ESTHER 3 - Kathara Bible (BSI)

Hamanna Jehudibingli Shiman khavai Kasā

¹ Saikora hi shokkahai thili Awunga Ahasu-erusna Agagwui Hammedathawui naomayara Hamanli awui pam khāngkāmida ali khangaso wungnao saikorawuitungli pamngasaka.

² Kala awungawui rao ngaveili khaleibing saikorana ali kui mashunzangda khayāshisera; kaja awungana chithada sālu da kaso kahaina. Kha Mordecaina chithada masamana.

³ Chieina awungawui ngaveili khalei awungawui raobingna Mordecaili, “Kachiwui vang nana awungawui kakaso kaihaokhala?” da ngahāna.

⁴ Kala athumna ali thangkachida hānglala ana manganāsangthuda, ana kayākha sashapnikhala yangkhuirada Hamanli hānghaowa; kaja Mordecaina a Jehudina da athumli hanghairasai.

⁵ Kala Mordecaina kuila mamashunzangma kala khayāla mashi, kaji theilaga Haman malungkhavātna pemhaowa.

⁶ Kha ana Mordecaimāngli pāng maparngaimana. Mordecai hi khiyurkhala da athumna Hamanli hanghairasahaoda, Ahasu-eruswui wungram tongdali khalei Mordecaiwui yur Jehudi saikorali shimān khavai sai.

⁷ Awunga Ahasu-eruswui tharāda kakhane kum, Mayo kachāngwui kachāng khare eina thuilaga athumna Pur, chiya kalā khayang, Hamanwui mangāli thangkachida; kala kachāng kachida kachāng tharāda kakhane, Marun kachāng eina tangda athumna yangchinga.

⁸ Chiwui thili Hamanna Awunga Ahasu-erusli hānga, “Nawui wungram saikorali kachikathā miyur akha yaoyāng eina yurbingwui alungli pamdalei; athumwui ain yur khangatateiwui eina ngateihanghai, athumna awungawui ain mamayonmana; chieina athumli khāngkapam hi awungawui vang khikha kānkhana maleilakmana.

⁹ Awungana phāra jiakha, athum saikora shimān ngasak khavai hukhum akha milu; kala ina awungawui ot kasābingwui pāngli lupāsā talent thingthara sangmida awungawui lanshimli haimira.”

¹⁰ Chieina awungana mahor namkhavai khutop apāngwui eina khuishoklaga Agagwui Hammedathawui nao, Jehudili yangkashe Hamanli mi.

¹¹ Kala awungana Hamanli hānga, “Pheisāla, mila nana phāra kaji chi sākhavai nawui pāngli horsang kahaina.”

¹² Kachāng kharewui zimiksho tharāda kakathumathang awungawui kapimebingli hokhuilaga Hamanna kahāng athishurda hukhum akha kapingasaka; kala awungawui satrapbing kala ngalei saikorali khalei rammungabing, yurbingwui wungnaobing, ngalei kachiva̱wui mayek, kala ramramwui tui eina kapi ngasaklaga ngayao ngasaka; kala lairik chi Awunga Ahasu-eruswui ming eina kapilaga awungawui khutop eina mahor namsangsera.

¹³ Chithi chi phungmebingna awungawui leikhaibingli phungvai; kala kachāng kakhanewui zimiksho tharāda kakathumathang, thangkhawui alungli, Jehudi saikora, khararnaosan, sha̱nao kala naoshinao mateila shimit khavai, sāthat khavai, saikora yaitupthat khavai kala ngapon khavai chihovai.

¹⁴ Chithang sāki kaji chi ngalei kachiva̱li hangchitheida khangarān sākhavai lairik chi ngalei kachiva̱li chihovai.

¹⁵ Awungawui kakaso athishurda phungmebingna thaklāk eina vāda ngaleiwui keinung Susalila kakaso chi mihaowa. Awunga eina Hamanna leishiri eina mangpama, kha Susa keinunga pa̱ngapāhaowa.