EZEKIEL 3 - Kathara Bible (BSI)

¹ Kala ana ili hānga, “Miwui naomayara, nali khami chi shailu, akhalui hi shailu, kala vāda Israelshi shimkhurli ahānglu.”

² Chieina ina khamor makai, kala ana akhalui chi shaikhavai ili mi.

³ Kala ana ili hithāda hānga, “Miwui naomayara, ina khami akhalui hi shailaga nawuk chieina chipemlu.” Chieina ina chi shaihaowa, kala chi ikhamorli khuira̱wui kashim thai.

⁴ Kala ana ili hānga, “Miwui naomayara, Israelwui shimkhurli vāda iwui tui eina athumli ahānglu.

⁵ Kaja ana ili atui-arā makashā kala mashākhararra miwui ngaleili kachiho maningmana, kha Israelwui shimkhurlina—

⁶ nana makashā tuiyur khangatei kala bhap matākhararra tui khamatui miyur kachungkhawui mangāli maningmana. Kachangkhat eina chikathāpamli nali chihosi kaja athumna nawui tui nganāsangra.

⁷ Kha Israelwui shimkhurna nali manganāsangmara, kaja athumna iwui tui manganāngaimana. Khikhalajila Israelwui shimkhur saikora mai kashāmāng kala wuklung khamakangmānga.

⁸ Yanglu, athumwui mai kashā, khayā makhangarin thāda ina nalila maishā ngasakhaira.

⁹ Nakhavei khamarar marili mararmeida sāmihaira; athumli mangacheealu, kala athumwui azakli mangacheealu, kaja athum hiya ngakaikashe shimkhurna.”

¹⁰ Chili lāngda ana ili hānga, “Miwui naomayara, ina kahāng saikora hi nganātitkhuida nawuklungli hailu.

¹¹ Kala vāda, nawui raithā kahai mibingli, ‘Proho VAREna hithāda hānga’; da athumna khuisanglala makhuisanglala ahānglu.”

¹² Chiwui thili Manglā china ili khāngkāhaowa, kala Prohowui tekhamatei chi apam chiwui eina kāmamān kaji eina, iwui khanukshong neina̱ kakhanukwui khon shai;

¹³ chi sāyurbing chiwui angachāng eina angachāng saza̱ khangarok, kala chili lāngda kāngphei chiwui akhon china neina̱ kakhanuk kathāwui akhon kashokna.

¹⁴ Manglā china ili khāngkāda khuithuihaowa, kala iwuitungli Prohowui kapanga pāngkaparwui vangna ining chotlakhaowa;

¹⁵ kala Chebar kong ngalemli raithā kahaibingna pamkhavai Tel-abibli ina vai. Chili chotnahaoda athumwui alungli shinithang apama.

Israelli Yangkhame

¹⁶ Kashine thangwui apeilam Prohowui tui chi ili rāhānga:

¹⁷ “Miwui naomayara, Israel shimkhurwui vang ina nali khamayona akha sāngasakhaira; ikhamorwui eina kahahāng tui chi nana kashā tharan athumli iwui miktāli hāngmathinmiki kajina.”

¹⁸ Makhayā mili ina, na thiphalungra da hānglaga nana ali mahāngmathinakha, kala kahui samphang khavai awui makhayāwui eina ungkhavai kahāngla ali mahangchitheiakha, makhayā mi chi awui moreiwui vang thiphalungra, kha awui ashee nawuitungli tāra.

¹⁹ Kha nana makhayā mili hāngmathinlaga ana awui makhayā otwui eina, lah makaphā apongwui eina malatungakha, awui khayonkhamāng alungli thiphalungra; kha nali huimihaora.

²⁰ Latluida, “Kalikha khamashunga mina awui khamashung khangarongwui eina ngareithuihaiakha, kala ina ali phei ngaphok khavai saakha, a thiphalungra; khikhalajila nana ali mahāngmathinmana, awui moreiwui vang a thiphalungra, kala ana khangarong otsak kasa saikora maphaningungmara; kha awui ashee nawuitungli tāphalungra.

²¹ Kalikhada nana khangaronga mi chili morei masā khavai hāngmathinakha, kala ana morei masaakha, ā ringlakra, khikhalajila ana hāngkhamathinli khuisanga; kala nalila namanglā huimira.”

Ezekiel Khak Khangasha̱

²² Kala Prohowui pāngna iwuitungli ngasomi, kala ana ili hānga, “Ngakarthuilu, tampākshong vālu, chili ina nali hāngra.”

²³ Chieina ina ngakarthuida tampākshong vai, kala yanglu, Chebar kongpheili ina tekhamatei kathei chi tākam eina Prohowui tekhamatei chi theida ngakhumshāmzanghaowa.

²⁴ Kha Manglā china ili zangda khangmathota, kala ili matuida hithāda hānga, “Zatlu, nawui shimli na khalatta khāmong ungtākphinhaolu.

²⁵ Kala, O miwui naomayara, yanglu, seipeng nawuitungli parda nali chieina khalaphaora, chieina nana mibingwui ngachaili zatung zatvā masāpaimara;

²⁶ kala ina namale akārakli nganarshanmihaora, chieina na khak ma̱haoda athumli mahāngmachinpaimara; kaja athum ngakaikashe shimkhurna.

²⁷ Kha ina nali khangazek tharan ina nakhamor shomida nana matuipaida athumli, ‘Proho VARE china hithāda hānga’ da hāngra; nganāki kaje china nganākhuiranu, manganāki kaje china manganaaranu; kaja athum ngakaikashe shimkhurna.”