DANIEL 3 - Kathara Bible (BSI)

Sinā Meoma̱li Khorum khavai Nebuchadnezzarna Kakaso

¹ Awunga Nebuchadnezzarna sinā eina mima̱ kahakva̱ akha sākhui: mima̱ chi khuining hangtharuk juiya, kala kahak khuining tharuka. Kala Babylon leikhai Dura kaho tampākli hai.

² Chiwui thili Awunga Nebuchadnezzarna satrapbing, kathānabing, khangam-khareibing, machinmebing, lansebing, bicharwobing kala leikhai chiwui otvabing saikorali meoma̱ chiwui dharkatli rākhavai hokazemkhuilu da awungana kasoi.

³ Chieina awungana sākahai ama̱wui dharkat chili zangkhavai satrapbing, kathānabing, khangam-khareibing, machinmebing, lansebing, bicharwobing kala leikhai chiwui otva̱bing saikora Nebuchadnezzarna sākahai mima̱ chiwui dharkatwui vang rakazipsera; kala awunga Nebuchadnezzarna sākahai mima̱ chiwui mangāli anganinga.

⁴ Kala vaomena hithāda panglāk eina vaomalāna, “Nathumli kasoda lei, O mibing, yurbing kala tuiyur khangatatei saikora,

⁵ nathumna talla̱, sipa̱, lyre, trigon, tingteilā, bagpipe, kala khangatatei eina kasā laakhon shākhaleoda, Awunga Nebuchadnezzarna sakā kahai sināwui ama̱ hili ngakhumshām eina khorumki kajina;

⁶ kala kachikathā ngakhumshāmsangda makhokharumpale meifa shātrung kahai chili ngalāngda horsanghaora.”

⁷ Chiwui thili talla̱, pipe, lyre, trigon, tingteilā, bagpipe, kala khangatatei eina kasa laakhon shākhaleoda, yur kachiva̱, tuiyur khangatatei hupta, mi kachiva̱ awunga Nebuchadnezzarna sakā kahai sinā ama̱ chili ngakhumshām eina khorumsera.

Kahāng Makhanganāwui Khayon Kaphen

⁸ Atam chitharan Chaldeanao kaikhana Jehudibingwuitungli zakshilāk eina ahāngkasota.

⁹ Athumna awunga Nebuchadnezzarli hānga, “O awunga, okpeimeiranu!

¹⁰ Talla̱, sipa̱, lyre, trigon, tingteilā, bagpipe, kala khangatatei eina kasa laakhon shākhaleoda sināwui mima̱ hili ngakhumshām eina khorumlu;

¹¹ makhokharumpa chili meifali horsangra da awungana hukhum mihaira.

¹² Babylonli yangmi khavai nana Jehudinao khani kathumli kapangsanghaira: athum chiya Shadrach, Meshach, kala Abednego, athumna nali matheimimana. Hibing hina nawui varebingli otram mangatha̱mana, kala nana sākakhui sinā mima̱li makhorummana.”

¹³ Chieina Nebuchadnezzarna malungvātlākhaida, Shadrach, Meshach kala Abednego athumli khuirālu da kasoi. Kakaso athishurda athumli khuivai.

¹⁴ Nebuchadnezzarna athumli, “O Shadrach, Meshach kala Abednego, iwui vareli otram mangatha̱mana kala ina sakā kahai sinā mima̱li makhorummana kaji hi mashungla? da ngahāna.

¹⁵ Ara, talla̱, sipa̱, lyre, trigon, tingteilā, bagpipe, kala khangatei akhon shākhaleoda ina sākahai mima̱li ngakhumshām eina khorumra jiakha phai; maningakha arui ngalāngda meifali horsanghaora, nathumli iwui pāng eina huimiki kaji vare chi khipākhala?”

¹⁶ Shadrach, Meshach kala Abednego, athumna ngahānkai, “O Nebuchadnezzar, hiwui pongli ithumna khikha hāngkhavai maleimana.

¹⁷ Chithasalala, ithumna otram khangatha̱a Varena khamalinga meifawui eina ithumli kanmishapa, O awunga, napāngwui eina ana ithumli kanmira.

¹⁸ Chimathāsalala, O awunga! nana sākakhui sināwui mima̱ hili ithum otram mangatha̱mara kala makhorumara da theilu.”

Danielwui Ngasota Kathumwui Tungli Kathi Hukhum Katā

¹⁹ Chi shālaga Nebuchadnezzar malungvātlakhaowa kala awui ningngaila Shadrach, Meshach kala Abednego athumwuitungli ngateihaowa. Ana meifa chi khangachāwui kasāli shini shida sāmei khavai kasoi.

²⁰ Kala ana Shadrach, Meshach, Abednego, athumli pheipāng khalaplaga meifa shātrung kahai chili horsang khavai kapanga raimi kaikhali kasoi.

²¹ Chieina athumwui kashankachonla, kuihonla, zangserda khalaplaga meifa shātrung kahai chili horsanghaowa.

²² Awungawui hukhum chi chetlakhao, meifa shātrung kahai china sālakhaoda Shadrach, Meshach, Abednego athumli horkasangbingli meifa chiwui meiwona chuitahaowa.

²³ Shadrach, Meshach kala Abednego athumli pheipāng khalaplaga meifalungli tāzanghaowa.

²⁴ Khaleilaga Nebuchadnezzar awungana matakhakhaida ngakarthung thui, kala machinmebingli hānga, “Mi kathum meifali horkasang maningmala?” Athumna, “Mha, awunga!” da ngahānkai.

²⁵ Ana hānga, “Kha mi mati meilungli yaothuikazat theili, athumli sākaza̱ maleimana, kala khamatepa chi yangakha varebingwui naomayara thai.”

Chihokhami kala Ngapham Khami

²⁶ Chieina Nebuchadnezzarna meifa chiwui khāmongshong vānganaida hānga, “Shadrach, Meshach, Abednego, Reimataimeikap kaje Varewui raobing! shoklu, kala hili ralu!” Chieina Shadrach, Meshach, kala Abednego athumna meiwui eina shokrāsai.

²⁷ Kala satrapbing, kathanabing, lammungabing, kala awungawui machinmebing, kaziplaga khayang tharan, athumwui phasāli meina machuihaisālak mana, sam eina tangda mangaluimana, kashankachonla machuimana kala meihi eina tangda manganamana.

²⁸ Nebuchadnezzarna hānga, “Shadrach, Meshach kala Abednegowui Vareli tekmateiranu! Athumwui Vare maningla vare khangateili khorumki kajiwui vang phasā chigat kahai mibingli kazingrao chihotāda, awui raobingli huikhame Vare chi tekmateiranu!

²⁹ “Chiwui vang ina hukhum khamina: Shadrach, Meshachwui kala Abednegowui Vareli makhamayā kala kachipata miyur, jat kachiva̱li asā rimkazamira, athumwui shimluila sākhayāngmiserhaora. Kaja, hithāda huimishapa vare khangatei maleimana.”

³⁰ Kala awungana Shadrach, Meshach, Abednego athumli Babylon ngaleili athumwui otpam reisang ngasaka.