HAOKAPHOK 25 - Kathara Bible (BSI)

Keturahna Kapharā Abrahamwui Naotunbing

¹ Abrahamna Keturah kaho sha̱nao akhali khuiluiya.

² Ana Zimran, Jokshan, Medan, Midian, Ishbak kala Shuah athumli pharai.

³ Sheba eina Dedanwui avāva̱ Jokshanna. Kala Dedanwui naobinga Asshurim, Letushim, kala Le-ummimna.

⁴ Midianwui naomayara ngarā Ephah, Epher, Hanok, Abida, kala Eldaahna. Saikora hi Keturahwui naongarāsera.

⁵ Abrahamna awui khalei saikora Isaacli mi.

⁶ Kha angashirva̱wui naobingle thongthāngmāng mi; kala a ringlakha athum saikorali Isaacwui eina ngateida zingshoshong khalei ngaleivāk chihovāserhaowa.

Abraham Kathi kala Kachifa

⁷ Abrahamwui mirin zingkum shākha hangshinida phangāna.

⁸ Abrahamna rarlak eina thida awo-ayiwuili vāhaowa.

⁹ Anaomayara Isaac eina Ishmaelna ali Malch-pelahwui chikhurli chifaya, chiya Zahor Hitpawui naomayara Ephronwui lui Mamrewui zingshoshong khalei,

¹⁰ Abrahamna Hitnaowui eina lokakhui apam china. Chili apreiva̱ Sarahli ngasoda chizanhaowa.

¹¹ Abraham thikahaiwui thili Varena Isaacli somi kala Isaacna Beer-lahai-roili pamhaowa.

Ishmaelwui Ara̱-azā

¹² Sarahwui rao Egyptpava̱ Hagarna kapharā Abrahamwui nao Ishmaelwui naotunbing chi hina.

¹³ Ishmaelwui naomayara ngarāwui aming hina, Nebaiotna Ishmaelwui naochizaina; kala chiwui thili Kedar, Adbeel, Mibsam,

¹⁴ Mishma, Dumak, Massa,

¹⁵ Hadad, Tema, Jetur, Naphish kala Kedemah hina.

¹⁶ Hibing hi shang tharāda khaniwui wungnaobing kala kachichāramwui ming athishurda Ishmaelwui naomayara ngarāsera.

¹⁷ (Ishmaelwui mirin kum shākha thumrāda shini ringlaga thihaowa, kala awo ayili vāhaowa).

¹⁸ Athumna Havilah eina thuilaga Shur vāshungda, Assyriashong Egyptli yangkhangasungli pāna; chili ana saikorawuitungli mungsai.

Esau eina Jacob Kapharā

¹⁹ Hi Abrahamwui nao Isaacwui naotunbingna: Abrahamna Isaacli pharai,

²⁰ Isaacna kum hangmati kākashung eina Rebekahli ngakuma; Paddan-aramwui Aramean Bethuelwui naongalāva̱ kala Aremean Labanwui azarva̱na.

²¹ Apreiva̱ Rebekah naokashumwui vang Isaacna Proholi seihā sāmi; kala kapo chi Prohona khuisangmida apreiva̱ Rebekahna nao vaihaowa.

²² Wuklungli leilakha naobing chi nganur ngaroka; chieina Rebekahna hānga, “Hithara jiakha I khisāda okthuisākhala?” Chiwui vang ana Proholi ngahāna.

²³ Kala Prohona ali hānga, “Nawui naopamli miyur khani zangda lei, Nana kapharā miyur khani hi ngayarkhaira. Akhana akhapāli pangmeira, khararana paisholi otram ngatha̱ra.”

²⁴ Kapharā atam khaung chitharān, yanglu, naopamli nao khani zangsai.

²⁵ Khararrali hungda pharāshoka, kala aphasā tongda ahahna rommithai; chieina awui ming Esau hoi.

²⁶ Chiwui thili agato pharāshoka, kala ana Esauwui pheimaja̱li singda tai; chieina awui ming Jacob hoi. Anili kapharā tharān avāva̱ Isaacwui kum hangtharuk kāhairasai.

Esauna Awui Khararpam Khayor

²⁷ Nao khani china kharar tharān, Esauna sā khareng themlāka, kala khararli zata; kha Jacobva nuikon eina kachonshimli pama.

²⁸ Isaacna Esauli leishilāka, kaja awui ramsā kashai samphanga; kha Rebekahna Jacobli leishimei.

²⁹ Thangkha Jacobna han hangda leilakha Esau luiwui eina ungda vānhaowa.

³⁰ Kala Esauna Jacobli hānga, “I thaināhaira, han kahung hangda khalei chi khamizālu!” (chieina awui ming Edom hoi).

³¹ Jacobna hānga, “Rida nawui khararpam ili yorsangfalu.”

³² Esauna hānga, “Kathaina thiki jiura; khararpam hina iwui vang khi kānnārakhala?”

³³ Jacobna hānga, “Ili shākhi sārifalu.” Chieina ana shākhi sāda awui khararpam Jacobli yorsanghaowa.

³⁴ Chiwui thili Jacobna khamui kala hanla mida Esauna phāshak-phazālaga thuihaowa. Chithāda sāda Esauna awui khararpam yorzāhaowa.