EZRA 7 - Kathara Bible (BSI)

Ezralong Jerusalemli Khaung

¹ Chiwui thili Persiawui awunga Ar-ta-xerxesna khamung atamli Ezra, Seraiahwui naomayara, avāva̱ ngarā (shānkakā eina) Azariahwui naomayara, Hilkiahwui naomayara,

² Shallumwui naomayara, Zadokwui naomayara, Ahitubwui naomayara,

³ Amariahwui naomayara, Azariahwui naomayara, Meraiothwui naomayara,

⁴ Zerahiahwui naomayara, Uzziwui naomayara, Bukkiwui naomayara,

⁵ Abishuawui naomayara, Phinehaswui naomayara, Eleazarwui naomayara, pāngmon kharei Aaronwui naomayara—

⁶ Ezr china Babylonwui eina unga. Ava Israelwui Vare Prohona Mosesli khami ainwui pongli themlāk kahai mi akhana. Kala awui Proho Varena ngasokhamiwui vang awungana awui kapo saikora misera.

⁷ Awunga Ar-ta-xerxeswui kashine kum Israelwui mi kaikha, pāngmon kala Levi kaikha, laa kasābing eina ngavei khamayonbing kala Khorumshimli otram khangatha̱bing kaikhala Jerusalemli unga.

⁸ Kala ana awunga sāda kashine kumwui kachāng kaphangāli Jerusalemli unga;

⁹ kachāng kaphangāwui kharethang ana Babylonwui eina zatphokta Jerusalemli ungshunga, kaja awuitungli Varewui mayonkhami leisai.

¹⁰ Kaja Ezrana Prohowui ain chi tamkhui khavai, kala chi sākhavai, kala ain eina shiyan-chikanbing chi Israelwui alungli tamchithei khavai awui ningli shaptithaowa.

Kapi kahai Lairik Ezrali Khami

¹¹ Israelna sāki kaji ot, kala Prohowui ningkhami theishingkhui kahaiya, lairik kathema pāngmon Ezrali awunga Ar-ta-xerxesna kakapi chithi chi hithai:

¹² “Awungabingwui awunga, Ar-ta-xerxesna, kazingramwui Varewui ain kathema pāngmon Ezralina,

¹³ iwui wungramli khalei Israel kachikathā mibing, maningakha athumwui pāngmonbing, Levinaobingna Jerusalemli ungngairereo ungga jiakha nali ngasoungpaira kaji hi iwui kakasona.

¹⁴ Nawui pāngli chisin kahai nathum Varewui ain athishurda Judah eina Jerusalemwui pongli ngathing khavai awunga kala awui machinme shinina nali kachihona,

¹⁵ chili lāngda Jerusalemli khalei Israelwui Vare Proholi awunga eina machinmebingna thāda kachigat sinā eina lupā chi nana khuiungmi khavai,

¹⁶ kala chieina ngasoda Jerusalemli khalei Khorumshimwui vang mibingna kala pāngmonbingna lemmet kachigat sinā eina lupāsā Babylon ngaleili khalei saikora zangda nana khuiungra.

¹⁷ Pheisā hi eina mukkā, yaovā, yaonao hi eina ngasoda athumwui tharāzāt kachigat eina ra̱shakshirei lokhuida Jerusalemli khalei nathum Varewui shimli khalei hanphutpamli chigatlu.

¹⁸ Sinā eina lupāsa katai chi nathumwui Varena sāngasakkhangai athishurda nathumna phāra kaji chi sālu.

¹⁹ Khorumshimli otram ngatha̱ khavai khorkhong nali mikahai chi Jerusalemwui Varewui mangāli khuiunglu.

²⁰ Kala nathum Varewui shimli sākhavai khalei chiwui vang awungawui lanshimwui eina mihaora.

²¹ “Kala awunga Ar-ta-xerxes, ina Kong Makanda ngalei alungli khalei chumsinga saikorali kakaso khamina: Kazingwui Varewui ain kathema Ezr pāngmonna nathumwui eina khikakha khuikapai leiakha mathālak eina sāmilu,

²² lupāsā kg. thingkathum shāmati, kehu kg. thingtharā, drakhāra̱ liter thingkhani, olive thao liter thingkhani eina tangda, kala machi ningkachāng eina tangda mipaira.

²³ Khorumshimwui vang kazingramwui Varena khikakharanu kakaso chi peida sāphalungra, maningakha awunga ngaleili kala anao ngarāwuitungli malungkhavāt tāpaishina.

²⁴ Hila ithumna kachitheina kaja pāngmonbingli, Levinaobingli, laa kasābingli, khāmong khamayonbingli, Khorumshimli otram khangatha̱bingli, kala Khorumshimli khangatei ot kasābingli, shaila, khajana kala khangatatei shai makhuipaimana.

²⁵ “Kala Ezra, nathum Varewui thangkhamei nali chisin kahai athishurda, Kong Makāndawui ngaleili khalei mibingwuitungli bichar sāmi khavai nathum Varewui ain katheibingli bichar same phāsanglu; kala matheithangkhameibingli nana tamchitheilu.

²⁶ Nathumna Varewui ain, kala awungawui ain makhamayon mili phāshi kasā nilala, loi thākahai nilala, kashong khalāng nilala, phātop kasang nilala shongrān saklak eina milu.”

Ezrana Vareli Masot Khami

²⁷ Jerusalemli khalei Proho Varewui shim tekmatei khavai, awungawui ningli hikathā ning sangkhame ithumwui avāva̱ ngarāwui Vare Proho chili sochikatranu,

²⁸ chili lāngda awungawui machinmebing, awungawui kathethem otva̱bingwui mangāli awui makhangachei leikashi ili tāshungkhamiwui vang Vareli sochikatranu. Ina pingmeihaowa kaja iwui Vare Prohowui pāngna ili ngasomida ning kakashak maleila Israelwui kathānabingli kazipkhuida athumna ili ngasounga.