EZEKIEL 8 - Kathara Bible (BSI)

Ezekielli Varewui Mahākhami Kakhane

¹ Katharuka kum, kachang katharukawui kaphangāthang, ishi shimli Judahwui khararnaobingnali ngasopamda leilakha, Proho VAREwui pangshap iwuitungli tāshunga.

² Kala ina khayang eina yanglu, mizak thāda akha thei; theida khalei chiwui akashān eina thuida apheishong mei thai, akashān atungshong pithrai ruimaling kahai thāda hānshuna.

³ Ana mipāng thāda katingrālaga ikui samsa̱li singkhui; kala Manglā china ili okathui eina kazingwui ngachaili khangkāhaowa kala Varewui mahākhami chili ili Jerusalemli, atungshong ngarei kashanga ngavei zangkhavai; kaja, mikpaishi khangasakawui mikpaikashe mima̱wui pamkhong khaleipam chili khuivāmi.

⁴ Kala yanglu, ina tampākli mathāsek kahai mahākhami kathei chi tākam eina, Israelwui Varewui tekhamatei chi chili leisai.

⁵ Chieina ana ili hānga, “Miwui naomayara, atungshong namik kapeishanglu.” Chieina ina yangkashang eina, yanglu, hanphutwui ngaveiwui atungshong, zangkhavai chili, mikpaikashewui mima̱ leisai.

⁶ Kala ana ili hānga, “Miwui naomayara, athumna sāda khalei hi theilā, Israel shimkhurna hiyākha ningkakachai ot sāda, iwui katharapamwui eina ili katāva̱li kashamvā khavai kasāla? Kha hili ningkachaikhamei ot nana theiluifara.”

⁷ Chieina ana ili khāmong ngalemli khuivai, kala ina yangkhavā tharan, yanglu phākholi akhur akha thei.

⁸ Chieina ana ili hānga, “Miwui naomayara, phākho chi chuiphutlu.” Ina phākho chi chuikazang tharan, yanglu, khāmong akha leisai.

⁹ Kala ana ili hānga, “Chiwui alungli zanglu, kala mahāngkapai ningkakachai ot athumna kasāsā chi zangyanglu.”

¹⁰ Chieina ina zangyangda thei, kala chili phākho kuimareida ngawokazata yurbing, kala ningkakachai sābingla, kala Israelwui meoma̱ saikorala napmithaisai.

¹¹ Chiwui mangāli Israel shimkhurwui ararnaobing athum hangshini nganingsai, chili Shaphanwui naomayara Ja-azaniah athumwui alungli zangsai. Kachichāwui meishārkhong singsera kala nganamkaphā otwui meikhut chi muiyā thāda ngapānkai.

¹² Chieina ana ili hānga, “Miwui naomayara, Israel shimkhurwui ararnaobing kachiva̱ ama̱bing haikhavai kāwui tangkhamangli sāda khalei chi nana theihairala? Kaja athumna, ‘Prohona matheimana, Prohona ngalei hi horhaira’ da hānga.”

¹³ Kala ana hithāda hānglui, “Athumna kasā hili ningkachaikhamei otla nana theiluifara.”

¹⁴ Chiwui thili ana ili Prohowui shimwui atungshongwui ngavei zangkhavai chili khuivai; kala yanglu, Tammuzwui vang sha̱naobing chapngachāsai.

¹⁵ Chieina ana ili hānga, “Na hi theihairalā, O miwui naomayara? Nana hili ningkachaikhamei ot theiluifara”.

¹⁶ Chiwui thili ana ili Prohowui shimwui zangkhamayar yāngkhupli thānzanga; kala yanglu, Prohowui khorumshim khāmongli, makān khavai yāngkhup eina hanphutwui ngachaili, mi maga̱da phangā sha̱kha Prohowui khorumshimli khana̱rorlaga zingshoshong ngareivāda zimikli khorumsai.

¹⁷ Chieina ana ili hānga, “O, miwui naomayara, nana hi theihairala? Judahwui shimkhurna hili sāda khalei, sākashi ot, ningkakachai ot sāda ili malungvāt khangasak hi pailak kahai otna da phaningla? Yanglu, athum khalatta nāren kajina.

¹⁸ Chiwui vang ina malungkhavāt eina sāra, imikna mayangkheimara, ina lukhamashanla malumashanmiluimara; athumna ikhanāli panglāk eina rāchapsanglala manganāsangluimara.”