HAOKAPHOK 28 - Kathara Bible (BSI)

¹ Chiwui thili Isaacna Jacobli hokhui kala somida hānga, “Na Canaan ngalā akhalila makhuipaimara.

² Ngakarthuilu, Paddan-aramli nashāva̱wui avāva̱ Bethuelwui shimkhurli vālu; kala nava̱wui apā Labanwui naongalāva̱ akhali akhuilu.

³ Pangshap sāshapa Varena nali somiranu kala athei matheida kachungkha mataisangmida nali miyur kahakva̱ ngasā ngasakranu.

⁴ Ana nali kala nawui ara̱-azāli Abrahamwui sokhami miranu; chithāda Abrahamli Varena mikahai nana yaokazat ram chi nawui ngasāranu.”

⁵ Chithāda sāda Isaacna Jacobli shivāthaowa; kala ana Jacob eina Esauwui ava̱ Rebekahwui apā Paddan-aramli khalei Arameanpā Bethuelwui naomayara Labanwuili vāhaowa.

Esauna Ngalā Khangatei Kakhui

⁶ Isaacna Jacobli somida “Canaan sha̱naoli mangakumpaimara” da hāngchitheilaga Paddan-aramli chihovāda chiwui sha̱nao khuikhavai Jacobli chihohaira kaji,

⁷ kala Jacobna ava̱ eina avāwui kahāng nganāda Paddan-aramli vāhaira kaji hi Esauna theihaowa.

⁸ Chieina Esauna Canaan sha̱naobingna avāva̱ Isaacli maringpha ngasakmana kaji theida,

⁹ apreiva̱ ngarā leilala Abrahamwui naomayara Ishmaelwui naongalāva̱ Mahalath, Nebaiothwui azarva̱li Esauna vākhui.

Bethelli Jacobwui Mang

¹⁰ Jacobna Beer-sheba chihohailaga Haranshong vai.

¹¹ Apam akhali vākashung eina zimik tunhaoda chithang ngayā chili pisanghaowa. Apam chiwui ngalung akha khuilaga awui khumkui sāda pizanga.

¹² Kala ana mang akha shimanda ngaleiwui eina shairon akha ronkāda aton chi kazingram kāzokta shimana; kala yanglu, Varewui kazingraobingna kakākā katutung da thei!

¹³ Kala yanglu, Prohona chiwui atungli nganingda hānga, “I Proho china, nashāvā Abrahamwui Vare kala Isaacwui Varena; nana pida khalei ngalei chi na kala nawui ara̱-azāli ina mira;

¹⁴ nawui ara̱-azā okathuiwui chifayākhara, kala nathumna zingtunshong kala zingshoshong kala atungshong eina azingshong vāpeira; kala na eina nawui ara̱-azāwui eina okathuiwui shimkhur saikorali sokhami ngasā ngasakra.

¹⁵ Yanglu, ina nali ngasomidalei, kala nawui khavāpam kachiva̱li thānmira, kala ngalei hili khuiungmiluishitra; kaja ina hāngkahai chi nali masāmiranglakha eina tangda mathāhaimara.”

¹⁶ Chiwui thili Jacobna thuimathukta hānga, “Kachangkhat eina Proho apam hili lei; ina chi matheikasāna.”

¹⁷ Kala a ngacheehaoda hānga, “Hi kayākha kachihum apamkhala! Hi khangatei apam maningla Varewui shimlaka, kala kazingramwui ngaveina.”

¹⁸ Jacobna ngathorthāk ngakarthuilaga ana khumkakui ngalung chi pākra̱ sāda shunlaga chiwuitungli thao heirora.

¹⁹ Apam chili Bethel da phokmi; kha keinung chiwui aming khareli Luz hosai.

²⁰ Chieina Jacobna khangashit akha sāda hānga, “Varena ili ngasomida iwui kazazatpamli hithada thānmiakha, kala zākhavai kashakazā kala ngavai khavai kashankachon mida,

²¹ ishāvāwui shimli chingri eina hanung ngasakluiakha Proho chi iwui Vare sāra,

²² kala ina pakra̱ sāda shunkahai ngalung hi Varewui shim sāra; kala nana ili khami saikorawui akhum tharā nali mira.”