaphava̱na! Kaja preinaobingna ili ringkaphava̱ hora”; chiwui vang aming Asher phokmi.

¹⁴ Kehu kahāt atamli Reubenna luili mandrake (ari-arai sākhavai thingnahyur) samphangda ava̱va̱ Leahli khuiungmi. Chieina Rachelna Leahli hānga, “Nanaomayarawui mandrake chi ilila khamilu” da poi.

¹⁵ Kha ana hānga, “Nana igahara ngapaithui kahai chi kapai otnada khuila? Inaowui mandrake hila khuiluiga kajila?” Rachelna hānga, “Chithakha nanaomayarawui mandrakewui vang aja ngayā ana nali ngasopipaira.”

¹⁶ Ngazinshong Jacob luiwui eina hankhaung tharān Leahna shoksamphangda hānga, “Na ili ngasopiphalungra, kaja inaomayarawui mandrake eina nali masākhuihaira.” Chiwui vang eina chithang ngayā ali ngasopi.

¹⁷ Varena Leahli phaningmida nao vaihaowa, kala Jacobli naomayara kaphangā pharāmi.

¹⁸ Leahna hānga, “Ina iwui rao igaharali khamiwui vang Varena iwui sāman mihaira”; chiwui vang aming Issachar phokmi.

¹⁹ Leahna nao vailuishita kala mayarnao katharuka pharāmi.

²⁰ Chieina Leahna hānga, “Varena ili manho mathālak eina mihaira, ara igaharana ili khayāshihaora, kaja ali ina mayarnao tharuk pharāmihaira”; chiwui vang aming Zebulun phokmi.

²¹ Chiwui thili sha̱nao akha pharai, kala aming Dinah phokmi.

²² Chiwui thili Varena Rachelli phaningungda shākhamiwui vang awui naopam shomi.

²³ Ana nao vaida mayarnao akha pharai, chieina ana hānga, “Varena iwui sui khuithuimihaira”;

²⁴ kala ana aming Joseph phokmida hānga, “Varena ili mayarnao akha ngarumsangmiluiranu.”

²⁵ Rachelna Josephli pharā kahaiwui thili Jacobna Labanli hānga, “Iwui shim kala iwui ngaleili ungkhavai chihomilu.

²⁶ Ina otram ngatha̱kakhuiya ipreiva̱ ngarā kala naongarā ili mida zatngasakhaolu; kaja ina nali otram ngatha̱khami nana theihaira.”

²⁷ Kha Labanna ali hānga, “Ina hāngkhangai akha lei, kaja nawui mangā eina Prohona ili somihaira;

²⁸ nawui pokhangai chotman chi polu, ina nali mira.”

²⁹ Jacobna ali hānga, “Ina nali kathāda otram ngatha̱mihaira, kala nawui sha̱kei ina homda kayākha mataisanghaira kaji namāngna thei.

³⁰ Kaja I marāranglakha kateokhamāng leisāmaya, kha ara sorngasaihaira; iwui otsak kachida Varena nali somi. Kha iwui shimkhurwui vangla katharān ngarangsangrakhala?”

³¹ Labanna hānga, “Nali khi milu jikhala?” Jacobna hānga, “Ili khikhala mamilakmara; nana iwui vang chi sāmiakha I nawui yao homluishitra:

³² ili aja nawui sha̱kei ashangva̱ katonga yangvā ngasaklaga khākhanāng kala chukpom yaobing kala kazika yaonaobing kala khākhanāng mebing ngateida khaishok ngasakmilu; laga chikathabing chi iwui chotman sāra.

³³ Chithāda sāda nana iwui chotman mikhavai rākhayang chitharān ina ning kathar eina kasā nana theihaora. Mewui ngachaili makhākhanang kala makachuk kala yaowui ngachaili makazik iwuili zangsaakha nawui leekakhuina jira.”

³⁴ Labanna hānga, “Phālakhaira, nana kahāng chitharanu.”

³⁵ Kha chithang Labanna khākhanang kala chukpom mevābing kala meva̱bing, kala kachar kakā kachiva̱, kazika yaonao kachiva̱ ngatei ngasakta, anaomayarali homngasaka;

³⁶ kala aniwui matakli kathumthangwui shongzā tāda vahai ngasakhaowa; Labanwui khangatei ashang chi Jacobna hompama.

³⁷ Chiwui thili Jacobna poplar, almond, kala khamatek thingphāng khuilaga thingkor hemhaida alungwui kachar chi theingasaka.

³⁸ Hemkakhai thingbing chi sha̱keibingwui vang rungmi kahai tara̱lungli sangmihai. Sha̱keibingna tara̱ ungkhamang tharān ngalāthaokada,

³⁹ thing chi katheiwui vang anao khānānglaga, kala chukpomlaga pharāhaowa.

⁴⁰ Kala Jacobna yaonaobing chi ngatei ngasaka, kala yaobingli akhān kakhānangwuishong ngareivā ngasaka, kala kazikbing Labanwuishong ngareivā ngasakta awui ngateida homa; kala Labanwuili ngarumda masanghaimana.

⁴¹ Pangkhamei asā kaphābingna khangalāt tharān yaobingna theikhavai mangkhavai chili khākhanang thingbing chi Jacobna sangmihai,

⁴² kha asā makaphābing chili masangmihaimana; chithāda Labanwuina ngazanmei kala Jacobwuina pangmei.

⁴³ Chithāda sāda mipā chi shānglakhaowa, kala sha̱keila chunglakhaowa; rao sha̱nao eina mayarnao, ut kala gadhā kachungkha leihaowa.