EPHESIANAO 5 - Kathara Bible (BSI)

Kahorlungli Okathui

¹ Nathum Varewui khaluma naongarā sākahaiwui vang ā thākhavai hotnāphalungra.

² Khristana ithumli leishida ithumwui vang Vareli ningyāng ungkhavai nganamkaphā kachigat kala pha̱phayākhami chithada, nathumla leikashiwui lungli yaothuizatlu.

³ Nathum Varewui mibing ngasāhaoda, khamathang-khamarang, makathar, kākharām hikathāthā mamatuikhangayi tui mamatuialu.

⁴ Lha shuikhangaruitui, mangma̱ttui kala khayākhamalātui hikathā hāngki kajiwui vanga Vareli ningshitha̱lu.

⁵ Shāmkasā, makathara, kākharāma (kākharām hi meoma̱li khokharum kathāna) mi china Varewui kala Khristawui wungramli kachilikha shimlui makāpaimana.

⁶ Khipānakha nathumli makhaninga tui eina machipat ngasakalu, hikathāwui vang Varewui malungkhavāt chi kahāng makhanganābingwuitungli katāna.

⁷ Chiwui vang eina athum kathāli mangasoalu.

⁸ Nathum tangkhamangli okthuida leisai, kha Prohowui mi sākahaiwui vang, nathum kahorli okthuihaira. Chiwui vang eina nathum kahorli okthuida khalei mibing thāphalungra.

⁹ Kaja kahor china kaphā, khamashung-khangarong kala mashunwui athei kachungkha hātkakhui samphanga

¹⁰ Prohowui ningyāng khaung ot chi phākhui khavai ngarānlu.

¹¹ Tangkhamangli khalei mibingna kasā khikha makānkhanā ot chi masaalu, chiwui mahutliva chibing chi kahorli khuishoktha̱lu.

¹² (Athumna ngathumda sākahaiwui pongli khamatuimāng einala teokha khayākhamalā ot maningmana).

¹³ Ot saikora kahorli khuikashok eina athumwui kachangkhat khangachā chi mathingrik eina phongshokhaowa,

¹⁴ kaja kachikathā ot chi mathingrik eina phongkashok tharan theipaiserhaowa. Chiwui vang hithada hānga. “Ngakarthuilu, he kape, kathiwui eina ngakarthuilu, Khristana nawuitungli hormira.”

¹⁵ Chieina nathumna kathada ringda leikhala da ngasharlu. Mangkhama̱ mibing mathala, thangkhamei mibing thada okthuilu.

¹⁶ Chāda samkaphang atam chi mathada singkhuilu, kaja hi makaphā atamna.

¹⁷ Chiwui vang eina mamangma̱alu kha Prohona nathumli khi sāngasakngaikhala kaji phākhuilu.

¹⁸ Nathumli shimān ngasaki kaji zamkhor manglaga mamariphaialu, kha Manglā Kathara eina pemtinghailu.

¹⁹ Nathum akha eina akha Laa lairikwui tui eina, masotlaawui tui eina kala Kathara Laa lairikwui tui eina chānsam ngarokta, nathumwui wuklungli masotkhami eina ngasoda Proholi masotchikatlu.

²⁰ Atam kachida ot saikorawui vang ithumwui Proho Jishu Khristawui ming singda Avāva̱ Vareli ningshichinglu.

Preigahar

²¹ Khristali khayākashiwui vang nathum akha eina akha hamsang ngaroklu.

²² Preiva̱ngarā, Proholi hamkasang thada gaharangarāli hamsanglu.

²³ Khristana awui phasā, churchwui akhavā kasā thada gaharana preiva̱wui akhavāna; kala Khristana awui phasa, churchwui Huikhamena.

²⁴ Chieina church khalattana Khristali hamkasang chithada preiva̱ngarāna gaharangarāli hamsangchaophalungra.

²⁵ Gaharangarā, Khristana churchli leikashi thada kala chiwui vang a khalattawui manglā chihokhami chithada preiva̱ ngarāli leishilu.

²⁶ Awui tui eina tara̱ eina kapheo thada pheohailaga church chi Vareli tharchigat khavaina.

²⁷ Kaja church chi kathar eina khayon-khamāng, chukhara kala khavāt maleilakla church khalattali chigat khavaina.

²⁸ Gaharangarāna athum khalattawui phasāli leikashi thada preiva̱ngarāli leishiphalungki kajina. Preiva̱li leikashi a chiya a khalattalila leishiya.

²⁹ Khipānakha a khalattawui phasāli yangkakharing maleimana, kha Khristana church reisang khavai kasā thada, anala awui phasāli phāwuida reisang khavai sai;

³⁰ kaja ithum awui phasākaisera.

³¹ Hithada Kathara lairikli hānghai, “Hiwui vang eina mayarnao akhana ava̱ avā horhaida apreiva̱li ngarumhaora; kala ani khani akha ngasāhaora.”

³² Kathara lairik hili kathuka ngathum kahaiwui mashun phongshok kahai hi Khrista eina churchwui pongli kahāngna da ina bhap tai.

³³ Chithālala hila nathumli kahāngna: gahara kachiva̱na khalattali leikashi thada preiva̱li leishiphalungra kala preiva̱ kachiva̱nala gaharali khayāshiphalungra.