EZEKIEL 4 - Kathara Bible (BSI)

Jerusalem Kuikhanam Ots eina Sākachithei

¹ “Kala O miwui naomayara, chek akha khuida nawui mangāli runghailu, kala chiwuitungli Jerusalem keinungwui ama̱ sāsanglu.

² Kala kuimareida rākuikhanamwui raipan, raingavei sāsanglu, chili lāngda rāmla, shaironla kuimareida sāsanglu.

³ Kala mariphek akha khuilaga keinung eina nawui ngachaili mari ngavei sāda runghailu; kala chili yangvālaga rai kuikhanam thāda sākhuilu. Hi Israel shimkhurwui vang khamachut sākachitheina.

⁴ “Chiwui thili nawui uishong ngashunglaga pilu, kala Israel shimkhurli ina tandi miki kaji chi nali mira; kaja nana zimiksho chiyākha pilakha eina tangda athumwui tandi chi phungpamra.

⁵ Kaja ina nali zimiksho sha̱rakha phungngasakra, kum shākathum hangchiko, athumli tandi miki kajiwui zingkumli ngaraichāda phungra; kala nana chirankha khāngpamki kajina.

⁶ Kala nana chi peikahaiwui thili, pikakhane chi yāshong ngashunglaga pida Judah shimkhurwui tandi phungra; hangmatithang ina nali phungngasakra, thangkha hina kumkha kachitheina.

⁷ Nawui mai Jerusalemli kuinamkahai shong ngareivāda pāng khamasai eina keinung chili makhamayāwui tui marānra.

⁸ Kala yanglu, ina nali khara̱ eina khalaphaida nali tukkhanarwui atam mapeiranglakha eina tangda ngareishok ngareizang masāpaimara.

⁹ “Kala nana, kehu, nāpai, linglonthei, marongthei, lang kala ngum khuilaga ham akhali sangda khamui sākhuilu. Zimiksho shākathum hangchikothang nana lākhavāk ngashungda kapi atamli hi zāki kajina.

¹⁰ Kala zāki kaji onlaga ngarakzāra, thangthang shekel maga̱ zāra, thangkhali nana akhashida zāra.

¹¹ Kala tara̱la onlaga nana mangra, lengkhor akhawui khum tharuk; thangkhali mangkha shira.

¹² Nana shaiki kaji khamui chi athumwui miktāli miwui paihtungli sākhuiki kajina.”

¹³ Kala Prohona hānga, “Chithāda Israelwui mibingna athumwui khamakhao kashakazā zāra, ina kashamkhavā yur kachida.”

¹⁴ Chieina ina hānga, “Iyavo Proho VARE! yanglu, I khalatta chithada masākhamānglakranga; I nganuilakha eina thuida aja rāshungda, thāda kathisā, kha̱zursā, kala kashuisā ikhamorli masanglakranga.”

¹⁵ Chieina ana ili hānga, “Yanglu, nawui khamui sākhavai ina nali mipaihtungli maningla seipaihtungli sāngasakra.”

¹⁶ Chili lāngda ana ili hithāda hānga, “Miwui naomayara, yanglu, Jerusalemwui kashakazā ina ngarakmihaora; ngacheerang eina zāt onzāra, kala tara̱la shivamri eina tammangra.

¹⁷ Khamang kazā vātngasakta athum akha eina akha ningkazāchir eina yangngarokta kachotkachāng phungkhavai ina hithāda shokngasaki kajina.