EZEKIEL 10 - Kathara Bible (BSI)

Khorumshimwui Tekkhamatei Thuikahai

¹ Chieina ina yanga, kala yanglu, cherubimwui kuitungli sirāram khaleiwui atungli sapphirewui wungpamkhong thāda akha thei.

² Kala ana khamenga kachon khangavaipā chili hānga, “Cherubimwui azingli kāngphei khanganing chiwui ngachaili vālu, kala cherubimwui eina chuida khalei meithā napāng pemda homkhuilaga keinung peida yaoyāngmihaolu.” Ana iwui miktāli khavā chi thei.

³ Mi china khavā tharan cherubimbing chi shimwui azingshong nganingsai; kala alung kayāng chi muiyāna pemhaowa.

⁴ Kala Varewui tekhamatei chi cherubimwui eina zangkhavai khāmongphei atungshong kāhaowa, kala shim chi muiyāna pemhaowa, kala kayāng katonga Prohowui tekhamatei kahor china pemtinghaowa.

⁵ Kala cherubimwui angachāngkhon chi, pangshapa Varena khamatui thāda, ayar kayāng eina tangdala shāshoka.

⁶ Kala ana khamenga kachon khangavaipā chili, “Cherubimwui ngachaili nganingda khalei kāngpheibingwui eina mei chi khuilu” da kakaso tharan ana kāngphei akhawui ngalemli anganinga.

⁷ Kala cherub akhana cherubim ngachaiwui eina pāng katingshokta cherubimwui ngachaili khalei mei chi kakhuilaga khamenga kachon khangavaipāli khami eina, ana chi khuilaga thuihaowa.

⁸ Cherubbingwui angachāng zingli mipāng thāda kai.

⁹ Ina khayang eina yanglu, cherubbingwui ngalemli kāngphei mati thei, Cherub ava̱va̱wuili ava̱va̱ lei; kala kāngphei chiwui azak phikphik khangashei chrysolite thai.

¹⁰ Kala athumwui matiwui azak chi ngaraichāsera, kāngphei akhawui alungli kāngphei akha khalei thai.

¹¹ Athumna kazat tharan, mangareikhuila, kachichāwui mangāshong angatar eina zata; kha mangāshong khalei kāngphei china khavāvāli kateibingna mangareiungla shurzata.

¹² Kala kāngpheibingwui akhuibing, akasui, kāngphei katonga kuikhamareili amik kāsera, kāngphei matiti chi leisera.

¹³ Kāngpheibing chili, iwui miktāli khanganinga kāngphei da hoi.

¹⁴ Saikora amai matiti kai: amai khare chi cherub maina, kakhane chi mimaina, kakathuma kazingkha̱ maina, kala khamate chi khalāng maina.

¹⁵ Cherubim china yongkāhaowa. Chebar kongli ina kathei kharingyurbing china.

¹⁶ Cherubbingna kazat tharan akāngbingla athumwui ngalemli zata; kala cherubbingna athumwui angachāng hārlaga yongkakā tharan, kāngpheibing china athumwui eina mayāmana.

¹⁷ Athumna kasaikha khanganing tharan athumla kasaikha nganingra, kala athumna yongkakā tharan yongkāra; kaja kharingyur chiwui manglā athumwuili lei.

¹⁸ Chiwui thili Prohowui tekhamatei chi shim khāmongpheiwui eina cherubbingwuitungli kānganinghaowa.

¹⁹ Kala cherubbing china iwui miktāli angachāng hārlaga okathuiwui eina yongkakā tharan kāngpheibing chila ngasoda yongkai kala athum Prohowui shimwui zingshoshong khalei khāmong chili nganinga; kala Israelwui Varewui tekhamatei chi athumwuitungli leisai.

²⁰ Chebar kongli Israelwui Varewui azingli leilakha ina kathei kharingyurbing chi hibingna kala athum chi cherubsera da ina thei.

²¹ Ava̱va̱wui amai matiti lei, angachāngla matiti phona, kala angachāng zingli mipang thāda kai.

²² Athumwui ngaraikachā mai chi Chebar kongli kathei chiwui azak chilaka. Athum kachiva̱na angatar eina mangāshong zatsera.