EZEKIEL 5 - Kathara Bible (BSI)

Ezekielna Kui Kasi

¹ “Kala na, O miwui naomayara, raighai kazana akha khuilu; sam kachichāpana kasing kuisighainao thāda nakuisam eina morhā sitāhaolu, laga khān onkhavai khuida onyanglu, kala sam chi akhum eina ngayarlu.

² Kakathuma khum chi khuilaga, keinung kuikhanam chi peikahai atam tharan, keinung lungli meili riktālu, khumkha chi keinung kuikhamareili raighai eina shātkazamlu; kala khumkha chi masili chiphanhaolu, chiwui thili ina raighai ahongwui eina sutshokra.

³ Saikora hiwui eina kateteo khuilaga nawui kachon mareili masa̱hailu.

⁴ Chiwui einala kateokha khuilaga meili horsangda riktāhaolu; chiwui eina Israel saikorawui shimkhurli mei shokra.”

⁵ Proho VAREna hithāda hānga: Hi Jerusalemna; ina ali yur saikorawui alungthungli haikahaina kala keinung kachungkhana kuinam ngasaka.

⁶ Kala ana yur kateili lāngda zakshilāk eina iwui sharphahorbingli ngakaishi, kala awui kuikhamareiwui ngalei kateili lāngda iwui shiyan chikanli mamayāmana, iwui sharphahorbing khalanhaida iwui shiyan chikan mamayonlakmana.

⁷ Chiwui vang Proho VAREna hānga: Khikhalajila nali kuikhamarei yurbingli na zakshimeida iwui shiyan chikan kala sharphahorbing mamayonla, kha nali kuikhamarei yurbingna kasāsā thishurhaoda;

⁸ chiwui vang Proho VAREna hithāda hānga: Yanglu, I, I eina tangda nathumli mamayāmana; yur saikorawui miktāli ina nathumli bichar sāra.

⁹ Kala nathumwui ningkakachai otsak saikorawui vang, ina masālakrang kaji kala naodala masāluilaki kaje ot chi sāra.

¹⁰ Chiwui vang eina nathumwui alungli avāva̱ ngarāna naongarābingli shaira; kala naongarābingna avāva̱ ngarāli shaira; kala nathumli ina bichar sāra, kala nathum kachikathāna kanshokakha ina kharingbing chi masili chiphanhaora.

¹¹ Chiwui vang eina Proho VARE ina kachangkhat eina kahāng hina, khikhalajila nathumwui masākhangayi ot, ningkakachai ot saikora chi eina iwui kathara shim sākhamāng ngasakhaoda, chiwui vang nathumli ina katathaora, imikna mayangkheilakmara, kala ina malumashanmimara.

¹² Nathum khum kathumwui akha kazātkashi eina thira kala nathumwui alungli chāmreiwui kakhum eina yumra. Khumkhana kuikhamareiwui raighaili thira, kala khum kakathumana ina masili chiphanhaida athumwui thili raighai chihovāra.

¹³ “Chithāda sāda iwui malungkhavāt chishotra, kala athumwuitungli iwui malungkhavāt hāngsangda I khalatta ningyāng ungkhuira; kala athumwuitungli iwui malungkhavāt katā tharan Proho ina mikpaishida kahāngna da athumna theira.

¹⁴ Chili lāngda ina nathumli ramchomihaida chiwui kuikhamareili khalei miyurbing kala yaokharābing chiwui ngashimshi nganao khavai sāmira.

¹⁵ “Prohona nathumwuitungli malungvātta malungkakang eina khamachin chitharan, nathumwui kuikhamareili khalei yurbingwui vang nathum khangachee otsak, hāngkhamathin, kala mana̱shi khavai ngasāra; hi Proho ina hāngkahaina—

¹⁶ nathum shimān khavai chāmreiwui malā ina kachiho tharan, ina nathumli chāmrei chungmeikhangai chungmei ngasakra, kashakazā akhala mangaphangzāmara.

¹⁷ Ina chāmrei kala ramsāla nathumwuitungli chihorāra, athumna nathumwui naongarābing shimān ngasakra; kazātkashi eina ashee nathumli rāshungra; kala ina nathumwuitungli raighai chihorāra. Proho ina hāngkahaina.”