EZEKIEL 23 - Kathara Bible (BSI)

Morei Pungkhamataiya Chonnaoni

¹ Prohowui tui chi ili rāhānga:

² “Miwui naomayara, ava̱ akhawui naongalāva̱ khani leisai;

³ anina Egyptli khayorwui ot sai; ani nganuilakhawui eina thuida khayorwui ot sai; sungthei singnganao ngasaka, kala mongkhuila mayutnganao ngasaka.

⁴ Khararva̱li Oholah hoi, agatuiva̱li Oholibah hoi. Ani iwui ngasāhaowa, kala anina mayarnaola sha̱naola pharākhui. Oholah kaho hiya Samaria kajina, kala Oholibah hiya Jerusalem kajina.

⁵ Iwui ngasāsālala Oholahna khayorva̱̱wui acham sāzata; kala ana awui leikashe Assyriabing,

⁶ hungrisi kachon khangavai rai kapingbing, ngalei khamungbing, raimi kathānabing, mayar khamathāthābing, kala sigui raimibinglila ngahānngailaka.

⁷ Assyriawui yārkhokhoka khamathāthābingli ngasopi, kala ana ngahānkhangai saikorawui meoma̱ chieina akhalatta sākhamangkhui.

⁸ Egyptli leilakha khayorva̱̱wui acham kasā chi mathāhailakmana; kaja a nganuilakha yaronnaobingna ali ngasopida awui sungthei singnganaoda ngasopichinga.

⁹ Chiwui vang eina ina awui leikashe Assyrianaobingwui pāngli horsangmi kahaina.

¹⁰ Athumna awui khayā lāna; athumna awui naobing sha̱naola mayarnaola tukkhui; kala athumli raighai eina shaothata; kala awuitungli bichar kasā tharan sha̱naowui ngachaili tantakchān ngasāvaihaowa.

¹¹ “Achināva̱ Oholibahna hi thei, chithālala khamathanglungli achināva̱li ana zakshimeida khayorva̱̱wui ot sai, achinaova̱wuili zakshimeikhara.

¹² Ana Assyriawui khamungbing, raimi kathānabing kala rai sāri peida shakkasābing, sigui raimibing, kala mayar khamathāthābingli ngahānngailaka.

¹³ A sākhamānghaira kaji ina thei; kala ani khanini apong ngaraichāda zata.

¹⁴ “Kha ana awui khayor otsak zakshimeida savai; Chaldeanaobingwui ama̱ machu shoklak eina yeklaga phākholi hokthāng kahai chili leishi,

¹⁵ athumwui kashānli khanjat neida, kuili kakhanonga kuitei teilaga otva̱wui kathāna Chaldeawui eina kharā Babylonwui mi thai.

¹⁶ Chi theilaga ana athumli ngahānngailakhaowa, kala Chaldeali paome chihovai.

¹⁷ Kala Babylonnaobingna rāngasopiya, kala athumna athumwui khamathang chieina ali sākhamanghaowa; athumna ali sāmakhaomi kahai thili, ana athumwui eina ningkachaida thuihaowa.

¹⁸ Ana phonglāk eina khayorwui acham sāzata kala khamahong chitheikazat chi theilaga achinava̱wui eina ina thuikahai thāda, ina awui einala ningkachaida thuihaowa.

¹⁹ Chithālala nganuilakha Egyptli khayorwui acham sākasā chi machihohailakmana, kala mataikhangai mataida sai,

²⁰ kala ana gadhāwui thāda khayā kahaka, kala siguiwui thāda pha̱ra̱ khaunga athumli ngahānngailaka.

²¹ Chithāda sāda Egyptnaobingna nakhaishāng mayutlaga sungthei singnganaoda sopkhamasāp chili nana kahaosai.”

²² Chiwui vang eina, O Oholibah, Proho VAREna kahāngna: “Yanglu, nana ningkachaida horkahai nawui leikashiabing chili ina ningmathuk ngasakta apam kachiva̱wui eina nali mamayāmara:

²³ Babylonnaobing, kala Chaldeanaobing, Pekod, Shoa, kala Koa; Assyrianaobing, mayar khamathābing, lammungabing, raimi kathānabing, otva̱bing, kapingabing, sigui raimibing, athum saikora,

²⁴ atungshong eina, talla̱, chāngvei, kuirop sangda nali rāngararra; kala ina athumli bichar sāngasakra, athumwui ningkachāng athishurda athumna nali bichar sāra.

²⁵ Kala athumna sāshilak eina sāngasak khavai iwui malungkhavāt nawuitungli tāra. Athumna nathumwui nātangla, khanāla rimtāmira, kala kataibingna raighai eina thira. Athumna nanaomayara kala naongalāva̱bing tukkhuira, kala katai khangateibing chi mei eina chuithatra.

