ESTHER 7 - Kathara Bible (BSI)

¹ Chieina awunga eina Hamanna awungva̱ Estherli ngasoda phazākhavai zanga.

² Kala kakhanethang, athumna drakhāra̱ mangmamānlakha awungana Estherli hāngluishita, “Khi pokhangai leikhala, Awungva̱ Esther? Chi nali mira. Kala nawui ningkachāng khi leikhala? Iwui wungram tangkhai eina tangda mira.”

³ Chieina Awungva̱ Estherna ngahānkai, “Awungawui mikyanli ili ngahanngaimiakha, O Awunga, kala awungali ningyāng ungngasakakha ina kapo hieina imanglā kahuimilu, kala iwui yur saikorawui manglā huimilu.

⁴ Kaja ithumli yorsanghaira, I kala iwui yurli, shimān ngasak khavai, sāthat khavai, kala yaitupthat khavai ngarānhaira. Ithumli rao mayarnao, sha̱nao, sākhavai yorsangsi kaje, ina chingri mahaimara; kaja ithumwui kachotkachāng chi awungawui kashimānli chāng matampaimana.”

⁵ Chieina Awunga Ahasu-erusna Awungva̱ Estherli, “Hikathā sākida kaphaning mi chi khipākhala, kala kali leilikhala?” da ngahāna.

⁶ Estherna hānga, “Yangkashe! Makaphā-makhayā Haman hina!” Chieina awunga eina awungva̱wui mangāli Haman ngacheeshunhaowa.

⁷ Kala awungana malungvātnāhaida phazātwui eina ngakarthungthuilaga konungwui yāmguishong vāhaowa; kha Hamanna, ali awungana zakkashi sahenra kaji theihaoda, Awungva̱ Estherli amanglā kakanmi khavai popamhaowa.

⁸ Kala awungana konung yāmgui chiwui eina athumna drakhāra̱ mangkhavaipamli hankhaung eina, Estherwui pamkhavaipamli Hamanna ngakhumsanghailaga leisai; chieina awungana, “Iwui shimli I leilagala awungva̱li eina tangda ana makaphā saga kajila?” da hānga. Awungana chi hangkhaleoda, athumna Hamanli mai rommihaowa.

⁹ Kala awungawui otram khangatha̱li kazang ahonga Harbonana, “Chili lāngda awungali mathi khavai hāngkhame Mordecaiwui vang, Hamanna ngarān kahai khuining hangphangā kajui tārong chi Hamanshiwui shimli sāhaili,” da hānga.

¹⁰ “Ali chili phāshi sahaolu” da awungana hānga. Chiwui vang Mordecaiwui vang sākahai tārong chili Hamanli phāshi sāhaowa. Chiwui thili awungawui malungkhavāt nemhaowa.