GALATIANAO 4 - Kathara Bible (BSI)

¹ Kha shimlui katonga naomayarawuina jilala avāva̱wui shimlui khuiki kaje nao chila nganuilakhava rao eina ngaraichai,

² avāva̱na ngarān kahai atam maungshungranglakha eina tangda mi khangateina yangmiya.

³ Chi tākam eina ithumla Manglārinwui kākashung chi masamphangranglakha apuk-apagawui manglāna mungkasā chiwui rao sāsai.

⁴ Kha atam ungkashung eina Varena awui Naomayarali chihorai, mikumo ava̱ akhawui naomayara akha sāda ana rai kala Jihudiwui ain azingli raokthuida

⁵ ainwui azingli khalei saikorali ngatangkhuida ithumli Varewui naongarā ngasā ngasaka.

⁶ Nathum Varewui naongarāna da theikhavai Anaomayarawui Manglā chi ithumwui wuklungli sangmida, Manglā china “Abba, Ishava” da vaoshoka.

⁷ Chiwui vang eina ara nathum rao maningluimana, kha Varewui naongarāna, kala nathum awui naongarā sāhaoda Varena awui naongarāli miki kaji mira.

Paulna Galatianaobingli Phaningkhami

⁸ Rida nathum Vareli matheisāmana, chieina khangacha eina vare makhaninga rinbingwui raonao sāsai.

⁹ Kha ara nathum Vareli theihaira, lah Varena nathumli thei— nathum kathada khangazana kala lumashankapai manglabingli hanungga jihaokhala? Khiwuivang athumwui rao saluingaihaokhala?

¹⁰ Nathumna kachikathā zimiksholi, kachāngli, zurkānli kala zingkumli saklak eina khuiya.

¹¹ Ina nathumwui vang kasā ot saikora hi arema sāhaoki jihaidei da phaninglaga wukhananglaka.

¹² Ivānaongarā, iwui thada sālu, ila nathum kathāna. Nathumna ili khalāng khikha masāhaimana.

¹³ Khareli ina nathumli paokaphā hākashok chi iwui kakazāwui vang eina kharāna da nathumna thei.

¹⁴ Iwui kakazāna nathumli kasak tarākha samphang ngasaklala, nathumna ili ningkakachai lah horkahai masāmana, kala Khrista Jishuli samngarokhuiki kaji thada ili samngarokmi.

¹⁵ Nathum ringphālaksai, ara khi sāthu? Sāpaisi kaja nathumwui mik latshoklaga ili mihairara kaji hi ina hāngshapa.

¹⁶ Ina nathumli mashun tui hāngkhamiwui vang ara I nathumwui yangkashe ngasāhaola?

¹⁷ Nathumli ngahānngailak eina kasābing chi ning matharmana. Athumna nathumli iwui eina ngatei ngasakngai kaja athumna nathumli ngahānkhangai thada nathumna athumli ngahānngai ngasaka.

¹⁸ Kharin chi mathada leiakha hikathā ngahānkhangai hi phālaka— ina nathumli ngasopamda leilakhawui atammāngli maningla kha atam kachida hi mashungchinga.

¹⁹ Inao ngarā, Khristawui khangachā chi nathumwuili maleiranglakha eina tangda ava̱na naokhara̱li kachot thada nathumwui vang ina chotluida lei.

²⁰ Nathumwui vang ina kathada phaningmikhala kaji hi iwui wuklung rāmkhailaga machitheikapai jong! Nathumli kathada hāngchitheisikhala da I matheirarthuwa!

Hagar eina Sarahli Pandam Kasā

²¹ Ainwui azingli pamkhangaibingli khangahānna; Ainna khi hāngkhala kaji nathum mashāmala?

²² Hithada kapihai kaja Abrahamwui naomayara khani leisai, akhali raopāva̱na pharai kala akhapali akhavaiva̱na pharai.

²³ Raopāva̱na kapharā naomayara chiya khangachā thada pharai, kha akhavaiva̱na kapharā naomayara chiya Varewui ngashitkhamiwui athishurda pharai.

²⁴ Hikatha hi chānjam eina bhap tāpai; preiva̱ khani chi tuingashitwui mathunna. Raopamli pamda leilakha kapharā naobing chi Hagarwuina kala ana Sinai kaphungli tuingashit sākahai chiwui mathunna.

²⁵ Arabiali khalei Sinai kaphungwui mathun sāda khalei Hagar eina awui naongarā zangda rao sāser kahai hi aruihonwui keinung Jerusalemwui chānjamna.

²⁶ Kha atungshong khalei Jerusalem chiya ningkhān kahaiana, chi ithumwui ava̱na.

²⁷ Kaja hithada kapihaida lei; “Ringphālu, O nao makhavaiva̱ kashumva̱! Mathānda vaolu, naopharātwui kachot matheilakrang kajiva̱! Khikhalajila horkahai preiva̱na, fakathuiva̱ preiva̱li nao chungmeira,”

²⁸ Ara ivānaongarā, Isaac tākam eina nathum hi Varewui tuingashitwui naongarāna.

²⁹ Atam chitharan Varewui Manglā eina kapharā nao chili khangachā pharāt eina kapharā naona rekakharek thada aruila chipapama.

³⁰ Kha Varetuili khi hānghaili? Hithada kapihai; “Raopava̱ eina anao chili kashamhaolu, kaja raopāva̱wui nao eina akhavaiva̱wui nao shimlui makārumpaimana.”

³¹ Chiwui vang eina ivānaongarā, ithum raopava̱ chiwui nao maningmana, kha akhavaiva̱wui naongarāna.