ESTHER 4 - Kathara Bible (BSI)

Mordecaina Estherwui Khangachon Kapo

¹ Mordecaina shokkahai saikora chi theilaga, awui kachon serkhākta bora ngavailaga hotla neoda malung ringda panglāk eina chaplaga keinungli vai;

² ana awungawui ngavei zangkhavaili vāshunga; kaja awungawui ngaveilungli bora kachon ngavailaga khipākha mazangpaimana.

³ Kala awungawui hukhum samkaphang ngalei kachiva̱li Jehudibingna malung ringlak eina chapngachāda khumpama kala sifada chapngakāna, kala athum kachungana hotla neoda bora ngavai.

⁴ Estherwui rao sha̱naobingna kala ahongabingna ali rākahāng tharan, awungva̱ chi malung ringlakhaowa, chieina ana Mordecaili awui bora kachon shinkhavai kashankachon chihovai; kha ana makhuithuwa.

⁵ Chieina ali otram ngatha̱mi khavai kahaiya, awungawui ahonga Hathakhli hokhuilaga, hi khi kasakhala, khiwui vang hitha kahaikhala da Mordecaili angahānkhui khavai kasoi.

⁶ Awungawui ngavei mangāli khalei kayang khamashā chili Mordecaili samphang khavai Hathakhna vai,

⁷ kala Mordecaina awuitungli shokkahai saikora ali hāngsera, kala Jehudibingli shimān khavai Hamanna awungali pheisā mirada ngashit kahai chila tāzak eina hānga.

⁸ Kala Estherli ungchitheida mathālak eina unghāngpai khavai, kala awungali vahānglaga awui mibingli mashimān ngasak khavai saklāk eina vāpolu da Susali ngayaokazat hukhum lairik chi akha mi.

⁹ Kala Hathakhna Mordecaiwui tui saikora Estherli unghāngsera.

¹⁰ Chieina Estherna Mordecaili pao mikhavai Hathakhli hithāda hānga,

¹¹ “Kachikathā mayarnao nilala sha̱nao nilala awungana kaho maningla awungawui yāngkhuplungli zangakha ain akhamāng lei, saikorali sāthatserra, awungana sināwui khānthing chikasin mi china ringra kaji hi awungawui rao kala awui ramli khaleibingna thei. Kala ilila awungawuili zangkhavai mahomada thumrāthang kāhaira.”

¹² Chieina athumna Mordecaili Estherna hāngkahai saikora ahānga.

¹³ Chieina Mordecaina Estherli unghāng khavai athumli hānga, “Jehudibing thiserhailaga, awungawui konungli pamda namāng yāmshokpaira da maphaningalu.

¹⁴ Kaja hikathā atamli nana kasaikha pamhaiakha, Jehudinaobingli ngachonmi khavai kala huimi khavai apam khangateiwui eina leisalapai, kha na kala navāwui shimkhurla shimānserhaora. Hikatha atamwui vang nali awungva̱ sākhangasakla honthei, khipāna theira?”

¹⁵ Chieina Estherna Mordecaili ngahānkā khavai athumli hāngchithei,

¹⁶ “Zatlu, Susali khalei Jehudi saikora phākhuida iwui vang kakhum eina pamlu; ngashun ngayā kathumthang khikha mazā mamangalu. I eina iwui rao sha̱naobingla nathumwui thāda khumra. Chiwui thili, ain maninglala ina awungawuili vāra; kala chili I thikha thihaira.”

¹⁷ Mordecaina unglaga Estherna kakaso kachiva̱ sāsera.