ESTHER 9 - Kathara Bible (BSI)

Jehudibingna Yangkashibingli Shaokathat

¹ Chitharan kachāng tharāda kakhane, Marun kachāngwui zimiksho tharāda kakathumathang, awungawui kakaso athishurda sāki kaji Jehudibingli sāmira da leikasā chi, ngacheilaga yangkashebingli Jehudibingna khayuiya zimiksho ngasāhaowa,

² Awunga Ahasu-eruswui ngalei saikorali vāpeida khalei Jehudibingna athumwui keinung kachida kazipkhuilaga, athumli saza̱kida kasābingli sāmi khavai ngarānhaowa. Khipānakha Jehudibingli mangasunglengthuwa, kaja athumli khangachee chi yur saikorali raza̱haowa.

³ Ngalei chiwui wungnaobing, rammungabing, satrapbing kala wungnao otshinmebing saikorana Jehudibingli ngachonmi, kaja athumwuitungli Mordecaili khangachee rāshungserhaowa.

⁴ Kaja awungawui shimkhurli Mordecai hakmahālak kahai sathuihaowa, kala ngalei saikora vāpeida awui mingkhamayāng ngayaovāhaowa; kaja Mordecai kaho mipawui pangshap reikhangai reisanghaowa.

⁵ Chithāda sāda Jehudibingna, athumwui yangkashe saikorali raighai eina sāthatta athumli shimān ngasaka, kala athumli yangkashebingli athumwui ningyāngkhaung sākhui.

⁶ Susawui keinungmānglila Jehudinaobingna mi shāphangā shaothata,

⁷ kala sākathat chili Parshan-datha, Dalphon kala Aspatha,

⁸ kala Poratha, Adalia, Aridatha,

⁹ Parmashta, Arisai, Aridai kala Vaizatha,

¹⁰ Hammedathawui naomayara Jehudili yangkashe Hamanwui anaomayara ashi tharā; kha athumwui ot mangaponkhuimana.

¹¹ Chithang ngalāngda ngalei chiwui keinung Susali sāthat kahai mashing chi awungali ahānga.

¹² Kala awungana Awungva̱ Estherli hānga, “Ngaleiwui keinung Susali Jehudibingna, mi shāphangā kala Hamanwui naomayarabing athum tharā zangda sāthathaira. Khangatei apam awungawui ngalei katongali khi sāhairakhala? Ara nawui pokhangai khi leili? Kala khi ningchāngluifakhala? Ina ungshungmira.”

¹³ Chieina Estherna hānga, “Awungana ningyāng ungakha, aja kasā thāda akhama Susa keinungli leida khalei Jehudibingna salui khavai khamayā milu. Kala Hamanwui naomayarabing tharā chili tārongli hokthang ngasaklu.”

¹⁴ Chieina chila sākhavai awungana khamayā mi; Susali kakaso akha sai, kala Hamanwui nao tharā chi tārongli hokthanghaowa.

¹⁵ Susali khalei Jehudibingna, Marun kachāngwui tharāda khamatethang kaziplaga Susali mi shākathum sāthata, kha athumwui ot mangaponkhuimana.

¹⁶ Awungawui ngaleibing khangateiwui Jehudibingnala athum khalatta kankhavai kaziplaga yangkashibingwui eina khangachee suikatā samphanga, kala athumli yangkakharinga yangkashebing thing hangshinida phangā sāthata; kha athumwui ot mangaponkhuimana.

¹⁷ Chi Marun kachāngwui zimiksho tharāda kakathuma thangna; kala tharāda khamatethang chi ngasāmkhuida zātkhān kasā kala khamathān zimiksho akha sāngasaka.

¹⁸ Kha Susali kapam Jehudibingna tharāda kakathuma thangla, tharāda khamate thangla kazipta tharāda kaphangāthang chi ringkaphā eina ngasāmkhuida zātkhān kasā kala khamathān zimiksho akha ngasā ngasaka.

¹⁹ Chiwui vang eina kha̱-kha̱li kapam Jehudibingna, Marun kachāngwui tharāda khamatethang chi khamathānwui zātkhān kasā kala khamathāna zimiksho akha sāngasaka, kala akha eina akha ot khamathāthā mingaroka.

Purim Phanit

²⁰ Kala Mordecaina kashok hi lairikli kapihaida, Awunga Ahasu-eruswui ngaleili khalei Jehudibingli apam, khanailila katālila chithi chihovāsera,

²¹ kala kum kachida Marun kachāngli tharāda khamatethang eina tharāda kaphangāthang hi,

²² yangkashebingwui eina Jehudibingna khangasām samphanghaowa da, wukkakhanangwui eina ringkaphā samkaphang, sikafawui eina ngasāmkakhui samkaphangwui vang, kum kachida, khamathānwui phanit, akha eina akha khamathāthā ot mingarok khavai, kachāmabingli ngachonkhami hi sachinglu da hānga.

²³ Chieina athumna sāphok kahai thāda, kala Mordecaina kapikhava thāda Jehudibingna sāchinga.

²⁴ Kaja Agagwui Hammedathawui naomayara, Jehudi saikorawui yangkashe Hamanna Jehudibingli shimān ngasakta mutchao khavai Pur, chiya kalā yanga;

²⁵ kha Estherna awungali khavā eina, Jehudibingli makaphā sākhavai khangarān chi awuitungli tāranu da kakaso kapihaoda, a kala naomayarabinglila tārongli phāshi saserhaowa.

²⁶ Chiwui vang eina athumna phanit atam hili Purwui eina Purimda hoi. Kala chithi chili kapi kahahai, athumna chili ngasung kahai, kala athumwuitungli rakashoshok saikorawui vang,

²⁷ Jehudibingna tharchigatta athum khalatta, ara̱-azā kala athumli rākazang saikora zangda, kapi kahai athishurda, kum kachida zimiksho khanithang hi makailakla mayonchingra,

²⁸ kala zimiksho hi mayonchingra, shimkhur kachiva̱, ngalei kachiva̱, keinung kachiva̱, Jehudibingna Purimli horkahai masāmara, lah ara̱-azāwui thotlila hi phaningungchingphalungra.

²⁹ Chiwui thili Awungva̱ Esther, Abihailwui naongalāva̱ eina Jehudipa Mordecaina Purim zātkhān hi mangachei khavai kasaka kakaso eina ngasoda kakhane chithi kapiluishita.

³⁰ Ahasu-eruswui wungram ngalei shākha maga̱da shinili khalei Jehudi saikorali chingri kahai khamashungwui tui eina chithi kapida hānga;

³¹ chiya, Jehudipa Mordecai eina Awungva̱ Estherna kasoda Jehudibing kala athumwui ara̱-azāna athumwui khumkapam, kala chapkhangachā, Purimwui khanithang hi hāngkahai atam chili mayonphalungra.

³² Purimwui zatkhanābing hi Awungva̱ Estherwui kakaso eina kasāna, kala hi kapisanghaida lei.