EPHESIANAO 2 - Kathara Bible (BSI)

Kathiwui eina Kharingli

¹ Kharekachāng kahāng makhanganāwui vang kala morei kasāwui vang nathum manglārinli thida leisai.

² Chikachāng nathum okathuiwui makaphā shongfali zatsai. Nathum Varewui kahāng makhanganābingli singda khalei khamasai lungli khalei makathar manglāwui akhavā chiwui kahāng nganāsai.

³ Ithumla athum thada, phasāwui ningkachāng athishurda kala ningli sākhangai chi ungshung khavai sāda okthuisai. Chiwui vang eina ithumla athumwui thada Varena malungkhavāt naongarā ngasāsai.

⁴ Kha Varewui lukhamashan khavāt maleimana kala awui leikashi hakmahālaka,

⁵ chiya kahāng manganāmada manglārinli thikasāwui eina Khristali ngasoda ithumli ana ringngasakmi. Awui lukhamashana nathumli huimi.

⁶ Jishu Khristali kazangwui vang kazingram katha apuk-apagali mungkhavai ithumli ali ngasoda ringlui khangasakna.

⁷ Chithada sāda Khrista Jishuwui lungli awui leikashi chithei kahai chi khanaowa mithotli awui khavāt makhalei lukhamashan chi chitheipaira.

⁸ Kaja shitkasang mangā eina nathumli huikhami hi Varewui lukhamashanna, nathumna sākakhui maningmana, kha Varewui lemmetna.

⁹ Nathumwui ot kasana maningmana, kachikathana langsopaishina.

¹⁰ Ithum hi Varewui pāngthemna kala kaphā ot sākhavai Khrista Jishuwui lungli ithumli Varena sākahaina kala kaphā ot chi sākhavai ana rilāk eina ngarānpinghaikasāna.

Khristawuilungli Akha Khangasā

¹¹ Chiwui vang eina phaningunglu, “Ahui rimkashoka” da hokasā athumna nathumli kapharāwui eina Gentile, “Ahui marimkashoka” da hosai, (chi mikumona aphasāwui eina rimkashok chili kahāngna).

¹² Chitharan nathum Khristawui eina ngateida leisai. Nathum kha̱minao sāhaoda Varewui miyurli ngashitmi kahai chili mazangsāmana. Nathum Varena awui miyurli ngashitmi kahai chili pheisinda tuingashit sākahai chili mazangsāmana kala okathui hili nathum kachihān maleila kala, Vare mazangla okthuisai.

¹³ Kha ara nathum Khristali zanghaoda, katāva̱li leikasāwui eina Khristana tāmi kahai asheewui mangā eina nganaikhameili khuiungmihaira.

¹⁴ Kaja Khrista khalattana Jihudibing eina Gentilebingli akha ngasā khangasakwui vang chingri kahai chi ithumli khuirāmihaira. Yangshi khangarok kala ngatei khangasak phākho chi khalattawui phasā chigatmida sākhaimihaira,

¹⁵ Jihudi yur khani hi awui mingli kadhara akha sāda chingrihai khavai ngarānmi.

¹⁶ Khristana krushli thimida yangshi khangarok chi tang ngasaka, kala krushwui mangā eina yur khanini hi phasa akha sāda Vareli ngashim ngasaka.

¹⁷ Chithada sāda Varewui eina tāda leikasā Gentile nathumlila, Vareli nganaida leikasā Jihudibinglila, chingri kahai paokaphā chi saikorali Khristana rāhāshoka.

¹⁸ Kaja Khristawui manga eina Jihudi eina Gentile, khanini Mangla akha eina Avāli zangkapaina.

¹⁹ Chiwui vang eina Gentile nathum ara kha̱mi kala katei maningluimana; ara Varewui mibingli ngasoda ngaraikachā ruichumnao akhana, kala Varewui shimkhur chiwui mibingna.

²⁰ Nathumla paokazatbing eina marānbingna sākakā shimphung chiwuitungli sākā kahaina kala Khristana chiwui akhokana.

²¹ Shim hupva singlaga Proholi dharchigat kahai kathara khorumshim sāda reisang khangasaka chi ana.

²² Ali ngarumda nathumla khangateili ngasoda Varena awui Mangla eina pamkhavai apam sākakāli zangrumda lei.