DANIEL 8 - Kathara Bible (BSI)

Yaovā eina Mevā Mahākhami

¹ Belshazzar awungana mungda kakathuma kum, Daniel ili, kharewui mang thāda rāmahāluishita.

² Ina khamahā chi kathei tharan I Elamwui keinung Susali pamsai, kala I Ulai kongli leisai.

³ Ina yangkakā tharan yaovā akha kongpheili nganingsai. Angaji khani shoka, khanini sāngthathuiya, kha akhana kasāngmei, kala sāngkhameipā chi shoknaowa.

⁴ Yao china zingtunshong, atungshong kala azingshong kharom kazat ina thei; sā khangatei ali mangasungrarmana, kala awui pangshapwui eina khipānakha makankhuirarmana; awui ningkachāng athishurda sākhangai sai kala akhalattawui yāng chithei khavai sai.

⁵ Ina chukmajada leilakha, yanglu, mevā akha ngalei machongza̱la zingtunshong eina okathui hupva makānrai; kala mevā chiwui amik khaniwui ngachaili angachee akha mashonshei shoka.

⁶ Kala ina kathei angaji khani kashoka, kongpheili nganing kasā yaovā chiwui ngalemli malungvātlāk eina ngasamvai.

⁷ Ana yaovā chili vākhanganai, kala ana malungvātlak eina akathot eina awui angaji khani thottekhaowa, kala yao chi awui mangāli manganingrarthuwa, kha ana ngaleili thotkārsanghailaga naikazama, kala awui pangshapwui eina yaovā chili kanmikashap khipākha maleithuwa.

⁸ Chiwui thili mevā china awui pangshap kachungkha chithei; kha a pangda leilakha, kahaka angaji chi tekhaowa, kala chiwui mahut kazingram achikun matili chiza̱laga angaji mati mashonsei eina shoka.

⁹ Athum ngachaili akhawui eina angaji kateona akha shoklaga haksang khangai haksangda azingshong, zingshoshong kala tekhamatei ram vāshunga.

¹⁰ Chiwui kahak chi kazingramwui sirāli kāshunga, kala sirā kaikha ngaleili thottāda chibingli naikazama.

¹¹ Akhalatta pangshap chithei, ashangva̱wui Wungnao eina tangdalila kāshunga, kala machatlakla rikkatā kachigat chila awui eina khuithuihaowa, kala katharapam chila ana sāshimānmihaowa.

¹² Saikora chi ali horsangmihaida, mashun maleilala machatlakla rikkatā kachigat chila mihaowa; khamashung kaho chi pheinai sāhaowa, kala angachee china sākhangai sāda ngamkhangai ngama.

¹³ Chiwui thili kathara akhana kahāng ina shai; kala kahānga chili khangatei kathara akhana hānglui, “Machatlakla rikkatā kachigat, mashun maleila shimān khangasaka, katharashim horsangmihaida chiwui ashangva̱li naikakazamwui khamahā kathei hi karankhafarakhala?”

¹⁴ Chieina ana ali ngahānkai, “Ngathor ngazin thingkhani shākathum; chiwui thili kathara shim hi khangachāwui pamli khuisangluira.”

Kazingrao Gabrielna Hāngkhami

¹⁵ Daniel ina khamahā chi kathei tharan, khiwui kakhalatkhala da theishingkhui khavai sai; kala yanglu, mi tākam eina iwui mangāli akha nganingsai.

¹⁶ Kala Ulai kongphei ngachaiwui eina mikhon akha khavao ina shai, “Gabriel, mipa hili khamahā hiwui kakhalat hāngmilu.”

¹⁷ Chieina ana iwui nganing khavaipamli rānganai, a kharā tharan I ngacheenāhaida ngakhumshām zanghaowa. Kha ana ili hānga, “O miwui naomayara, theilu, khamahā chi khangachang atamwui vangna.”

¹⁸ Ana hāngmamanda leilakha, I ngakhumshām eina piphupvāhaowa; kha ana khāngkhuida thuinganing ngasaka.

¹⁹ Ana hānga, “Yanglu, malungkhavātwui akuplam khi shokrakhala kaji ina hāngmiga; kaja hi retmi kahai khanaowa atamwui aponglina.

²⁰ “Angaji khani kashoka yaovā nana kathei chi, Media eina Persiawui awunga khanina.

²¹ Mevā chi Greecewui awungana, kala amik khani ngachaili mashonshei eina kashok angachee chi khare awungana.

²² Angachee tekhailaga mati kashok chi, awui yurwuili wungram mati shokra, kha awui pangshap eina rāki kaji maningmana.

²³ “Kala athumna munglaga ngachangnanai, khayonkhamāng ot kasāna ngalat kahai tharan, ngamcholak kahai, chānsam kathema awunga akha rāra.

²⁴ Awui pangshap reilakra, ana sākashi otmāng sāra, kala ana kasāsā ungshungra, kala khangamkharei, kathara mibingli sāshimān ngasakra.

²⁵ Awui thangkhamei awor china mikhanam mataisangra, a khalattawui ningli haklakada phaningra. Kashuirak eina kachungkhali shaothatra; kala wungnaobingwui Wungnao eina tangdalila mamayāmara; kha ali mipāng makhaningna sāshimānra.

²⁶ Hāngkahai ngathor eina ngazinwui khamahā hi khamashungna; kha khamahā hi phārihaisalu, kaja hi naolak eina shokki kajina.”

²⁷ Kala Daniel I atam kasha̱khawui vang kazāhaowa; chiwui thili ina ngakarthuida awungawuili otram ungngatha̱luiya; kha ili khamahā china ngachee ngasaklakhaowa kala bhab matārarthuwa.