²⁶ Athumna nawui kashankachon raimathāmihaida, chara̱-chāsān khamathāthā ngapaithuihaora.

²⁷ Chithāda ina Egyptwui eina phungkharā nawui sokhamasap, khayorawui acham chi tangngasakra; chieina nana Egyptnaobingli mayangkāluimara lah akhala maphaningungluimara.”

²⁸ “Kaja Proho VAREna hānga: Yanglu, nana ningkakachaiya kala yangkakharinga athumwui pāngli ina nali horsangmira;

²⁹ kala athumnala nali yangkharingda sāra, kala nana khanangda sākahaiwui heithei saikora ngapaikhuiserhaora, kala nali mahonghat haimira, kala nawui khangashāmwui khamahong chitheimira. Nawui khamathang kala khangashāmna

³⁰ nawuitungli hi khuikharāna, khikhalajila nana yurbingli khayorwui acham sāzata kala athumwui meoma̱ eina nakhalatta sāmakhaowa.

³¹ Na nachinava̱wui athi shurthuihaira; chiwui vang eina awui tengkot napāngli ina mira.”

³² Chiwui vang Proho VAREna hānga: “Nachinava̱wui khorām nana mangra, chi haklaka, kapemla pemtinghai; nali mibingna theida mana̱shira, kazeila zeira, kaja chili kachungkha zanga;

³³ nali khamarip kala wukkakhanang chipemira. Khangachee khangachā eina ngachakyāng kahaiwui khorām, nachinava̱ Samariawui khorāmna;

³⁴ nana chi mangkupmihaora kala nawui kuisam sheishokra kala namathik serkazamra; kaja ina hānghaira da Proho VAREna hānga.”

³⁵ Chiwui vang Proho VAREna hānga: “Ili nana malaihaida kala nawui khanukshong haikahaiwui vang, ara nawui khamathang kala khayorva̱̱wui acham sākazatwui sāman phunglu.”

³⁶ Prohona ili hānga: “Miwui naomayara, na Oholah eina Oholibahwuitungli bichar masārakhala? Chithākha aniwui ningkakachai ot sākahai chi phongmiserlu.

³⁷ Kaja anina phophāhaoda, chiwui ashee aniwuitungli lei; athumwui meoma̱lila anina phokaphā ot sai, athumli kashakazā sākhavai ili pharākhami naomayarabing eina tangda pha̱phayai.

³⁸ Chili lāngda ili hithāda sai: chithang iwui kathara shim makhao ngasaka kala iwui sabbath sākhamānghaowa.

³⁹ Kaja anina anaomayarali aniwui meoma̱li pha̱phayā khavai shaothatthang, chithang ngalāngda anina iwui shim sāmakhao khavai zanga. Yanglu, hina anina iwui shimli kasa chi.

⁴⁰ “Anina apam katāva̱li khalei athum eina tangdalila ahokhui khavai mi chihovāda athumna rai. Athumwui vang nana ra̱vai mathai, mikli neowa, kala na khalatta sāri-khongnāng hiyāyā ngathet ngachai.

⁴¹ Pamkhong khamathā mashonshei kahaili pama, mangāli table runghaida chiwuitungli iwui nganamkaphā ot kala thao ayuryur haihai.

⁴² Zaikazā ashangva̱wui akhonna ali kuinama, kala khikha masā khavai khamaripnao lamhāngwui eina ahokhuida athumna anili kazao sangmi kala kuihonla khamathāthāva̱ ngahonmi.

⁴³ Chieina ina hānga, Ali khangashāmbing hila phokaphā maningmala?

⁴⁴ Kaja khayorva̱̱ sha̱naoli khangaso thāda athumnala ali ngasoi. Chithāda Oholahli kala Oholibahlila somasap khavai athumna phārai.

⁴⁵ Kha khangarongbingna athumwuitungli phokaphāwui shongrān lāngra, sha̱naona ashee tākhangasakwui shongrān eina; kaja ani phokaphā sha̱naona, kala aniwuitungli ashee lei.”

⁴⁶ Kaja Proho VAREna hithāda hānga: “Rasākazammihaida mina yanglaga khangachee-khangachā sākhavai mi kachungkha khuirālu.

⁴⁷ Khara ashangva̱ china ngalung eina anili horthatra, kala raighai eina shātthatra; sha̱nao mayarnao athumwui naomayarabing shaothatserra kala athumwui shim meili riktāra.

⁴⁸ Chithāda sāda ngalei hili sokhamasāp ot masā ngasakluimara, kala anina kasā thāda sha̱nao khangateina masāleng khavai sāchitheira.

⁴⁹ Kala nana sokhamasāpwui vang kashong sāphalungra, kala meoma̱li phaningda morei kasāwui kashong runphalungra; chieina, I Proho VAREna da nathumna theira.”