EZEKIEL 15 - Kathara Bible (BSI)

Drakhārongwui Chānjam

¹ Kala Prohowui tui chi ili rāhānga:

² “Miwui naomayara, khararli kathuia paisara̱na thingli kayakha phameikhala?

³ Khara̱ hiwui eina khiotkha thing thāda savaipaila? Kala hiwui eina ahunnao akha khuilaga khorkhong hokthang khavai sākakhuila leila?

⁴ Yanglu, meili riktā khavai sanga; meina angahun khaninishong chuitāda; alungthung chuihun kahai katai chi sākhavai khi leikhala?

⁵ Yanglu, pongda leilakhala khikha masāvaimana; chithakha meina chuihunhaida zikrik kahai china khi sāvailuira?

⁶ “Chiwui vang Proho VAREna hānga: Ngahongthingwui alungli kaphora paisara̱ ina meili riktā khavai kasang thāda Jerusalemwui mibinglila ina chithāda sāra.

⁷ Kala ina athumli mamayāmada mai ngarei khangasung itharan, meiwui eina yāmshoklala mei eina thipapamra; ina athumli mamayāmada mai ngarei khangasung chitharan, I Prohona da nathumna theinaora.

⁸ Kala athumna mashitsanglakla kasāwui vang ngalei hi ramcho sāmihaora da Proho VAREna hānga.”