EZEKIEL 12 - Kathara Bible (BSI)

Israelli Raithāki kaji Sākachithei

¹ Prohowui tui china ili rāhānga:

² “Miwui naomayara,” ana hānga, “Na ngakaikashe shimkhur, theikhavai mik kālala makatheibing, shākhavai khanā kālala makashābingwui alungli pamdalei

³ kaja athumna ngakaikashe shimkhurna. Chiwui vang eina, miwui naomayara, raikathānaowui ot shaksālaga athumwui miktāli ngashunshong, raithā kahai thāda nana nawui pamkhavaiwui eina apam khangateili vaulu. Ngakaikashe shimkhurna jilala athumna theikhuilapai.

⁴ Raithā kahai mina kasā thāda otrom chi ngashunshong athumwui miktāli khuirāda nana athumwui miktāli ngazin zatphoklu.

⁵ Athumwui miktāli phaklāng kashophutlaga chieina ngara̱shoklu.

⁶ Athumwui miktāli otrom chi yārtuili phungkhuida, ngayāshong zatlu; na ngalei chi mathei khavai nawui mai romra, kaja Israel shimkhurwui vang machut khavai nali sāchithei khangasakna.”

⁷ Kakaso chi tākam eina ina sai. Raikathāwui otrom kathā iwui otrom ngashunshong khuishoka, kala ngazinshong ipāng eina phākho kashophuta; kala athumwui miktāli otrom yārtuili phungda ngayāshong zata.

⁸ Ngathorshong Prohowui tui china ili rāhānga:

⁹ “Miwui naomayara, ngakaikashe shimkhur, Israelwui shimkhurna nali, na khi kasākhala? da mahāngmala?

¹⁰ Athumli hānglu, Proho VAREna hithāda hānga: Khamarān tui hi Jerusalemwui wungnaobing kala chiwui alungli khalei saikorawui pongli kahāngna.

¹¹ Hānglu, ina kasā hi nathumwui vang sākachitheina: Ina kasā thāda athumli sāra; athumna raikathāli vāra, tukthuiserhaora.

¹² Kala athumwui ngachaili khalei wungnao china awui otrom yartuili phunglaga tangkhamangli zatra, apāng eina phākho kashophutlaga, chieina ngara̱shokra; kala ngalei chi amik eina mathei khavai mai romlaga zatra.

¹³ Kala ina iwui khalen eina ali horkhuira, kala a iwui khalenli manhaora; kala Chaldeanaobingwui lam Babylonli khuivāra, chithālala ana matheimara, kala a chili thira.

¹⁴ Kala ali kuimareikapambing, ali khangachonbing, awui raimi saikora ina masili chiphanhaora, kala athumwui thili ina raighai chihora.”

¹⁵ “Miyurbingwui alungli kala ngalei kachiva̱li ina chaiyāngva kahai tharan I Prohona da athumna theira.

¹⁶ Kha athumwui ngachaili teomeikha, raighai, chāmrei kala kazātkashiwui eina yāmshok ngasakra; chithāda athumna khavāvā miyurbingwui alungli athumwui ningkakachai otsak chi phaninglaga ning ngateiungda I Prohona kaji theikhuipaira.”

Kakathira Marānwui Khamachut

¹⁷ Chili lāngda Prohowui tui china ili rāhānga:

¹⁸ “Miwui naomayara, nawui zāt ngarakri eina zālu, kala tara̱la chihuiran eina manglu;

¹⁹ kala ngalei chiwui mibingwui pongli hānglu, Israelwui ngaleili khalei Jerusalemwui mibingli Proho VAREna hithāda hānga: Athumna kashakazā ngarakri eina zāra, tara̱la chihuiran mangra; khikhalajila hili somkapambingna sākashi otmāng kasāwui vang athumwui ramli khalei saikora khuithuihaora.

²⁰ Kala mina pamda khalei keinungbing sākathānmihaora, kala ngalei chi ramcho ngasāhaora, chieina I Prohona da nathumna theikhuira.”

Hāngkakasai Chānsam

²¹ Prohowui tui china ili rāhānga:

²² “Miwui naomayara, Israel ngaleiwui pongli nathumna chānsam sāda, ‘Atam kasāngkhahaira, kala mahākhami akhala akachang mazanglakmana’ da kahāng chi khikhala?

²³ Chiwui vang eina athumli hānglu, ‘Proho VAREna hithāda hānga: Chānsam kasā hi ina ngalatmihaora, kala chi athumna Israelwui alungli chānsam masāluilakmara.’ Kha athumli hānglu, mahākhami kachiva̱ ungshungki kaji atam nganaihaira.

²⁴ “Kaja Israelwui alungli makhamashunga khamahā kala sotkhamasaowa khanong tui maleiluimara.

²⁵ Kha Proho ina hāngki kaji chi ina hāngra, kala makahatla ungshungra. Chi masāngluimara, kha nawui atamle, O ngakaikashe shimkhur, ina tui chi hāngtāra kala ungshung ngasakra,” da Proho VAREna hānga.

²⁶ Latluida Prohowui tui chi ili rāhānglui:

²⁷ “Miwui naomayara, yanglu, Israelwui shimkhur athumna, ‘Ana kathei khamahā chi kasāngkhahaira, kala khamarān hi anaolamshongwui vangna’ da hānga.

²⁸ Chiwui vang eina athumli hānglu, Proho VAREna hānga: Iwui tui akha eina tangda mayansāngmara, kha ina hāngkahai tui chi ungshoklakra da Proho VAREna hānga.”