EZEKIEL 6 - Kathara Bible (BSI)

Proho na Meoma̱ Khokharumli Makhamayā

¹ Prohowui tui china ili rāhānga:

² “Miwui naomayara, namai Israelwui phungreishong ngareivāda makhamayā tui marānlu,

³ kala hithāda hānglu, Israelwui phungreibing nathum, Proho VAREwui tui nganālu! Proho VAREna phungreibing kala phungrābing, kongrābing kala tampākbingli hithāda kahāngna: Yanglu, I, I eina tangdanala nathumwuitungli raighai khuirāra, kala ina nathumwui kajujuipambing sākhaimiserhaora.

⁴ Nathumwui hanphutbing ngachakyānghaora, kala nathumwui nganamkaphā riktā khavai hanphutbingla sakhaimihaora, kala nathumwui kathebing ina nathumwui meoma̱wui azingli hortāmira.

⁵ Kala ina Israel mibingwui kathingunbing chi athumwui meoma̱bingwui azingli haimira; kala ina nathumwui ara̱kui nathumwui hanphut kuimareita chaimira.

⁶ Nathumwui kapampam kachida keinung ramchohaora, kajujuipam shimānhaora, hanphutpamla chithaserra, meoma̱la sākazamhaida maphākhuithura, nathumwui nganamkaphā riktā khavai sātekmihaida nathumwui otsak saikora shimitmihaora.

⁷ Kala nathumwui alungli kathingun horphuihaira, chieina I Prohona da nathumna theira.

⁸ “Chithālala nathum ngayardale ina ringngasakra. Raighaiwui eina yāmkashokbing khangatei yurwuili yāmkhavā tharan, kala ngalei khangateili yaoyāngmi kahai tharan,

⁹ chieina mi ngaleili yāmkhavā nathum raithā kahaili khuivā kahai chitharan ili phaningungra, kaja iwui eina pākthui kahai athumwui maphākakhui ning chi ina sakhaikhami tharan, kala maphākhuilakla meoma̱li shurkazatwui mik chi ngapeo ngasakhaora; kala athum khalattawui mikyanli athum khalatta, athumna makhangayi sākahai saikora chiwui vang ningkachaira.

¹⁰ Chieina I Prohona da athumna theira; ina athumli makaphā ot hi sāra kaji hi aremali ina kahāng maningmana.”

¹¹ Proho VAREna hithāda hānga: “Israel shimkhurna makhayā ningkakachai kasāwui vang nathumwui pāng kaphelu, kala nathumwui phei kathanglu, kala, Iyavo! da hānglu; kaja athumna raighai eina, chāmrei eina, kala kazātkashi eina thira.

¹² Katāli khaleia a china kazātkashi eina thira, kala nganaida kapama a china raighai eina thira; kala mathila taihaikasābing china chāmrei eina thira. Chithāda ina iwui malungkhavāt athumwuitungli chishotta kupra.

¹³ Athumwui meoma̱bing, kuikhamareili khalei phungrābing kachiva̱li, phungreiton saikoratungli, khamatek thingphapheili, timfa kahai shirimthingpheili, kala athumna ningyāngkhaung nganamkaphā chigat khavai kachiva̱li athumwui kathingun pikatā chitharan I Proho china da nathumna theira.

¹⁴ Kala lamhāng eina thuilaga Riblah vāshungda athumwui pamkhavai pam kachiva̱li ipāng katingshoklaga shimān ngasakta ramchoserhaora. Chieina I Prohona da athumna theira.”