ESTHER 1 - Kathara Bible (BSI)

Awungva̱ Vastina Awunga Ahasu-erusli Ngakaikashi

¹ Ahasu-eruswui thotli, kaja India eina thuilaga Ethiopia vāshungda ngalei shākha maga̱da shini khamunga Ahasu-erusna,

² awunga sāda Susa keinungwui wungpamkhongli pamlakha,

³ ana mungda kakathuma kum wungnaobing, raobing, Persia kala Mediawui raimi kathānabing kala ngalei chiwui rammungabing saikorali zātkhān akha sai,

⁴ wungnaowui tekhamatei kashāng-kharei, kala awui ngam sākachithei zimiksho shākha hangchishatthangwui vang chithei.

⁵ Zimikshobing chi kākapei tharan, ngalei chiwui keinung Susali awungawui konung yāmgui kayāngli, zimiksho shinithangwui vang zātkhān sāda, kharā mi kachivali kharei kateo mateila lemmet misera.

⁶ Yāmgui alungli vat eina kasā kachara chonrān, kala khamanaka tāwon kazaira̱ eina kasā khamaying eina hungreoseowui hokthāng khavai lupāsāwui huishon sāsangda marblewui pakra̱bingli hokhai; kala sinā eina lupāsāwui pamkhongla porphyry, marble, mathāmeikap kaje pearl kala aman kasaka ngalung manātlaga hamkahaiwuitungli haihai.

⁷ Mangkhavai sināwui khorāmli kala ngatatei kaji khorām ayur eina mangngasaka, kala awungawui khalei athishurda wungnaona khamang drakhāra̱la mavātla mimanga.

⁸ Kala ainwui athishurda mangngasakta khipālikha tandi eina mashimānmana; kaja mi kachiva ningkachāng athishurda sāngasaklu da awungana awui konungwui otva̱bingli kakaso mihairasai.

⁹ Awungva̱ Vastinala, awunga Ahasu-eruswui konungli, sha̱naobingli zātkhān akha miya.

¹⁰ Kashinethang, zam mangmangda awungawui ning mahaiuda, Awunga Ahasu-eruswui shimli otram ngathakhame ahonga, Mehuman, Biztha, Harbona, Bigtha eina Abagtha, Zethar eina Carkas, athum shinili,

¹¹ yurbing kala wungnaobingli Awungva̱ Vastiwui azak chithei khavai awungva̱wui kuihon ngahonlaga awungawui mangāli khuirālu da kasoi; kaja ava ngatikri eina yangngailaka.

¹² Kha awungva̱ Vastili rālu da ahongabingli awungana kasokhavā chi marāmara jihaowa. Chieina awunga malungvāthaowa, kala awui malungkhavāt chi ningli meikachui thāhaowa.

¹³ Chieina atam katheia thangkhameibingli awungana ngasana— kaja ain kasing kala mashun khaleibingli khangasan hi awungawui khangachāna,

¹⁴ Carshena, Shethar, Admatha, Tarshish, Meres, Marsena kala Memucan athum Persia kala Mediawui wungnao shini hina wungramwui kharebing sāthuda ali ngalempama—:

¹⁵ “Awunga Ahasu-eruswui kakaso athishurda ahongabingna vākahāng chili Awungva̱ Vastina masāthugada ainwui athishurda ali khi sārakhala?”

¹⁶ Chieina awungawui kala wungnaobingwui mangāli Memucanna hānga, “Awungva̱ Vastina awungamāngli maningla, kha wungnao saikoralila kala Awunga Ahasu-eruswui ngaleili khalei mi saikorali khangui sāhaira.

¹⁷ Kaja awungawui otsak hi preiva̱̱ saikorana theihaoda athum gahara ngarāli khayāmashiluimara, kala ‘Awunga Ahasu-erusna awui mangāli awungva̱ Vastili khuirā khavai kasolaga mavāmana’ da hāngra.

¹⁸ Aja Persia eina Mediawui philava̱bing awungva̱wui otsak hi shālaga awungawui wungnao saikorali hāngserda leira, kala chili khayāmakashi eina malungkhavāt kachungkha shokhaora.

¹⁹ Awungana phāra jiakha, Persia eina Mediawui ain akha sāda mangacheilakla leikhavai kakaso akha kapimihaoranu; chiya, Vasti Awunga Ahasu-eruswui mangāli marāluiaranu; kala awungana ali phākhamei sha̱nao khangatei akhali awungva̱ pam mihaoranu.

²⁰ Chithāda awungawui kakaso chi wungram saikorali ngayaovā kahai tharan wungram chirikhawui preinaobingna athum gahara ngarā kharei kateolila khayāshiserra.”

²¹ Memucanna kahāng chi awungala, wungnao kateibingla mayāngaiserhaoda;

²² awungana wungram saikorawui rammung kachida kachichā ramtui kala kachicharam mayek eina kapilaga, mayarana ichichā shimkhurwui akhavā sāphalungra kala aramtui matuiphalungra da chithi chihovāserhaowa.