EZRA 8 - Kathara Bible (BSI)

¹ Awunga Ar-ta-xerxesna pānlakha Babylonwui eina ili ngasokhaung avāva̱ ngarā shimkhurwui akuibing kala miunbing chi hina:

² Phinehaswui naomayarabing eina Gershom; Ithamarwui naomayarabing eina Daniel. Davidwui naomayarabingwui eina Hattush,

³ Shecaniahwui naomayarabing, Paroshwui naomayarabingwui eina Zechariahli ngasoda mingkachan mayarnao shākha hangphangā.

⁴ Pahath-moab naomayarabingwui eina Zechariahwui naomayara Eli-e-ho-enaili ngasoda mayarnao shākhani.

⁵ Zattuwui naobingwui eina Jahazielwui naomayara Shecaniahli ngasoda mayarnao shākathum.

⁶ Adinwui naomayarabingwui eina Jonathanwui naomayara Ebedli ngasoda mayarnao hangphangā.

⁷ Elamwui naomayarabingwui eina Athaliahwui naomayara Jeshaiahli ngasoda mayarnao hangshini.

⁸ Shephatiahwui naomayarabingwui eina Michaelwui nao Zebadiahli ngasoda mayarnao hangchishat.

⁹ Joabwui naotunbingwui eina Jehielwui naomayara Obadiahli ngasoda mayarnao shākhani tharāda chishat.

¹⁰ Baniwui naotunbingwui eina Josiphiahwui naomayara Shelomithli ngasoda mayarnao shākha hangtharuk.

¹¹ Bebaiwui naotunbingwui eina Bebaiwui nao Zechariahli ngasoda mayarnao maga̱da chishat.

¹² Azgadwui naotunbingwui eina Hakkatanwui nao Johananli ngasoda mayarnao shākha thara.

¹³ Adonikamwui naotunbingwui eina, naoda khaung Eliphelet, Jeuel kala Shemaiah athumli ngasoda mayarnao hangtharuk.

¹⁴ Bigvaiwui naomayara eina Uthai kala Zaccurli ngasoda mayarnao hangshinina.

Khorumshimwui Levinaobing Phākasang

¹⁵ Ina athumli Ahavali longkhava kongpheili kazipkhui, kala chili ithumna kathumthang apisanga. Mibing eina pāngmonbing vāshānkhayang eina Leviwui naongarā mazangsathuwa.

¹⁶ Chieina kathāna Eliezer, Ariel, Shemaiah, Elnathan, Jarib, Elnathan, Nathan, Zechariah, Meshullam kala ningkhamazinga Joiarib eina Elnathanli ahokhui khavai Iddoli chihovai,

¹⁷ ana Kasiphiali khalei apamwui kathānali Iddoli kala chili khalei Khorumshim khamayon achinābingli ithumwui Varewui shimli otram ngatha̱mebing chihorāmi khavai ahāng ngasaka.

¹⁸ Kala Varena ithumli ngasomida Israelwui naomayarawui nao Leviwui nao Mahliwui nao, mingsinda Sherebiahli ngasoda awui naomayarabing, athei-asābing zangda athum tharāda chishat thānunga;

¹⁹ athumli ngasoda Hashabiah kala Merariwui naomayarabingwui eina Jeshaiahli ngasoda athei-asā eina naomayarabing maga̱na;

²⁰ chili lāngda Khorumshimli otram khangatha̱li Levinaobingli ngachon khavai David eina awui otva̱bingna sangkahai shākhani maga̱na. Athum hi avāva̱ ngarāwui ming eina hāngserhaida lei.

Ezrana Thānlaga Kakhum

²¹ Chieina kongpamli ithum khalatta Varewui mangāli hamsang khavai, awui eina ithum khalattawui, ithumwui naoshinaobingwui, ithumwui khorkhong saikorawui khangarong shongfa phākhui khavai ina chili khumkhavai kasoi.

²² Kaja yangkashebingwui eina ithumli ngakuimi khavai awungali shipai, kala sigui katonga raimi milu da kapo vaishihaowa. Kaja “Ali kapha mili Varena kaphā sāmi kala ali makhangavapa mili awui malung kakangwui pangshap chi lei” da awungali hanghaira̱sai.

²³ Chiwui vang ithumna Vareli kakhum eina seihā sai, kala ana ithumwui kapo khuisangmi.

Khorumshimwui vang Lemmet

²⁴ Chiwui thili ina kathāna pāngmon tharāda khani: Sherebiah, Hashabiah, kala anili ngasoda aniwui theisā tharā ngateida haihaowa.

²⁵ Kala ithum Khorumshimwui vang awunga kala machinmebingna, wungnaobing, kala chili khalei Israel saikorana kachigat lupāsā, sinā kala khorkhong saikora chi ina athumli tamshokmi.

²⁶ Ina athumwui pāngli lupāsā talent shātharuk hangphangā, lupāsāwui khorkhong talent shākha, kala sinā talent shākha,

²⁷ sinā daric thingkhaman tengkot maga̱, kala sinā thāda kasaka hingpit kahai pithraisāwui khongsai khani tamshokmi.

²⁸ Kala ina athumli, “Nathum Prohowui mingli katharana, khorkhongbingla katharana, kala sinā lupāsāla nathum shāvā ngarāwui Vare Proholi mingairereo eina kachigatna.

²⁹ Prohowui shimlungli pāngmon khareibing, Levinaobing kala Jerusalemli khalei Israelwui navāngarā shimkhurwui wungva̱bingwui mangāli nathumna matammiranglakha eina tangda nathum mathālak eina haida khamayonla mayonsālu” da hānga.

³⁰ Chiwui vang pāngmonbing eina Levinaobingna Jerusalemli, Varewui shimli khuivā khavai sinā, lupā kala khorkhong saikora chi khuisanghaowa.

Jerusalemli Hankhaung

³¹ Chiwui thili kachāng kharewui zimiksho tharāda kakhanethang ithumna Ahava kongwui eina Jerusalemli ungkhavai zatphoka; kala Varewui pāngna ithumli thara̱zatta yangkashibingna shongfali ngathiraiwui eina thānshokmi.

³² Ithumna Jerusalemli ungshungda chili kathumthang ungpamsanga.

³³ Khamatethang ithumna Varewui shimlungli sinā, lupā, khorkhong, Uriahwui naomayara pāngmon Meremothwui pāngli tamsangmi; kala ali ngasoda Phenihaswui naomayara Eleazarlong kala athumli ngasoda Levinaobing, Jeshuawui naomayara Jozabadlong, Binnuiwui naomayara No-adiah leisai.

³⁴ Katonga chi shānlaga tama, kala khān tamkhui kahai saikora kapisangserhai.

³⁵ Atam chitharan raithā kahaiwui eina latkhaung, athumna Israelwui Vareli rikkatā kachigat chigata Israel katongawui vang mukkā tharāda khani, yaovā hangchikoda tharuk, yaonao hangshinida shini, kala suihamsharwui vang mevā tharāda khani, saikora hi Prohowui mangāli rikkatā chigatsera.

³⁶ Kala awungawui Kong Makanda khalei ngaleiwui satrapbing eina lammungabing chili awungawui pao chi khuivāmida Khorumshimwui vang kala mibinglila athumna ngachonmi.