HAOKAPHOK 29 - Kathara Bible (BSI)

Jacobna Labanwui Shimli Vākazang

¹ Jacobna awui shongzā zatmamānda zingshoshong khalei mibingwui ngaleili vāshunga.

² Ana ngashānkhavā tharan, luili ra̱khong akha thei, kala yanglu, chiwui ngalemli yao ashangva̱ kathum khalei chi thei; kaja ra̱khong chiwui eina yaobing chili tara̱ sokmi. Ra̱khong chiwui lungsham chi kahakva̱na,

³ kala yao ashangva̱ saikora chili kazipkhui kahai tharan yao kahombingna ra̱khongwui lungsham chi khalangshoklaga yaobingli mimanga, kala mimang kahai thili lungsham chi shingluishita.

⁴ Jacobna athumli hānga, “Ichinā ngarā, nathum kachiwui eina kharākhala?” Athumna hānga, “Ithum Haranwui einana.”

⁵ Ana athumli, “Nathum Nahorwui naomayara Labanli matheikhala?” da khangahān eina “Theiya” da athumna hānga.

⁶ Ana athumli, “A ringphāda leila?” da ngahānlui. Athumna hānga, “Ringphāda lei; yanglu, awui naongalāva̱ Rachel yaobingli ngasoda ungrārāli!”

⁷ Ana, “Yanglu, arui ngashunlungna, seihom-un makāranga, tara̱ shimanlaga kaphāchizātfalu” da hānga.

⁸ Kha athumna, “Yao ashangva̱ saikora chi kazipkhuida ra̱khongwui lungsham hi makhalang shokakha tara̱ mashimanpaimana.” da ngahānkai.

⁹ Ana athumli ngazek mahunglakha Rachelna avāva̱wui yaobing chili homrārāsai; kaja ana chi kahomna.

¹⁰ Chieina ava̱va̱wui apa Labanwui naongalāva̱ Rachelli kala awova̱ Labanwui yaobingli kathei tharān, Jacobna vāda ra̱khongwui lungsham chi khalangshokmihailaga ava̱va̱wui apā Labanwui yaobingli tara̱ shimana.

¹¹ Kala Jacobna Rachelli maya̱khuida panglāk eina chapa.

¹² Kala Jacobna Rachelli a Labanwui theisāna, kala Rebekahwui naomayarana da hānga; kala ngalāva̱ china yongungda avāva̱li unghānga.

¹³ Labanna azarva̱wui nao Jacobwui pao kashā eina ali samphang khavai yongvai, kala ngavamkhuida maya̱khui, kala awui shimli thānunga. Jacobna shokkahai saikora chi Labanli hāngchithei,

¹⁴ kala Labanna ali hānga, “Kachangkhat eina na iwui ashee asāna!” Chithāda sāda ali kachāngkha ngasopama.

¹⁵ Chieina Labanna Jacobli hānga, “Na iwui theisāna kajiwui vang khalem eina otram ngatha̱pairala? Hānglu, nawui ngalāngman kayakharakhala?”

¹⁶ Chitharān Labanwui naongalāva̱ khani leisai; khararva̱li Leah kala khanganuiva̱li Rachel hoi.

¹⁷ Leahwui mik ningshāt kai, kha Rachelva asho-arep unglaka kala mathālaka.

¹⁸ Jacobna Rachelli leishihaoda hānga, “Nanao ngalāva̱ Rachelwui vang ina nali kum shini otram ngatha̱ra.”

¹⁹ Labanna hānga, “Ali mi khangateili khamiliva nali khamina phāmeikhara; ili ngasopamlu.”

²⁰ Chiwui vang Jacobna kum shini Rachelwui vang eina otram ngatha̱mi, kha ali leikashiwui vang atam kasha̱nakhamāng thāhaowa.

²¹ Chiwui thili Jacobna Labanli hānga, “Iwui atam peihaira, ipreiva̱̱ sākhavai Rachel ili mihaolu.”

²² Chieina Labanna chiwui mibingli hokhuida zātkhān akha sāmi.

²³ Kha ngazinshong Labanna anao ngalāva̱ Leahli Jacobwuili thānzangmida Jacobna ngasopihaowa.

²⁴ (Leahwui rao sākhavai Labanna awui rao sha̱nao Zipah kahova chi mi).

²⁵ Kha ngathorshong, yanglu, Leah sāsāhaowa; chiwui vang Jacobna Labanli hānga, “Nana ili khi kasākhala? Ina Rachelwui vang nali otram mangatha̱mala? Chithakha khiwui vang nana ili minamkhala?”

²⁶ Labanna Jacobli hānga, “Khararva̱ mafathuiranglakha paishova̱ kathui iramwui khangachā maningmana.

²⁷ Haptā hi peingasaklu, kala nana ili kum shini otram ngatha̱miluiakha akhapava̱la mira.”

²⁸ Jacobna mayāda haptā chi kapei eina Rachelli preiva̱̱ sākhavai Jacobli mihaowa.

²⁹ (Labanna awui rao sha̱nao Bilhah anao ngalāva̱ Rachelli mihaowa).

³⁰ Chithāda sāda Jacobna Rachellila ngasopida Leahliva Rachelli leishimeihaowa, kala Labanli Rachelwui vang kum shini otram ngatha̱luishita.

Jacobwui Nao Kapharā

³¹ Leahli maningkachāng chi theida Prohona Leahwui naopam shomihaowa, kha Rachelva nao shumhaowa.

³² Leahna nao vaida naomayara akha pharai, kala aming Reuben hoi; kaja ana hānga, “Khikhalajila Prohona iwui kakhanang yangkhamiwui vang makahatlakla igaharana ara ili leishihaora.”

³³ Kala Leahna nao akha vailuishitta naomayara akha pharai, kala hānga, “Khikhalajila ili maleikashi hi Prohona theimida naomayara akha miluihaira;” kala awui ming Simeon phokmi.

³⁴ Latluida nao vailuishitta naomayara akha pharai, kala ana hānga, “Ara ina mayarnao kathum pharāhaira, mashoila igaharana ili yangphalungra”; chiwui vang awui ming Levi hoi.

³⁵ Ana nao vailuishitta mayarnao akha pharai, kala hānga, “Ajawui hili ina Proholi sochikatra;” chiwui vang awui ming Judah hoi, chiwui thili nao kapharā ngasāmhaowa.