EZEKIEL 1 - Kathara Bible (BSI)

EZEKIELLI VARENA MAHAMIKHARE Varewui Wungpamkhong

¹ Kathumra kākashung kum, khamate kachang chiwui zimiksho kaphangāthang, raithā kahaibingli ngasoda ina Chebar kong ngalemli leilakha, kazingram khāmong shohaida, Varena mahākhami ina thei.

² Kachāng chiwui kaphangāthang (Awunga Jehoiachinli raithā kahai kaphangā kumna,)

³ Chaldea ngaleiwui Chebar kongpheili Prohowui tui chi Buziwui naomayara Ezekiel pāngmonli rāhānga; kala Prohowui pāng chi awuitungli rāpara.

⁴ Ina yangda leilakha, yanglu, atungshongwui eina siphan zingrot ngasha̱da, muiyā kashāva̱, kuimareida horchāmri eina mei horshon-horthaida, meilung chi pithrai ruimaling kahai kathā akha shoka.

⁵ Kala chiwui alungwui eina kharinga sāyur tākam eina mati shoka. Athumwui azak chi hithai: miwui angum thai,

⁶ kha athum kachiva̱ amai matiti kai, kala angachāng matiti kai.

⁷ Athumwui phei ngatarteihai, kala athumwui pheimayā seinaopheithai, kala pithrai kashutkharik kahai thāda hinga.

⁸ Angachāngwui azing ayar matili mipāng kai. Athum matiwui zakmai kala angachāngbing chi hithai:

⁹ angachāng akha eina akha ngasuna, athumna kazat tharan mangareiungla kachichāwui mangāshong angatar eina zata.

¹⁰ Athum matiwui amai chiya, mangā mimaina, yāshong kazingkha̱maina, uishong mukkāmaina, kala khanukshong khalāngmaina.

¹¹ Athumwui mai chi chithai. Athumwui angachāngbing chi atungli harkai; sāyur kachiva̱ angachāng khanini kai, akhawuina khangateiwuili angasuna, kala khangatei khani china athum phasāli farorripa.

¹² Kala athum kachiva̱ angatar eina mangāshong zata; manglāna kazazat chili mangareiunglakla zata.

¹³ Kharinga sāyurbing chiwui alungthungli meithā khamaling thāda kala meirā shārung sharvā kasā thāda kharinga sāyurbing chiwui alungli ngatha̱ung ngatha̱vai; mei chi horlaka, kala mei chiwui eina rikhān ngasheishoka.

¹⁴ Kala kharinga sāyurbing china rikhān khangashei thāda yongung yongvā sai.

¹⁵ Ara ina sāyurbing chili yangda leilakha, kharinga sāyurbing ava̱va̱wui ngalemli kāngphei akharip ngaleili rungkahai chi thei.

¹⁶ Kāngphei chiwui azak kala sākakhui asak chi hithai: athumwui azak kahāna chrysolite thai, matiti chi ngaraichāsera, athumli sākakhui chi kāngphei akhawui alungli khangatei akha khangashom thai.

¹⁷ Athumna zatakha, mangareiunglakla, kachichāwui mangā angatar eina zata.

¹⁸ Kāngphei mati chi akhuithing leisera, kala kasuila kāsera, kala akhuithing kuikhamareili amik pemda kai.

¹⁹ Kala kharinga sāyurbing china zatakha kangpheibing chila athumwui ngalemli zata, kala ngaleiwui eina kaakha athumla kai.

²⁰ Manglāna khavāvāpam kachida athumla shura; kaja kharinga sāyurbing chiwui manglā kāngphei chili lei.

²¹ Athumna zatakha zatra, nganingakha nganinga; kala athumna ngaleiwui eina kaakha, kāngbing chila ngasokai; kaja kharinga sāyurbing chiwui manglā kāngpheibing chili lei.

²² Kharinga sāyurwui kuishakli horchamri kahai khamasai thāda mathingrik eina athumwui kuitungli horshoka.

²³ Sirāram chiwui azingli athumwui angachāng ngatartei eina hārshokta akhawuina akhali ngasunkhui; kala sāyur ava̱va̱wui angachāng khanina phasāli farorripa.

²⁴ Athumna kazat tharan angachāngwui khon kongrā kachungkha kathuikhon thāda ina shai, Sāshap pangshapawui kazing khangashum thai, kala rai ashangva̱wui ngawunrop kahai akhon thai; athumna kasaikha nganinghaiakha athumwui angachāngbingla haizanghaowa.

²⁵ Athumna angachangbing haizanghaida kasaikha khanganing tharan, athumwui kuishakli khalei sirāram chiwui eina akhon akha vaotai.

²⁶ Athumwui kuishakli khalei sirāram chiwuitungli wungpamkhong khangamāna sapphire thāda thei; kala wungpamkhong khangamān chiwuitungli kapama chi mizak thai.

²⁷ Awui kashān katha chiwui eina thuilaga atungshong meili ruimaling kahai kahinga pithrai thai; kala awui kashān kathā chiwui eina thuilaga azingshong chiya meiwon thai, kala ali kuimareida horchamri hai.

²⁸ Kazing rothang changjeengawut kashok thāda, kuimareida kahor chila chithai. Prohowui tekhamatei zak chi chithai. Kala ina chi kathei tharan ngakhumsanga, kala khamatui akhon akha ina shai.