ESTHER 5 - Kathara Bible (BSI)

Awunga eina Hamanli Estherna Phazāt Kaho

¹ Kakathumathang Estherna awungva̱wui sāri shaksālaga awungawui konungli zangda, awungawui kahaka kāli karoda khalei awungawui pamkhavai alungwui yangkhupli zangnganinga. Konungli zangkhavai shong ngareishokta awungana konungwui alungli wungpamkhongli pamsai;

² kala awungva̱ Estherna ayarli khanganing chi awungana kathei tharan, ali awungawui mikyanli ngahānkhangai leihaoda awungana awui sinā khānthing tāngvai. Chieina Estherna vāda khanthingwui atonli asāza̱ya.

³ Kala awungana ali, “Khisathukhala, Awungva̱ Esther? Nawui pokhangai khikhala? Iwui wungram tangkhai eina tangda mira” da hānga.

⁴ Kala Estherna hānga, “Awungana ningyang ungakha, awunga eina Hamanna ina awungawui vang ngarān kahai ngazin phazat chili kharāmilu.”

⁵ Chieina awungana, “Estherna ningkachāng athishurda awuili aphazā khavai Hamanli thākta ahokhuilu” da hānga. Chithāda awunga eina Hamanna Estherna ngarān kahai ngazin phazātli vai.

⁶ Athumna drakhāra̱ mangmamānda leilakha, awungana Estherli, “Nana khi pokhangai leikhala? Ina mira, nawui ningkachāng khi leikhala? Iwui wungram tangkhai eina tangdala ungshung ngasakra” da hānga.

⁷ Kha Estherna hānga, “Iwui pokhangai kala ningkachāng chiya:

⁸ Awungana ili leishimida, kala awungali ningyāng ungngasakta iwui ningkachāng ungshungmira jikha, awunga eina Haman akhama aniwui vang ina ngarān kahai ngazin phazāt chili rāzangmilu; kala akhama awungana kahāng thāda chili ina ponaora.”

Hamanna Mordecai Sāthat khavai Kasā

⁹ Chithang Hamanna ning mathānthup ringphālak eina thuihaowa. Kha awungawui ngaveili Mordecaili kathei tharan, ana awui mangāli ngakarkathuila mangakarthui, khangacheela maleilak kaji chi theilaga Mordecaiwuitungli malungkhavātna pemtinghaowa.

¹⁰ Chithālala, Haman akhalatta malungkhavāt khānglaga shimli unghaowa; kala mi chihoda ngasotnaobing eina apreiva̱̱ Zereshli ahokhui ngasaka.

¹¹ Kala Hamanna awui kashang-kharei saikora athumli hāngchithei, anaomayara ngarāwui mashing, awungana ali pam kāngasakta awui wungnaobing kala raobingwuitungli kachipam saikora hāngchitheisera.

¹² Kala Hamanna hithāda hānglui, “Awungva̱ Esther eina tangda, awungali ngasoda khipālikha ana khangarān zātkhānli maholakmana, imāngli hoi. Akhamala awungali ngasoda ili phakazā holuida lei.

¹³ Chithālala, awungawui ngaveili kapama Jehudiwui Mordecaili theilakha eina tangda saikora china khikha ringkaphā maleilakmana.”

¹⁴ Chieina apreiva̱̱ Zereshna kala ngasotnao saikorana ali hānga, “Khuining hangphangā kajuiya tārong akha sālaga, Mordecaili phāshi sākhavai ngathorshong awungali ahānglu; laga ningmathānlak eina awungali ngasoda ngazin phazāt aphazālu.” Hāngda khalei china Hamanli ningyāng ungngasakhaowa, kala ana tārong chi sākhui ngasaka.