HABAKKUK 3 - Kathara Bible (BSI)

Habakkukwui Seihā

¹ Shigionothwui athishurda, Habakkuk Marānwui seihā kasā.

² O Proho, ina nawui pao shāhaira, kala O Proho, nawui otsakli ngachee. Zingkumbingwui alungli shokngasakmiluishitlu; zingkumbingwui alungli chitheimiluishitlu, malungkhavāt tharan khalumashanmilu.

³ Varena Temanwui eina rai, kala Kathara china Paran Phungreiwui eina rai. Awui tekhamateina kazingram pei kala okathui awui masotna pema.

⁴ Awui kahān chiya kahor tākamhai, apāngwui eina zingrān shoka; kala chili awui pangshap thumhai.

⁵ Awui mangāli kazātkashi rai, kala mimaona yunronda shurzata.

⁶ Ana nganingda okathui hi ngatama; kala yurbingli yanglaga khanuka; chieina makhangachei kaphung khareirei ngapha̱yānghaowa, katang makhavai kaphungnanao ngasunzanghaowa. Awui pangshap achālakhawui chichinga.

⁷ Cushan shimkhurwui sipkasā ina thei; Midian ngaleiwui chonrān nganuka.

⁸ Nawui malungkathui kongbinglilā O Proho? Nawui malungkhavāt chi kongbinglilā, chikā shamadruli malungkakangkhala, nana nawui sigui, khayuiyawui siguigari katong tharan?

⁹ Nana nawui malākhorwui eina malā khuishokta malāthing khara̱li parhaira. Nana okathui ngachakkhaida kong longngasaka.

¹⁰ Kaphungbingna nali theida reoranga; tara̱na kungkung longa; kathuka ngayina ngaphaokāda, akhon ngarungninghai.

¹¹ Nawui malā kāpkharāwui kahān, nawui kazei pharkharāwui khangashei theilaga, zimik eina kachāngna kachichāwui apamli ngasāmhaowa.

¹² Nana malungvātta okathuili makānvai, nana malungvavāt eina yurbingli naikazama.

¹³ Nawui miyurli huikhui khavai rai, nana neomi kahaiali huikhui khavai. Nana makaphā makhayāwui kui naikhaiya, khaishāng eina thuilaga akahung eina tangda khamasai eina haimi.

¹⁴ Ili sakathān khavai surkakhaning thāda kharā, kala kachāmbingli ngathumda tukshaiki kajiwui ringkaphā thāda kharā raikhokabingwui kuili nawui zeipa̱ eina phara.

¹⁵ Nana shamadrutungli nawui sigui eina naikazamda, hakkhamahā tara̱ malaokai.

¹⁶ Ina shālaga iphasā kathira, akhon chi shāda imorchai kathira ara̱kui makazang thāda, pheila makārthukthuwa. Ithumli rai rākatā athumwuitungli kachotkachāng kharā atam chi ina kasaikha honsāra.

¹⁷ Khaorārongna awon mawonlala, drakhārongna mamatheilala olive heiun maunglala, luili zāt mashoklala, yaoshimli yao mazanglala, seishimli sei maleilala;

¹⁸ Prohowui mangāli I mathānchingra, Huikhame Varewui mangāli I ringphāchingra.

¹⁹ VARE, Proho iwui pangshapana; ana iphei chaowui kathāk thāda sāmi, ana ili kajujuipamli zatngasaka.