ESTHER 2 - Kathara Bible (BSI)

Estherna Awungva̱ Ngasā kahai

¹ Otshotbing hiwui thili, Awunga Ahasu-eruswui malungkhavāt vankahai tharan, Vastina sākahai kala awuitungli hukum mikahai chi awungana phaningunga.

² Chieina awungali otram khangatha̱ raobingna ali hānga, “Awungawui vang azak khamathā kachingva̱ ngalānaobing vāphākhuiranu.

³ Kala awungana wungramwui leikhai kachivali otva̱bing phāsanglaga, azak khamathā kachingva̱ ngalānao saikora kazipkhuida sha̱nao haikhavai wungramwui hiwui keinung Susali khuirāranu, kala shanaobingli yangkhame awungawui ahonga Hegaiwui pāngli hairanu; kala azak mathā khavaila samiranu.

⁴ Kala awungali ningyāng ungkhangasaka ngalāva̱ china Vastiwui mahut awungva̱ sāranu.” Tui china awungali ningyāng ungngasakhaoda ana chithāda sai.

⁵ Atam chitharan Susa keinungli Jehudi akha, aming Mordecai hoda Benjaminshi Kishna kapharā Shime-iwui naomayara Jairna kapharā nao akha leisai,

⁶ Judahwui awunga Jeconiahli Babylonwui awunga Nebuchadnezzarna Jerusalemwui eina tukkhava atamli alila tukvānar kahaina.

⁷ Ana Hadassah kaja Esther kahova̱, awova̱wui naongalāva̱li nganaokai, kaja a ava̱la avāla maleimana; sha̱naopāva̱ hi ngatikri mathāshuna; kala awui ava̱ avā thikahai tharan, Mordecaina awuinao tākam eina nganaokhui.

⁸ Chieina awungawui hukhum kala kakaso chi chishāt kahai tharan, kala Susa keinungli ngalānao kachungkha khuirāda Hegaiwui pāngli sangkhami tharan, Estherlila awungawui konungli khuivāda sha̱naoli yangkhame Hegaiwui pāngli horsangmihaowa.

⁹ Ngalāva̱ china ali ningyāng ungngasakhaowa; kala ana awui azak mathākhavai thao, kashakazā ngaranmida awunga keinungwui eina otram khangatha̱ ngalānao shinili ngalāngda khangarān sāmi kala athumli phameikap kaje sha̱naobing pamkhavai chili haihai.

¹⁰ Estherna awui miyur kala theisā khipalongkhala kaji machitheimana, kaja Mordecaina chi mahānglaklu da ali hanghairasai.

¹¹ Kala Esther kathāda lei, kathāda sāli kaji theikhavai Mordecaina thangkachida sha̱nao haikhavaiwui mangāli ayangchinga.

¹² Awunga Ahasu-erusli samphang khavai, sha̱naobingwui ra̱khamayang atam athishurda, kachāng tharuk myrrhwui thaoh, kala kachāng tharuk sha̱naobingwui vang neokhavai thaohyur eina nganamkaphā otyur neolaga, ngalānao ava̱va̱wui atam ungkashung tharan—

¹³ ngalānao china awungawuili kazang tharan ana ningkachāng athishurda sha̱nao haikhavaiwui eina awungawui konungli khuizang khavai misera.

¹⁴ Ngazin zanglaga ngathorshong kakhane sha̱nao haikhavai Sha-ashgaz awungawui ahonga, awungawui angashirva̱bingli khayangawui pamli latunga; awungana ngalāva̱ chili ningchāngda aming eina kaho maningla awungawuili mazangluipaimana.

¹⁵ Awungawuili zangkhavai Abihailwui naongalāva̱, Mordecaiwui awova̱wui naongalāva̱ Estherwui atam khaung tharan, sha̱nao haikhavaiwui khamayona, awungawui ahonga Hegaina hāngkachithei maningla ana khangatei khikha mapomana. Chitharan Estherli kathei mi saikorana ali ngahānngaisera.

¹⁶ Awunga Ahasu-erusna mungda kashine kumwui kachāng kathara Tharao kachāng Estherli awui awunga konungli khuikazang tharan,

¹⁷ awungana sha̱nao khangateili lāngda Estherli leishimeikaphaowa, kala kachingva̱ katei saikorali lāngda awungawui mikyanli lukhamashan kala ngahānkhangai leihaowa, chiwui vang awungva̱wui kuihon ngahonmida Vastiwui pamli awungva̱ sāngasakhaowa.

¹⁸ Chieina wungnao saikoralila kala rao saikorali awungana Estherwui vang zātkhān kahaka miya. Chili lāngda wungrambing chili shai kokmi kala awungawui mikhangai lemmet yaowa.

Mordecaina Awunga Mirin Kankhami

¹⁹ Kachingva̱bing chi kazip kakhane kakhui tharan, Mordecaina awungawui ngaveili pamsai.

²⁰ Mordecaina kakaso athishurda, Estherna awui athei-asā kala yur nilala machitheilakmana; kaja nganuilakha Estherna Mordecaiwui kahāng khanganā thāda aruila chithada nganai.

²¹ Atam chitharan, Mordecaina awungawui ngaveili pamlakha, awungawui ahonga khāmongphei khamayona, Bigthan eina Tereshna malungvātta awunga Ahasu-erusli sāthat khavai khangarān sai.

²² Tui chi Mordecaina theihaoda ana Awungva̱ Estherli hānga, kala Estherna pao chi Mordecaina hānga da awungali hānghaowa.

²³ Tui chi khangathing tharan mashungsāhaoda anili thingtungli phāshi sāhaowa. Kala hi awungawui miktāli Thotrinchānwui Lairikli kapisanga.