DANIEL 9 - Kathara Bible (BSI)

Danielna Awui Mibingwui vang Seihā Sākhami

¹ Mede yurwui Ahasu-eruswui naomayara Dariusna Chaldeanaowui awunga sāda khare kum—

² ana mungkhare kum, kathara lairikli Prohona Jeremiah marānli hāngkahai athishurda, Jerusalem hi kum hangshini kaikhayāngda leira kaji Daniel ina, lairikli kapā samphangda chi chukmajasai.

³ Chiwui thili kakhum eina, bora ngavaida kala hotlā teilaga seihā kasā eina ngasoda ina Vare Proholi mai ngareiunga.

⁴ Iwui Proho Vareli ina seihā kasā eina ngasoda ning ngateida hāngphata, “O Proho, hakkhamahā khangachee-khangachā Varivara! Nawui kahāng nganāda ningkhami khamayona kala nali leikashebingli khangachei maleila mayonkhame,

⁵ ithumna nawui eina mai ngareithuihailaga nawui ningkhami kala shiyan-chikan mamayonla morei sāda makaphā otsak sāda ngakaishihaira;

⁶ ithumna nawui rao marānbing, ithumwui awungabing kala, wungnaobing, ishāvā ngarā kala ngalei hiwui mibingli nawui ming eina khamatuiabingwui tui makhuisangthuwa.

⁷ O Proho, khamashung-khangarong chi nawuina, kha ithuma aja hi tākam eina, maphākakhui, Judahwui mibing, Jerusalemli khaleibing, kala katā khanaili nana kashamvā kahaia Israel katonga ithumna nawui mangāli morei kasāwui vang pa̱khangapāmānga.

⁸ O Proho, ithumwui vang, ithumwui awungabingwui vang, ithumwui wungnaobingwui, kala ishāvā ngarābingwui vanga pa̱khangapā chi ithumwui ngasāhaowa, kaja nawui mangāli ithumna morei sāhaowa.

⁹ Lukhamashan kala pheokhami ithumwui Proho Varivarawuina; khikhalajila ithumna ali mamayāmada ngakaishihaira,

¹⁰ kala narao marānbingli hāngmi khangasak nawui ningkhami, Proho ithumwui Varewui akhon chi ithumna manganāsangmana.

¹¹ Israel saikorana nawui ain chonmakānhaira kala mai ngareithuihaira, nawui akhonla makhuisangmana. Varewui rao Moseswui ningkhami lairikli kapi kahai chiwui khonkashi kala mingkazai chi ithumwuitungli heirorhaira khikhalajila ithumna morei sāhaowa.

¹² Ithumli kala ithumli khamungbingwuitungli makhamayā hāngkahai hakkhamahā kalāshāt chi ungshung ngasakhaira; kaja okathuili mashoklakrang kaje Jerusalemwuitungli shokhaira.

¹³ Moseswui ainli kapi kahai thāda unshimui saikora hi ithumwuitungli tākahaina, chithālala ithumna Proho Varewui eina lukhamashan samphang khavaiwui eina ithumwui khayonkhamāng mahorhaila kala khamashungli latungda lumashankhami mangakaothuwa.

¹⁴ Chiwui vang Prohona khangarān sākahai kalāshāt hi rāshung ngasakhaira, kaja ithumwui Proho Varena kasāsā saikora hi khamashungna, kala ithumna kahāng makhanganāna.

¹⁵ “Ara, O Proho ithumwui Vare, nawui pangshap eina nawui mibingli Egypt ngaleiwui eina thānshokmida aja rāshungda naming theingasaklala ithum morei sāhaira, ithumna maphālakla sāhaira.

¹⁶ O Proho, nawui khamashung otsak saikorawui athishurda nawui kathara kaphung, Jerusalemwui eina nawui malungkhavāt chi ngareithuihaoranu; khikhalajila ithumwui morei kala ishāvā ngarāwui moreiwui vang Jerusalem kala nawui mibing hi kuikhamarei khongnainaobingwui meisum tantak chānjam ngasāhaira.

¹⁷ Chiwui vang O ithumwui Vare, namingwui vang naraowui seihā kala kapo hi kakhuisangmilu, O Proho, macho kahai nawui kathara shimli namai china horngasakmilu.

¹⁸ O iwui Vare, nāshungda shāmilu; namik rakta ithumwui khamasai hi katheimilu; kala nawui ming eina hokahai keinung hili kha-yangtāmilu; kaja ithumwui khamashung khangarong leida namangāli kapo maningmana, kha nawui hakkhamahā lukhamashan mangā eina seihā sāda kapona.

¹⁹ O Proho, nganāmilu; O Proho, pheomilu; O Proho, katheimilu; mahuinahaialu, namingwui vang, O iwui Vare, kaja keinung kala mibing hi nawuina.”

Gabrielna Kakhalat Hāngkhami

²⁰ Seihā sāda, iwui morei, iwui mibing Israelwui morei hāngphata, awui kathara kaphungwui vang ina Vareli poda;

²¹ seihā sāmahunglakha, khare khamahāli ina theikahai mi Gabriel chi, ngazinshongwui pha̱kaphayā atamli thaklāk eina yongrārāsai.

²² Ana rāda ili hānga, “O Daniel, nali awor eina theithangkhamei mikida I kharāna.

²³ Nana seihā sākaphok tharan tui akha shoka, kala nali chi hāngkida kharāna, kaja nali leishilaka; chiwui vang eina tui hi chukmajakazakta mang chi theishingkhuilu.

²⁴ “Nawui mibing kala nathumwui kathara keinungwui pongli khalāng ot kasāwui eina ngalat khavai, morei kasā tangkhavai, kala pheomi khavai, katang mavaila khamashung khangarong samphang khavai, khamahātui eina marāntui khanini mahor namkhavai, kala tharmathengmeikap kajepam chi thao neomi khavai atam, zingkumwui haptā hangshini kakmihaira.

²⁵ Chieina theilu kala bhab takhuilu kaja, Jerusalem hanmida sakālui khavai kakaso mithang eina thuilaga, thao neomi kahai, wungnao akha kharā eina tangda haptā shinira. Chiwui thili haptā hangtharukta khaniwui vang shongfa eina kuikhamarei raipanra̱shong sākhuira, kha hi kakhanang atamli shokra.

²⁶ Haptā hangtharukta khaniwui thili thao neomi kahai akhali katathaida khikha maleimara; kala rāki kaje wungnaowui mibingna keinungla, kathara shimla sākazamhaora, khangachang atam chi tara̱ kaphong eina ngasorāra, kala khangachangli rai shokra; ramkachola khak tāhaira.

²⁷ Ana haptā akhawui vang kachungkhali mangacheikapai tuingashit khuira, kala haptā chiwui ngahunshing khavā eina athumwui pha̱kaphayā kala kachigat saikora khāmmihaora; chiwui mahutli Khorumshimwui chuimeikap kajeli khalei katharapam chili ningkakachai yangkakharing meoma̱ haihaora kala Varena mipa chiwui vang ngarān kahai athit chi marāranglakha eina tangda leiki jihaoda mi khipanakha makhorumpaithuda katharapam chi ramcho kahai thahaora.