EZEKIEL 7 - Kathara Bible (BSI)

Israelwui Akatang Khanganai

¹ Prohowui tui china ili rāhānga:

² Kala “O miwui naomayara,” da ana hānga, “Israelwui ngaleili Proho VAREna hithāda hānga: Khangachang! Ngalei hiwui achikun mati vāshungda khangachang rāhaira.

³ “Ara khangachang nathumwuitungli rāhaira, kala iwui malungkhavāt nathumwuitungli chihorāra, kala nathumwui ningkakachai otsak chiwui vang ina tandi mira.

⁴ Ina mayangkheimilakmara, malumashanmiluimara; kha nathumwui alungli ningkakachai ot sālakha eina tangda ina nathumli tandi mira. Chieina I Prohona da nathumna theira.”

⁵ “Proho VAREna hithāda hānga: Ka̱lāshatwuitungli kalāshāt! Yanglu, chi rārāli.

⁶ Akatanga rāhaira, akatang chi rāhaira; nathumli mamayāmada chi ngakarthuihaira. Yanglu, chi rāhaira.

⁷ O ngalei hili khaleibing, nathumwui athit unghaira; atam chi rāhaira, zimiksho chi nganaihaira; ngaunlop kahaiwui zimiksho, phungreili khamathān kasākhon maningmana.

⁸ “Ara iwui malungkhavāt nathumwuitungli tāra, lungthot eina ngasoda nathumwui otsak athishurda bichar sāra; kala ningkakachai ot saikorawui vang tandi mira.

⁹ Ina mayangkheimilakmara, lukhamashanla maleimara; ningkakachai ot sālakha eina tangda nathumwui kasākhavā athishurda tandi mira. Chieina tandi khame chi Proho ina da nathumna theikhuira.”

¹⁰ Yanglu, zimiksho chi! Yanglu, chi rāhaira. Nathumwui athit rāhaira, makhamashung wonphokhaira, langkaso shonshokhaira.

¹¹ Khangazai chi makapha-makhayāwui lijei ngasāthuihaira; athumwui makhavātla, athumwui lanla; chili lāngmeida tekhamateila maleiluimara.

¹² Atam chi rāhaira, zimiksho chi nganaihaira. Khalona mamathānaranu, lah khayorna wukmakhanangaranu; kaja malungkhavāt hi saikorawuitungli tāki kajina.

¹³ Kaja leihkhalon china, athum mathiranglakha yorkahai chiwui eina khikha tongkazā masamphangmara. Kaja malungkhavāt hi saikorawuitungli tākahaina, chi mahanungluimara, khikhalajila akhalattawui khayonkhamāngwui vang, khipākha mashokrarmara.

¹⁴ Athumna talla̱ khongda ngaranriphaira, kha khipākha rai mavāmana, kaja iwui malungkhavāt saikorawuitungli tāhaira.

Israel Moreiwui vang Tandi

¹⁵ Ayarli raighai, alungli kazātkashi kala chāmrei, luili khalei mina raighai eina thi; keinungli khalei china chāmrei kala kazātkashi eina thira.

¹⁶ Kachikathā ringkasābingna yāmshokakha, tampākwui nāsha̱ thāda kaphungli pamra kala khalattawui moreiwui vang sifara.

¹⁷ Pāng saikorala mathukthu, khuksaola tara̱ thāda tāchokhao.

¹⁸ Athum khalattana bora ngavaipama, kala khangacheena athumli farora, mi saikora maishiri; kala kui saikorala ngakokserra.

¹⁹ Lupāsāla chānreili horkathānra, kala athumwui sināla makathar ot thāhaora; Prohowui malungkhavāt zimiksholi athumwui sinā eina lupāna athumli mangatangkhuirarmara; athumna athumwui kathai kala awuk machipemrarmara. Kaja china athumwui morei kasāli phei ngaphok khavai sāthuihaowa.

²⁰ Arema tekhamateiwui vang athumna khamathā sinā singa, kala athumwui ningkakachai meoma̱bing kala ot saikora chi eina sākhui; chiwui vang eina ina athumwui vang makathara ot sāngasak kahaina.

²¹ Kala ina yur khangateiwui mili ngapaikhui khavai mihaora, kala okathuiwui makhayābingwui vang ngaponkhui khavai sāngasakra; kala chi athumna makhao ngasakra.

²² Iwui aman kasaka apam hi sāmakhao khavai ina athumwui eina mai ngareithuihaora, khalebingna zangda makhao ngasakra,

²³ kala ngachakyāng ngasakhaora. “Khikhalajila keinung hi ashee kashokwui khayonkhamāng, khangama̱ khangashaona pemtinghaowa.

²⁴ Yurbingwui ngachaili zakshimeikap kaje yurbingli athumwui shim khuikhavai ina khuirāra; athumwui langkaso pangshap chi ina ngachang ngasakhaora kala katharapam chi sāmakhaomi ngasakra.

²⁵ Sipkasā tharan chingrihai khavai phāra, kha masamphangmara.

²⁶ Ka̱lāshātwuitungli kalāshāt rāra, chankharopwui thili chankharop pemra; marānbingwui eina khamahā angahānra, kha ain chi pāngmonbingwui eina shimānhaora kala hāngkachithei chi ararnaobingwui eina shimānhaora.

²⁷ Awungana sifara, wungnaona ning thenghaora; kala ngalei chiwui mibingwui pāng khangacheena sheisha̱haora. Athumwui shongpong athishurda inala athumli sāmira, athumwui bichar athishurda athumlila bichar sāra; chieina I Prohona da athumna theira.”