EZEKIEL 42 - Kathara Bible (BSI)

Khorumshim Ngalemwui Shim Khani

¹ Chiwui thili ana ili atungshongwui zangkhameiya kayāngli thānshoka kala khorumshim kayāngli kāroda khalei, atungshong ngareikashang shimli yangkhangasun shim chili thānzanga,

² atungshong khalei shim chiwui asān khuining shākha kala aret hangphangāna.

³ Alung kayāng khuining maga̱ eina thuilaga ayar kayāngwui ngalung kaham eina tangda tārong mathāng kathum lei,

⁴ shim chiwui zangkhavai apong chi khuining tharā pāklaga shākha sānga; kala khāmong atungshong ngareishangsera.

⁵ Ato kā chi teomeiya, kaja ato eina azewui mathāngla tarongna apam hakmeida khuihaowa.

⁶ Mathāng kathum sai kala ayar kayāngwuili pakra̱ khalei thāda chiliva pakra̱ mavaimana; chiwui vang ato kā chi ato eina aze mathāngla teosang kahaina.

⁷ Shimli ngalengda phākho akha kayāngshong sāshoka, chiwui asān khuining hangphangāya.

⁸ Kaja shim chi kayāng ayarshong khuining hangphangā shoka, kha khorumshimli yangkhangasung chiya khuining shāshā sānga.

⁹ Shim chiwui azingli, zingshoshong zangkhavai akha lei, mibingna ayarshongwui eina zangga jiakha chieina zanga, kaja ayar shongwui

¹⁰ phākho chiwui eina haophoka. Azingshongla, kayāngli kala shim chili kāroda kā kachungkha lei,

¹¹ chiwui mangāli apong akha lei; chiya atungshong khalei kābing chi tākamhaipapama, asānla aretla ngaraichai kala shokkhavaila, khāmongphutla ngaraichai.

¹² Aze kāwui azingli zangkhavai zingshoshong akha lei, mina chiwui eina zangpai; kāroda phākho akhana mataka.

¹³ Chiwui thili ana ili hānga, “Atungshongwui kā eina azingshongwui kā kayāngli yangngasungda khalei hi kathara kāsera; Proholi khokharuma pāngmonbingna, tharmathengmeikap kaje pha̱kaphayā chi chili shaira; chili tharmathengmeikap kaje pha̱kaphayā, tharāzat kachigat, suihamchigat, khayonchigat pha̱ki kajina; kaja apam chi kathara apamna.

¹⁴ Katharapamli pāngmonbingna kazang tharan kashankachon maraila mashokpaimara, kaja hi athumna otram ngatha̱ khavai kathara otna; yaruiwui ngachaili kashok tharan khangatei ngavaishokki kajina.”

Khorumshimwui Asān-aret

¹⁵ Ana khorumshimwui alung tamkhui kahaiwui thili zingshoshongwui ngaveivāk ana ili thānshoklui kala chiwui kuikhamarei tamyanga.

¹⁶ Ana onkhavai thing chieina zingshoshong tamyangda khuining shāphangāya.

¹⁷ Ana ngareikhuilaga kuikhamarei chi tamung tamvā sai. Ana atungshong thing eina tama, kala khuining shāphangā shoka.

¹⁸ Chiwui thili ana ngareikhuilaga tamung tamvā sai. Ana azingshong chi tamyang khavai thing chieina khuining shāphangā tamkhuiya.

¹⁹ Chiwui thili ana zingtunshong ngareivāda tamkhavai thing chieina shāphangā tamkhuiya.

²⁰ Achikun mati peida tamkhui. Kuimareida phākho, kasāngla khuining shāphangā, kapākla shāphangā khalei chieina katharapam eina yarui pamli matakmi.