EZEKIEL 21 - Kathara Bible (BSI)

Proho wui Kazana Raighai

¹ Prohowui tui chi ili rāhānga:

² “Miwui naomayara, namai Jerusalemshong ngareivāda kathara shimli makhamayā tui hāshoklu; kala Israel ngaleili makhamayā tui marānmida hānglu,

³ kala Israelwui ngaleili hānglu, Prohona hithāda hānga: Yanglu, ina nali mamayāmana, iwui raighaihon eina raighai sutshokra, kala khangarongala makhayaala nathumwui eina khuithuihaora.

⁴ Khikhalajila ina nawui eina khamashunga eina makhayā khanini khuithuihaida, azingshong eina thuilaga atungshongwui asā khavai kachiva̱li raighai eina chithitra;

⁵ chieina mi kachiva̱na, Proho ina raighai ahon eina sutshokhaira kaji theikhuira, kala ahonli mahonsangluimara.

⁶ “Chiwui vang eina sifalu, miwui naomayara, athumwui miktāli wukkhanangda sifalu kala khanangchitheilu.

⁷ Kala athumna nali, ‘Khiwui vang sikafa?’ da hāngakha nana, ‘Pao chiwui vangna. Chi ungkashung tharan, mi kachiva̱wui ning thenghaora, kala apāng saikora pangshap maleimara, manglā saikora vānhaora kala khuksao saikora tara̱ thāda ngazanhaora. Yanglu, chi rārāli, kala chi mashoila shoklakra’ da Proho VAREna hānga.” da hāngra.

⁸ Kala Prohowui tui chi ili rāhānga;

⁹ “Miwui naomayara, marānmida hānglu, Prohona hithāda hānga: Hānglu: Raighai, raighai kharāhaira, kala kashutkharikhaira;

¹⁰ shaothat khavai kakharāna, rikhān thāda hingkhavai kakashutna! Maningkha nathum lumlaofarala? Inao nana thing eina kasā lijei saikorali ningkachai.

¹¹ Chiwui vang eina singpai khavai raighai hi kharā kahaina; shaokathatapāli mikhavai kashutkharik kahaina.

¹² Sifada chapngachālu, miwui naomayara, iwui mibingli sākikajina; Israelwui wungnaobingli sāki kajina; athumli iwui mi saikorali ngasoda horsang kahaina. Chiwui vang nakhaishāngli shātlu.

¹³ Kaja chi tamyangki kaji maningmana—nana lijeili ningkachaiakha china khi sarakhala?” da Proho VAREna hānga.

¹⁴ “Chiwui vang eina miwui naomayara, marānmilu, napāng kaphelu kala raighai chi khanishida, mha, kathumshida shātthatki kajibingwui vang ngawutlu; hakkhamahā shaokathatwui raighaina, athumli kuikhanama,

¹⁵ athumwui malung tātung khavai, kala athumwui ngavei kachida kachungkha pitai. Ina kahinga raighai chi mihaira; iyah! chiya rikhān khangashei thāda sai, chi sāthat khavai kashutkharika.

¹⁶ Uishongla yāshongla nawui raighaitonna kachiza̱li shātlu.

¹⁷ Ila ipāng kaphera, kala iwui malungkhavāt ningyāngkhaung sākhuira; Proho ina hāngkahaina.”

Babylon Awungawui Raighai

¹⁸ Prohowui tui chi ili rāhāngluishita:

¹⁹ “Miwui naomayara, Babylon awungawui raighai rākhavai apong khani yeksanglu, apong khani chi ngalei akhawui eina rāthathuiki kajina. Kala keinungli vāzang khavaiwui shongfa chili machut-pakra̱ akha shunlu;

²⁰ raighai chi Ammonwui Rabbahli vākhavai kala ngaziplak eina sākahai Judahwui Jerusalemli rākhavai apong akha yeksanglu.

²¹ Kaja Babylon awungana shongfa ngapakli nganinga, shongfa khani ngapak khavai haokaphokpamli khanongli kachishongrakhala da ngasan khavai, ana malāthing khanuka, teraphimli ngasana, ana amathinli yanga.

²² Khamor makāda vaokhavai, raikhotkhon vaokhavai, ngavei mashir khavai, ngalei thonglaga raipan yakkā khavai, awui yāpangli ungkatā kalā chi Jerusalemwui ngasāhaowa.

²³ Kha athumwui vanga hi makhamashunga leivā khayang thāhaowa; athumna tuingashit sāngarum kahaina; kha ana athumwui khangui phaningungra, chiya athumli tukkhui khavai vangna.

²⁴ “Chiwui vang Proho VAREna hānga: Nathumwui khayon phaningung khangasakwui vang kala sākhamakhao saikora phongmi kahaiwui vang nathumwui morei kasāsā theiserhaoda nathum chieina thira.

²⁵ O makathara, makhayā Israelwui wunganao, nawui atam, tandi miki kajiwui khanaowa atam rāhaira,

²⁶ Proho VAREna hānga: Nawui kuitei kala wungkuihon khuihaolu; khalei chi maleichingmara; khangazanali sochikatra, khangamali nemngasakra.

²⁷ Ja̱katā, ja̱katā, ina ja̱tā ngasakra; samphangrānpā chi marāranglakha eina tangda amei amā maphākhuimara; kala chi ina ali mira.

Ammonnaobing kala Raighai

²⁸ “Miwui naomayara, marānlu kala hānglu, Ammonnaobingwui kala athumwui zeikakharuiwui pongli Proho VAREna hānga: hānglu, shaothatki kajebingwui vang raighai sutshokta samathāhaira, hingkhavai kala rikhān thāda ngashei khavai—

²⁹ athumna nathumwui vang makhamashung phongmilala, athumna kapikta marānlala—makathara makhayāwui kahungli athumwui khanaowa tandi ngachāmi khavai atam chi rāhaira.

³⁰ Raighai ahonli sanghaolu. Nathumli pharā khavaipam, kachichāramli ina bichar sāra.

³¹ Kala ina iwui malungkhavāt nathumwuitungli chihotāra; Iwui malungkhavātwui mei nathumwuitungli malirorra; kala sākashimān kathema, sakashebingwui pāngli ina nathumli horsangmira.

³² Nathumwui phasā rikkhavai thing sāra, nathumwui ashee ngalei ngayāda longra; nathumli khipākha maphaningungluimara; kaja Proho ina hānghaira.”