ESTHER 6 - Kathara Bible (BSI)

Awungana Mordecaili Khayākashi Khami

¹ Chithang ngayā awunga mapivāpaithuwa; chieina phaningung khangayi kashoshok otshot, thotchan kapisang khavai lairik chi akhui khavai kasoi, kala awungali chibing chi pashok chitheiya.

² Kala awungawui ahonga khāmong mayonkasā Bigthana eina Tereshna Awunga Ahasu-erusli sāthat khavai kasāwui pongli Mordecaina kathāda hāngkhala kaji chi kapisanghaikasā samphanga.

³ Chieina awungana hānga, “Hiwui vang Mordecaili khi maikhayā maningakha khi khayākashi ot sāmihairakhala?” Awungawui otram khangatha̱bing china, “Awui vang khikhala masāmilakmana” da hānga.

⁴ “Yangkhupli khalei chi khipākhala?” da awungana ngahāna. Atam chichangli, awungawui keinung kayāngli Haman rāchamda leisai; kaja ana ngarān kahai tārongli Mordecaili phashi sākhavai awungali hangkida kharāna.

⁵ Chieina awungawui raobingna, “Kayangli Haman nganingda lei” da hānga. “Ali zangngasaklu” da awungana kasoi.

⁶ Hamanna zanga, kala awungana hānga, “Awungana ningyāng ungda mai kāngasak khangaiya mi chili khi samingayikhala?” Hamanna, “Ili lāngda awungana khipāli ningyāng ungrakhala?” da akhalatta chukmajaya.

⁷ Kala Hamanna awungali hānga, “Awungana ningyāng ungda mai kāngasak khangai mi chili,

⁸ awungana khangavai wungsāri, kala awungana katonga sigui kala awungawui kuihon khuirāranu;

⁹ kala awungawui ngammeikap kaje wungnao chili milaga, awungana mai kāngasak khangai mi chili ana shaksāmiranu; kala ngammeikap kaji mi china sigui shimenlaga awungawui konung khamashā kuimareida: ‘Awungana ningyāng ungda mai kāngasak khangai mili hithāda sāki kajina’ da vaozatra.”

¹⁰ Chieina awungana Hamanli hānga, “Thāklu, nana kahāng thāda wungsārila, siguila, khuilu kala awungawui ngaveili kapama Jehudi Mordecaili chithāda sāmilu; nana hāngtā kahai chi akhala machithathaialu.”

¹¹ Chieina Hamanna wungsārila, siguila khuilaga Mordecaili shaksāmi, kala keinungwui khamashā kuimareidali, “Awungana ningyāng ungda mai kāngasak khangai mili hithāda sāmiki kajina” da vaozata.

¹² Chiwui thili Mordecaina awungawui ngaveili ungpamhaowa. Kha Hamanna shimli totot unglaga wukkhanangnāhaida kuili kachon ungkuirunpama.

¹³ Kala Hamanna apreiva̱̱ Zeresh, kala ngasotnao saikorali awuitungli shokkahai saikora hāngchithei. Chieina thangkhamabing kala apreiva̱̱ Zereshna hānga, “Nana mangāli kongluiphok kahai Mordecai chi Jehudinaona jiakha, na ali mangasungrarmara, kha awui pāngli thisangra.”

¹⁴ Athum ngazek mahungda leilakha awungawui ahongabingna rālaga, Estherna ngarān kahai zātkhān chili Hamanli totot eina thānthuihaowa.