EPHESIANAO 6 - Kathara Bible (BSI)

Naongarā eina Ava̱-Avā

¹ Naoshinaobing, Prohowui mangāli nava̱ navāwui kahāng nganālu, kaja hi nathumna sākhangayi khamashungana.

² “Nava̱ navāli khayāshilu” kaji hi ngashitmi kahai ningkhami kharena.

³ Chithada saakha nathum ringphāra kala okpeimeira.

⁴ Ava̱-avāngarā, naongarāli athumna malungvātkapaiwui apong eina marākalu, kha Prohowui hāngkachithei kala kharāk chi eina rarkā ngasaklu.

Rao eina Akhavā

⁵ Raobing, Khristali otram ngatha̱khamina da phaninglaga nathumwui akhavābingli khayākashi, khangachee kala ningkathar eina kahāng nganālu.

⁶ Athumwui kapen samphang khavai athumwui miktāmāngli kasā maningla kha Khristawui rao thada, Varewui ningkachāng chi ningtongda sālu.

⁷ Mili maningla, Proholi otram khangatha̱na da nathumwui ot chi rao thada mathānthathup sālu.

⁸ Phaningunglu kaja raolapai, ningkhān kahailapai, ana sākahai kaphā ot chiwui vang Prohona mi kachiva̱li sāman mira.

⁹ Akhavābing, nathumwui raobingli hi tākam eina sālu kala mamachitalu. Phaningunglu kaja nala kala nawui raobingla mi kachiva̱li ngaraikachā apong eina bichar sāki kaje kazingramli khalei Akhavāwui misera.

Varewui Raisāri

¹⁰ Naomeikapta, Proholi khangarum kala awui pangshap chieina nathumwui pangshap pangsang ngasaklu.

¹¹ Nathumli Varena khami raisari katonga shaksākhuilu, chithākha makaphā Chipeena mareimarā kasā chili nathumna nganingshapra,

¹² kaja ithumna mikumoli khangarar maningmana, kha kazingli khalei makathara manglābing, khamungabing, sāshap pangshapabing kala tangkhamang thotwui apuk-apagawui pangshapli khangararna.

¹³ Chiwui vang eina ara Varewui raisāri chi shaksākhuilu! Chithākha makaphā zimiksho kharā tharan yangkashebingna rai rākatāli ngasungshapra; kala raikup vāshungda ngarar kahaiwui thilila nathum leisachingra.

¹⁴ Chieina mashun eina nathumwui shānneira sāda kala khamashung-khangarong eina thikkom sāda nganingkazaklu,

¹⁵ Kala chingri kahaiwui Pao Khamathā chishāt khavai ngarānping kahai china pheimakhei sālu.

¹⁶ Atam kachiva̱li shitkasang chi chāngvei sāda phunglu, kaja chi eina nathumna makaphāpā china kāpkharā meirikakā malāthing chi sāshimitshapra.

¹⁷ Kala huikhami chi raikuihon thada ngahonlu, kala Varewui tui chi Manglāna nathumli khami raighai thada singlu.

¹⁸ Manglāna thānkhami chiwui alungli Varewui khangachon samphang khavai otsak saikorali seihā kasā eina ngasoda polu. Varewui mibingwui vang seihā sāmichinglu.

¹⁹ Ina matui khavai khangarān kasā tharan, Varena awui chānpao chi mikhavai, iwui vangla seihā sāmilu, chithākha ina pinglak eina matuida paokaphāwui ngathum kahai tui chi theingasakpaira.

²⁰ Ina phātop kazanga mi ngasāsālala, paokaphā hiwui paokazatana. Ina hāngphalungki kaji Paokaphā hi pinglak eina matuishap khavai seihā sāmilu.

Khanaowa Shālam Tui

²¹ I kathada leili kaji nathumna theikhavai Proholi shitsangda otram khangatha̱a ichina Tychicusna saikora hāngchitheira.

²² Chiwui vang eina ithum kathada leilikhala kaji hāngchithei khavai kala nathumli kasatsangmi khavai ina ali nathumwuili chihokharāna.

²³ Shitkasang eina ngasoda chingri kahai kala leikashi chi Avāva̱ Vare kala Proho Jishu Khristana shitkasanga avānaobing saikorali miranu.

²⁴ Ithumwui Proho Jishu Khristali mathāhailakla leikashe athum saikorali Varewui lukhamashan china ngasomichingranu.