HAGGAI 2 - Kathara Bible (BSI)

Kadhara Khorumshimwui Tekkhamatei

¹ Darius awungana mungda zingkum kakhane, kachāng kashinewui zimiksho maga̱da kharethang Prohowui tui chi marān Haggaiwui eina samphanga,

² Ara tui hi She-alti-elwui naomayara Judahwui khamunga Zerubbabel, Jehozadakwui naomayara Joshua kala nganingshing kahaiya saikorali hānglu, kaja,

³ “Nathumwui ngachaili shim hiwui kharewui tekhamatei kathei khipā tailikhala? Ara nathumna kathāda theili? Nathumwui mikyanli khikha makhaninga mathāmala?

⁴ Chithālala ara malung pinglu, O Zerubbabel, da Prohona hānga; malung pinglu, O Jehozadakwui naomayara pāngmon kharei Joshua; malung pinglu ngalei hiwui mi saikora, da Prohona hānga; ot sālu, kaja ina nathumli ngasomida lei, da saikorawui Prohona hānga,

⁵ kaja nathumna Egyptwui eina kashok tharan ina tuingashit sākahai athishurda nathumli ngasomida lei. Iwui manglā nathumwui ngachaili pamda lei; mangacheealu.

⁶ “Kaja saikorawui Prohona hithāda hānga: Khaleilaga ina kazingram, apuk-apaga, shamadru kala ngalei katheng khanukluishitra;

⁷ kala yur saikora ina khanukra, chithāda sāda yur saikorawui lan chi rāzangra, kala ina shimhi tekhamatei eina chipemra, da saikorawui Prohona hānga.

⁸ Lupā hi iwuina, kala sinā hila iwuina da saikorawui Prohona hānga.

⁹ Sakākhanaowa shimwui tekhamatei china kharewuili mataimeira, kala apam hili ina shāngngasakra da saikorawui Prohona hānga.”

Marānna Pāngmonbingli Khangasan

¹⁰ Dariusna mungda zingkum kakhane, kachāng kachikowui zimiksho maga̱da khamatethang saikorawui Prohowui tui marān Haggaili rāhānga,

¹¹ “Ashangva̱wui Prohona hithāda hānga: Tui hi chukmaja̱ khavai pāngmonbingli ngahānlu;

¹² Kalikhada mi akhana chigat kahai kathara sā kachonmareili romkhuilaga awui kachon china khamuili nilala, hanli nilala, zamli nilala, thaoli nilala kashakazā kali-kalikhali nilala sākaza̱ chi tharmathenghaorala?” Pāngmonbing china ngahānkai “Maningmana.”

¹³ Chieina Haggaina hānga, “Kathingunli sāza̱haida makhao kahai akhana hibingwui ngachai akhali sāza̱haiakha chi makathar onhaorala?” Pāngmonbing china ngahānkai, “Chi makathar onhaowa.”

¹⁴ Chiwui thili Haggaina hānga, “Chithāda sāda mibing hila chithai, kala iwui mangāli khalei yur hila hithai, da Prohona hānga; chieina athumwui pāng eina sākahai ot saikorala chithai; kala athumna chili kachigat chi makatharana.”

Proho na Awui Sokhami Ngashitkhami

¹⁵ “Seihā sālu kala aja eina thuilaga naoda khi shoknikhala kaji phaningyanglu. Prohowui shimli lunggui akhawuitungli lunggui akha maparranglakha

¹⁶ nathum kathāda sāsākhala? Mi akhana shung maga̱ kazipkhuingai, kha shung tharāmāng samphanga; akhana drakhāra̱ surkhavaipamli khokthi hangphangā sokkhui khavai rai, kha maga̱māng samphanga.

¹⁷ Ina nathumli kala nathumwui theishiraili sākazāt rāngasaka, theihla kachungkha tāngasaka; kha nathumna ili malatungmana da saikorawui Prohona hānga.

¹⁸ Aja kachāng kachikowui zimiksho maga̱da khamatethang hi eina thuida yangphoklu. Prohowui khorumshim shimphunga haokaphok zimiksho eina thuilaga yangkhuilu:

¹⁹ Athā chi arui eina tangda zātshimli leila? Drakhārong, khaorārong, kabotheirong kala oliverong arui eina tangda athei mamatheirangla? Aja eina thuida ina nathumli somira.”

Zerubbabelli Ngashitkhami

²⁰ Kachāng chiwui zimiksho maga̱da khamatethang Prohowui kakhane tui Haggaili ralui,

²¹ “Judahwui khamunga Zerubbabelli hānglu kaja ina kazingram kala okathui khanukki jihaira,

²² kala wungrambingwui wungpamkhong khuishoki jihaira, yurbingwui wungram yāng pangshap shimān ngasaki jihaira, kala siguigari eina sigui katongbingli sākazamki jihaira kala siguila, katongbingla mi kachiva̱ kachichāwui ngasotawui raighaili pitāra.

²³ Chithanghon ina nali khāngkhuira, O Shealtielwui naomayara, iwui rao Zerubbabel, da saikorawui Prohona hānga, kala ina nali shoi-khutop akha thāda singra; khikhalajila ina nali kapangkhui kahaina, da saikorawui Prohona hānga.”