GALATIANAO 3 - Kathara Bible (BSI)

Ain lah Shitkasang

¹ Mangkhama̱ Galatianaobing! Nathumli khipāna khara̱ sangmihaokhala? Nathumwui miktāli Jishu Khristali krushli shaokathat nathum mathālak eina theikahaina!

² Hi hānglu: Varewui Manglā hi ain khamayon einaka, paokaphā shālaga shitkasang eina samkaphangkhala?

³ Kathada hiyākha mangma̱kahai! Varewui Manglā eina haophoklaga na khalattawui pangshap eina tanghaingaila?

⁴ Nathumna theikakhui chi aremala? Maningphutmana.

⁵ Varena manglā sangmida masākharar ot kasāsā chi ain khamayonwui vangla, chikā paokaphāli shitkasangwui vangkhala?

⁶ Abrahamwui pongli phaningyangsa; Abrahamna Vareli shitsanga, kala awui shitkasangwui vang eina Varena ali khangarongana da shānkhui.

⁷ Nathumna theingayiphalunga kaja shitkasang khalei mibing chi Abrahamwui ara̱-azā akachangbingna.

⁸ Varetuili hithada phongmihaida lei chiya, shitkasang mangā eina Varena Gentilebinglila mashungmira. Chieina Varetuina Abrahamli paokaphā chi hithada hānghaisai; “Nawui mangā eina miyur saikorali Varena somira.”

⁹ Abrahamna shitsanga kala sokhami samphanga; chieina shitkasang mi saikorali ali sokhami thada somi

¹⁰ Ainwui otsakli kachihānbing khonkashilungli lei; kaja hithada kapihaida lei; “Ainwui lairikli kapi kahai saikora atam kachida makashurbing chi Varewui khonshātlungli lei.”

¹¹ Ara ithumna tharzā eina theihaira kaja mi khipālikha ain eina mamashungmimana, khiwui vangkhala kaja hithada kapihaida lei, “Shitkasang mangā eina mashungmi kahai mi chimāng ringra.”

¹² Kha Ain eina shitkasangwui khangashik khikha maleimana, kaja hithada kapihaida lei; “Ain khamayona china chiwui athishurda ringra.”

¹³ Kha ithumwui vang khonshi kahai akha sāda Khristana ithumli ainwui khonshāt eina ngatangmihaira. Kaja hithada kapihaida lei; “Thingtungli kathe ā chi Varewui khonshātlungli lei.”

¹⁴ Khristawui mangā eina Gentilebingli Varena Abrahamli ngashitmi kahai sokhami chi samphangpai khavai Khristana chi tākam eina thimi, chieina Varena ngashitmi kahai Manglā chi shitkasang mangā eina ithumna samphangpaira.

Ain kala Tuingashit

¹⁵ Ivānaongarā, pailak kahai chānjam akha hangga, mi khanina kachikathā akha mayāngarokta tuingashit sālaga shoi sāngarok kahai tharan khipānakha chi masākhaipaimana lah mangarumsangluipaimana.

¹⁶ Ara Varena Abraham eina awui ara̱-azāli ngashitmihai, Vare tuili awui “Ara̱-azābingli” da mi tarākhali kahāng thada mahānghaimana kha awui “Ara̱-azāli” da mi akhamāngli hānga, chiwui kakhalat chiya Khrista, mi akha kajina.

¹⁷ Ina kahāng hiya; Varena Abrahamli tuingashit sai kala chi mayonchingra da ngashithai. Zingkum shāmati thumrāwui thili khami ain china Varewui ngashitmi kahai eina tuingashit chi masākhairarmana.

¹⁸ Varena lemmet hi ainwui athishurda khamina jisi kaja ngashitmi kahai chi makanāluimana. Kha Varena ngashitmi kahai lemmet chi ana Abrahamli khamina.

¹⁹ Chithākha ain chi khi sākhavai khamikhala? Hiya khayon otsak hi khikhala da theikhui khavai ngarumkasangna, kala ngashitmi kahai Abrahamwui ara̱-azā chi marāranglakha eina tangda zatsā khavaina. Ain hi Vare eina mikumowui marakli tuisak sāme sāda Varena kazingraoli shichinda mitā khamarona.

²⁰ Kha mi akhamāngakha tuisak sāme darkar masāluimana kaja Vare akhamānga.

Ainwui Kharin

²¹ Chithākha ain hi Varewui ngashit khamili mamayāmana kajiwui kakhalatla? Maningphutmana, kaja mikumoli kharing mikashapa ain samphanghaira jisi kaja chi mayonda mi saikora mashungkhuihairara.

²² Kha hithada hānghai, kaja okathui katonga moreiwui pangshap azingli lei. Chieina pheisin sāda ngashitmi kahai lemmet chi shitkasanga athum chili mihaira

²³ Kha shitkasangwui atam marāranglakha kala Varena maphongmiranglakha eina tangda ainna ithum saikorali phātopli narhaisai.

²⁴ Shitkasangwui mangā eina ithumli mashungmipai khavai, Khristana marāranglakha eina tangda ainna ithumli akhavā sāsai.

²⁵ Kha ara shitkasangwui atam sahaoda ainna ithumli akhavā masāluimana.

²⁶ Kaja shitkasangwui mangā eina Khrista Jishuli ngarumhaoda nathum Varewui naosera,

²⁷ Khristali zangda ra̱hik kahai nathum saikora, Khrista ā khalattawui mirina nathumwui sāri ngasahaira.

²⁸ Chieina Jihudi eina Gentile, rao eina akhavā, sha̱nao eina mayarnao khangatei maleimana; Khrista Jishuli ngarumhaoda nathum akhamanga.

²⁹ Nathum Khristawuina jiakha, Abrahamwui ara̱-azāna kala Varena ngashitmi kahai chiwui shimluikatna.