EPHESIANAO 3 - Kathara Bible (BSI)

Paulna Gentilewui vāng Ot Kasā

¹ Maram hiwui vang eina, Khrista Jishuwui vang phātop kazanga Paul ina Gentilebing nathumwui vang seihā sāmi.

² Kachangkhat eina Varewui lukhamashan lungli nathumwui vanga kaphā sākhavai ot hi ili horsangmi kahaina kaji nathumna shāhaira.

³ Varena khangathuma angarān chi phongmida ili theingasakhaira (Hiwui pongli ina kasha̱-a eina kagapina,

⁴ kala ina kapi kahai chi nathumna paakha, Khristawui khangathuma chiwui pongli iwui bhap katā chi nathumna theikhuishapra.)

⁵ Khare thotli tui hi mili machitheisāmana, kha ara awui kathara paokazatbing eina marānbingli Manglāna phongmihaira.

⁶ Ngathum kahai tui chi hina; paokaphāwui mangā eina Gentilebingna Varewui sokhami chi Jihudibingli ngarumda samphanga kala shimluikatruma sāda Khrista Jishuwui mingli ngashitmi kahai chi samphangrumra.

⁷ Awui ot kasā pangshapwui mangā eina Varena ngakheikhang eina khami lemmet china ili paokaphawui rao sāngasaka.

⁸ Awui mibingwui ngachaili teomeikap kaje chilila I teomei, tha-ilala Khristawui mashānkharar kashāng chiwui paokaphā chi Gentileli hāshok khavai,

⁹ kala saikora kasā Varewuili thot-thot ngathumrā kahai matakhak kahai angarān chi mi saikorali chithei khavaiwui lukhamashan chi ili khamina;

¹⁰ kaja ara churchwui mangā eina apong saikorali Varewui thangkhamei chi kazingram katha apuk-apagali khamungabing kala pangshapbingli theingasak khavaina.

¹¹ Ithumwui Proho Khrista Jishuwui mangā eina ana ungshung khangasak, awui katang makhavai kharin chiwui athishurda hi Varena kasāna.

¹² Khristali khangarumwui vang kala ali shitkasangwui mangā eina ithumna maiyārong eina kala ning nganungkhung eina Varewui mangāli zangkashapna.

¹³ Ina nathumwui vang kakhanang samphanghaowa da ngachāng machatalu; hi nathumwui vang phākhavaina.

Khristawui Leikashi

¹⁴ Maram hiwui vang Avāli ina khuktizangda seihā kasāna.

¹⁵ Kazingramlila okathuilila khalei shimkhur kachiva̱wui aming hi awui eina samkaphangna.

¹⁶ Ina Vareli awui Manglāwui mangā eina awui khavāt makhalei tekhamateiwui eina nathumli pangshap mida nathumwui ning ngatarmei khavai seihā sai.

¹⁷ Shitkasangwui mangā eina Khristana nathumwui wuklungli pamkhavai kala leikashili shimphung kala angayung sāda sa̱titkhui khavai ina seihā sai.

¹⁸ Chieina Varewui mibingli ngasoda nathumla Khristawui leikashi hi kayākha hak, kayākha sang, kayākha jui kala kayākha thukkhala kaji bhap tākashapwui pangshap samphangra.

¹⁹ Mha, leikashi chi nathumna kathei samphangranu, chithālala theiser majirarmara kha Varewui khangachā chi pemngasaklu.

²⁰ Ithumwui lungli pangshapna ot sāmida ithumna kahāngli kala kaphaningli langmeikharda ngarānkhame ā chili,

²¹ churchwui alunglila, Khrista Jishuwui alunglila, thot kachida mashimānda Vareli tekmateichingranu. Amen.